Environment, Forests and Climate Change Department kum 50 tlin lawmna neih a ni

Environment, Forests and Climate Change Department kum 50 tlin lawmna chu Inrinni khan Aizawl Bethlehem Vengthlang-a Forest Training School-ah neih a ni a, EF&CC Minister TJ. Lalnuntluanga chuan a hmanpui a ni.

    EF&CC Golden Jubilee lawmna ah hian Minister TJ. Lalnuntluanga chuan Forest Department chu Department pawimawh leh hmasawn chho zel a ni chu lawmawm a tih thu a sawi a, Golden Jubilee an thleng thei chu a lawmpui thu a sawi bawk a ni. Minister chuan kan ram a thing leh mau leh nungchate kan humhalhna kawnga tan an lak zelna ah Forest Department pawimawh zia sawiin, Department thawktu kalkhawmte chu an hmalakna kawngah mipui te ngai pawimawha a tam thei ang bera mipui te nen a an thawhho thiam (people's participation ) a pawimawh thu a sawi a. Forest Department chuan Agro forestry lamah pawh hma a lak chhoh zel thu sawiin, “Lo nei mi ten Department an lo hlawkpui chhoh zelna tur a ni,” a ti a. “Mipuite tana theihtawp kan chhuaha mipuite support kan hmuh hian keimahni tan pawh hnathawh a awlsam in a hlawk phah hle a ni,” a ti bawk.

Forest Department Golden Jubilee lawmna inkhawm ah hian PCC RK. Singh pawhin Golden Jubilee an thleng thei chu a lawmawm a tih thu sawiin, tun dinhmun an thlen theih nachhan chu hun kalta a thawktu leh hruaitu hmasa ten rim taka an lo thawh rah a nih thu a sawi bawk.

Kum 1972-a Mizoram UT anih kum khan Forest Department hi Full Fledged Department a hlan kai niin Forest Department tih ni thin kha kum 1987-ah Environment &Forest Department tih a ni a, Kum 2016 khan Environment, Forest and Climate Change Department ti a thlak leh a ni.

EF&CC Golden Jubilee lawmna inkhawm ah hian hian Department Field Staff thawk tha zual 4 te hnenah Golden Jubilee Excellence Award hlan a ni a Award dawngtute chu Golden Jubilee Excellence Award for Excellency in Forest Nursery-ah C. Vanlalruata, Forest Guard; Golden Jubilee Excellence Award for Excellency in Forest Plantation-ah Jose LP. Thanga, Forester; Golden Jubilee Excellence Award for Excellency in Forest Protection-ah Laltlansanga Khiangte, Forest Guard leh Golden Jubilee Excellence Award for Excellence in Public Relations-ah Lalsangzuala, Forester te an ni.

Zirtawpni khan EFCC Department kum 50 tlin lawmna atan hian Jubilee Green Rally neih a ni bawk a, Department mi leh sa bakah YMA te leh Environmental NGO hrang hrangte an tel a ni.