Larsap ho in PM TB Mukh Bharat Abhiyan hmalakna thlirho

Governor Hari Babu Kambhampati chuan nimin khan Health Department Official te Raj Bhavan-ah kawmin Prime Minister TB Mukh Bharat Abhiyan hmalakna kal mek a hnathawh leh thlen chin te an thlirho.

    Nimin a inkawmna ah hian Principal Secretary, Health Department Esther Lalruatkimi leh Dr. Eric Zomawia, Mission Director, National Health Mission te chuan PM TB Mukh Bharat Abhiyan chungchanga hmalakna te an tarlang a. Governor Hari Babu Kambhampati chuan TB natna laka mipuite an himna tur leh he natna hri umbo tura Health Department hnathawk tute inpekna leh thawh-rimna chu fakawm a tih thu a sawi a. Review Meeting hmasa zawk leh tun inkarah pawh hmasawnna hmuhtur a awm tih a sawi.

Governor chuan he hmalakna huangah hian Mizoram State chu a ziaawm pawl ni mah se tanlakna tur lai erawh a la awm tih sawiin, TB Damdawi eitir mek te vil uluk chhunzawm a pawimawhna a sawi a, a bik takin damdawi ei that loh avanga TB natna enkawl dam theihloh vei an awm lohna turin tan lak mar pat a ngai a ni, a ti.

Governor chuan TB vei zingah AIDS/HIV vei leh mi harsa zawk te an awm tih sawiin, “Heng mite hian TB Damdawi an thatpui na turin ei tur tha (Nutrition) an mamawh a. Tlawmngai thei tan TB vei te tanpuina Ni-kshay Mitra Program, reports.nikshay.in/FormIO/DonorRegistration kaltlangin a inhawng reng a ni,” a ti. Governor chuan TB vei te chhawmdawlna chu rawng-bawlna pawimawh tak a nih avangin MLA zawng zawngte hnenah pawh lehkha hmangin ngenna a pe tawh tih a sawi a. Mipui vantlang zingah mi tlawmngai te rawn pen chhuak zel turin a sawm nghal bawk.