Deputy Speaker Candidate-ah H. Biakzauva thlang

MNF Legislature Party (MLP) chu nimin khan Chief Minister Zoramthanga hova thukhawmin Mizoram Legislative Assembly Deputy Speaker thlanna neih turah Candidate atan H. Biakzauva chu lungrual takin an thlang.

    Nimin khan Assembly House Recess Room A-ah MNF Legislature Party (MLP) hi thukhawmin February ni 7 a tan tur Mizoram Assembly Budget Session chungchang an thlirho a, February 8, 2023-a Assembly Deputy Speaker thlanna neih tura MLP Candidate atan 38-Lawngtlai East AC bialtu MLA H.Biakzauva chu lungrual taka pawm a ni a. Tarlan tawh angin Assembly Deputy Speaker Er. Lalrinawma chuan nikum December 15 khan banna thehlutin hemi hnu hian Er. Lalrinawma hi Minister atan lakluh a ni.

MLP thutkhawm ah hian MNF sawrkar kal mek hmalakna hrang hrangte thlirho a ni bawk a, SEDP First Phase-ah chhungkaw sing ruk hnenah First Instalment chu a dawng tur chhungtin hnenah Rs. 25,000/- zela pekchhuah a nih tawh thu leh Second Instalment pek leh tur pawh sanction a nih tawh thu bakah a tahtawla semchhuah thuai anih tur thu te ngaihthlak a ni a, heng chhungkaw sing ruk pek mek bakah sawrkar kumthar 2023-24 ah chhungkaw dang tam tak, Second Phase leh Third Phase thlenga thlan belh leh tur chak taka hmalak nise an ti bawk.

Inkalpawhna kawngpui tha zawk Mizoram mipuiten kan neih theih nan MNF sawrkar tirh atanga theihtawp chhuah anih thu he hunah hian tarlan a ni bawk a, nasa zawka tan lak chhunzawm zel turin rel a ni bawk a. Uniform Civil Code (UCC) hmang tura hmalakna awm mek chu MLP chuan tha ti lovin, tun Assembly Budget Session lo awm turah hian lungrual taka UCC duhlohna pass dan kawng dap nise an ti bawk.