Aizawl-ah Governor hovin Republic Day hman a ni

India Republic Day vawi 74-na chu nimin khan Aizawl-ah pawh neih niin Governor Hari Babu Kambhampati chuan India Hnam Puanzar pawtparhin Parade Contingent 26 ten Hnam Puanzar zahna chibai an buk chu a chhanglet a, mipuite hnenah thuchah a sawi bawk.

    Governor Hari Babu Kambhampati chuan Zoram mipuite duhsakna chibai bukin, “He ni ropui takah hian zalenna sualtute inpekna avangin India ram khua leh tui te chuan kan tan Danpui kan inpe a, kan Danpui hian kan zavaiin dikna, zalenna leh intluktlanna min pe a ni tih hre thar leh turin kan inchah a ni,” a ti a. Tlawmngai pawl hrang hrang, Kohhran mite leh mipuite zarah sawrkar in hmalakna lian tak tak hmangin State hmasawnna tur chak takin a thawk chhunzawm tih a sawi.

Governor chuan thuchah sawihawnna atan sawrkar kum kalta leh sawrkar kum kan hman meka hmalakna liantham pathum tarlangin, Socio Economic Development Policy (SEDP) kaltlangin Mizoram sawrkar hmalakna pawi-mawh tak tak te a kalpui chhunzawm zel thu leh 10th International Tourism Mart for the North Eastern States chu hlawhtling takin Mizoram in Aizawl khawpuiah a thlen bakah he hun pawimawh tak hi a hlawhtling hle tih a sawi a. Kumin March thla hian khawvel pum huapa intawhkhawmna pawimawh G-20 Business Meeting thleng turin Mizoram chu a inpuah-chah mek tih a sawi bawk.

Kumin Republic Day lawmna inkhawm ah hian Mizoram Police leh Excise & Narcotics Department hnathawk zinga chawimawi phu thlanchhuah ten India ram pum huapa chawi-mawina sang te, Governor’s Gold Medal leh Silver Medal dawngin chawimawina dawng turte pawh puanchhuah leh an ni bawk.