Japan-a Nurse hna thawk tur mi 14 vailiam

Mizo thalai Japan ram-a Nurse hnathawk tur mi 14 te chu NSDC-I tumsaka Delhi-a Japanese tawng thla 9 chhung zir turin nimin khan thlahliam an ni.

Japan leh India sawrkarin thawhhona thuthlung an siam angin Japan rama Nursing Care hna thawk tur thawnluh hna hi National Skill Development Council-International (NSDC-I) chuan a kalpui a, India rama a Pilot programme atan Nurse 50 thawnluh phawt tum a ni. LESDE Department hmalakna in Mizo thalai Nurse hna thawk tur a tum khat nan mi 6 kaltir tawh niin, nimin khan a tum hnih nan mi 14 kaltir leh an ni a. Heng mi 14 te hian thla 9 chhung Training an neih zawhah an thawhna tur biakfel sa hmun te Sawrkar-in a enfelsak zawhah Japan ramah hnathawk turin kaltir an ni anga, an kalna senso leh tuldang hi an thawhna tur ten an tumsak vek dawn a ni.

Nimin-a heng mite thlahliamna hun ATI Auditorium-a neih hi Labour, Employment, Skill Development & Entrepreneurship Department changtu Minister Lalchhandama Ralte chuan hmanpuiin Japan ram a Nurse hnathawk tura kal turte chu Mizoram tan Ambassador an nih thu leh, Mizo thalai tam takte tan eizawnna kawng sialtu pawimawh tak an nih thu sawiin, rinawm leh taima taka thawk turin a fuih a, Kristian kan nih ang ngeiin ring lo mite pawhin kan hnathawh leh kan nunah Pathian ringtu kan nihzia an hmuh ngei theihna turin tawngtaia Pathian au fo turin a chah bawk a ni.