Bharat Jodo Yatra kharna ah Lalsawta’n thu sawi

Mizoram Pradesh Congress Committee (MPCC) President Lalsawta chuan Mizo hnam tel lohna India a kim thei lo nia sawiin, “India Pakhat, Mizoram mipuite telna hi kan duh a ni,” a ti.

    India ram chhunga thilman sang chak lutuk (inflation), hnathawh tur nei lo pung nasa lutuk (Unemployment) leh Sakhaw intluk tlanna (secularism) kawngzawh, Bharat Jodo Yatra kumin September 7 atanga Congress Party in an neih kharna puala inkhawm nimin-a Congress Bhavan Aizawl kawt-a neih ah MPCC President chuan he kawng zawh hi Mizoram-ah hlei hlei a pawimawh tih sawiin, Uniform Civil Code leh Citizenship (Amendment) Act, 2019 te hian Mizo te hi a sirah min hnawl hret hret a, min luahlantu an awm chho mek zel a. Political Party hrang hrang, Kohhran leh NGO te tanrual a ngai takzet a ni, a ti a. “Mizoram hi India ramah kan la awm miau avangin Mizoram mipuite tel lohna, Mizo hnam tel lohna India a kim thei lo a, India Pakhat, Mizoram mipuite telna hi kan duh a ni,” a ti bawk.