Mizoram tlawhtu khualzin pung zelin kum 2022-23-ah khualzin 1,64,048 awm tawh

Sawrkar kum kal mek 2022-2023 (April - December) chhungin Mizoram tlawhtu khualzin 1,64,048 an awm a, chung zinga mi 2,300-te chu rampawn atanga kal (Foreign Tourist) an ni a, kum 2009-2010 atanga chhiarin kumin, 2022-23 hi Mizoram in khualzin a neih tam ber kum a ni.
    Mizoram sawrkar Tourism Department tarlan danin kum kal mek chhunga Mizoram tlawhtu khualzin 1,64,048 zinga a tam berte chu ramchhung atanga kal (domestic tourist) niin heng khualzin hi mi 1,61,748 an tling a. November, 2022-ah khualzin an tam berin 21,247-te chu ram chhung atanga kal niin, ram pawn atanga kal mi 380 an awm.

Kum 2009-2010 atanga tehin kum kal mek, 2022-23 hi kum la tluan lo mah se Mizoram tlawhtu khualzin tam ber kum a ni tawh a, ram chhung leh ram pawn atanga Mizoram tlawhtu khualzin kalte pawh an tam ber kum a ni tawh bawk a ni. Kum liam ta 2021-22 chhung khan Mizoram tlawhtu khualzin zat chu 1,32,616 an tling a, chung zinga mi 1,32,099-te chu ram chhung khualzin niin, mi dang 517-te chu ram pawn khualzin an ni a, hei hi kumin hian a khum tawh a ni.

Hetihlai hian Mizoram sawrkara Tourism Department-in a pawm ‘Tour Guide’ mi 89 an awm tawh a, chung mite chu khawpui bakah thingtlang hmun hrang hranga mite an ni.

Aizawl District-ah Tourism Department enkawl Tourist Lodge paruk awmin, Champhai District-ah pali, Hnahthial District-ah pakhat, Khawzawl District-ah pahnih, Kolasib District-ah pathum, Lawngtlai District-ah pali, Lunglei District-ah pahnih, Mamit District-ah pasarih, Saitual District-ah pahnih, Serchhip District-ah pariat leh Siaha District-ah pathum a awm a, District hrang hrangah mimal enkawl Tourist Lodge 27 a awm bawk a ni.