Ranvulh kawnga Thinglian hmasawn dan tur sawiho

Tuikum bialtu MLA leh AH&Vety Minister Er. Lalrinawma chuan Inrinni khan a bial chhunga Thinglian khua tlawhin khawtlang hruaitute nen ranvulh lama Thinglian khua in hma a sawn theih dan tur an sawiho.
    Thinglian khawtlang hruaitute nen an inkawmna ah hian Er. Lalrinawma chuan ram leh bial mipuite tana hnathawk theia a awm ve chhunga a ngaih pawi-mawh ber pakhat chu eizawnna lam kawnga hmasawn zelna a nih thu sawiin, eizawnna ngial nghet a awm theih nan tiin Link Road te pawh laih thin a nih thu a sawi a.  “Kan thawhrah theuh seng tur kan nih avangin kan hnathawh hian kan nitin khawsak a hril theuh a, mipuite pawhin mahni zawnah mawhphurhna lian tak kan nei tih ka hrereng dawn nia,” tiin mipuite a chah a ni.

AH&Vety Minister chuan ranvulhna lam hma an sawn theih nan pawh an thawh-rimna chu thil pawimawh ber a nih thu sawiin, a theih ang angin AH&Vety Department lam pawhin a tanpui zel dawn tih khawtlang hruaitute chu a hrilh a. Ran In sakna tur hmun atana khawtlang duhna hmunte pawh Minister hian tlawhin khawtlang hruaitute nen a hmunhma an thlirho bawk a ni.

Thinglian khuaah hian chhungkua 84 khawsa mekin an inkawmhona hi Thinglian VCP Edenmawia'n a kaihruai a, NGO atangin MUP Vice President Sailova leh YMA Vice President Thantluanga ten thu an sawi bawk a, hmalak dan tur hrang hrang an sawiho a ni.

Thinglian khuaa hun a hman zawh hian Tuikum bialtu MLA Er. Lalrinawma hian a bial chhunga Lungpho khua pawh tlawh nghalin Lungpho khawtlang hruaitute nen Khelmual laih zauh dan tur an thlirho bawk a ni.