Lenkawl

Village Council Inthlanpui Serchhip District-a neih tur atan inbuatsaihna ngawrh taka kalpui mek a ni a, nimin khan Serchhip District Bawrhsap leh District Election Officer Paul L. Khuma leh Serchhip District bialtu Election Observer C. Lalduhzuali te hovin Village Council Inthlanpui lo awm tur atana inbuatsaihna hrang hrangte thlirho a ni.

Kumdang-a lo hman tawh thin angin ‘Road Safety Month’ chu February 2025 chhung hian Mizoram hmundangte rualin Serchhip District-ah pawh hman leh a ni dawn.

Serchhip District chhunga bawlhhlawh sawngbawl dan tur ruahmanna leh rawtna te chu nimin khan Bawrhsap Paul L. Khuma hovin sawiho a ni.

Serchhip Dinthar Branch YMA chuan tunkar Nilaini, January 29, 2025 khan an dinchampha vawi 43-na pualin an huamchhung ah Faina hnatlang an nei a, he hunah hian YMA member mi thahnem tak thawkchhuakin an huamchhung hmun hrang hranga bawlhhlawh chhar faiin an thawk a ni.

Mizoram School hrang hrangah kum 6 atanga kum 14 inkar za zela 98.7 chu School-ah ziahluh an ni.

Nimin khan 'Ek Bharat Shreshtha Bharat' hmalakna hnuaiah Uttar Pradesh State leh Dadra and Nagar Haveli and Daman and Diu Union Territory-te Foundation Day lawmna hun chu Aizawl-a Raj Bhavan-ah neih a ni.

Mizoram Jail atanga tum hnih tlanchhuak tawh Lalchhanmawii, Khawmai (Myanmar) chu niminpiah khan Champhai Police ten an man. Thudawn danin kum 44-a upa C. Mawii tia koh hi Central Jail, Aizawl atangin November 30, 2023 khan a tlanchhuak a, May, 2024-ah Cham-phai-ah an man leh a. December 18, 2024 zing dar 2:00 velah a tanpui hmeichhe pakhat nen Champhai District Jail atanga tlanchhuak lehin niminpiah khan Zokhawthar-ah YMA duty ten an man leh a, Champhai Police-te kutah an hlan nghal a ni. C. Mawii hi Heroin kaihhnawih ah vawi tam man a lo ni tawh a, hetianga man leh a nih hnu hian Central Jail-a dah turin tih a ni.

MNF Vice President leh Opposition Leader Lalchhandama Ralte chuan a Bbial, Tuivawl Bial fang mekin Khawpuar, Vaitin, Thingsat, New Vervek, East Damdiai, Lungsum, Ratu, Sailutar, Sunhluchhip, Chhanchhuahna Khawpui, North Serzawl leh Darlawn khua te a tlawh a, VC/LC inthlan lo awm tûrah MNF chuan hnehna sâng tak a chan ngei a rin thu sawiin, “ZPM chu an sawi ang leh an intiam ang an nih loh lutuk avângin mipuiah anmahni rinna a tlahniam tawh hle a, hun reilote chhûng ringawt pawh hian anmahni ngaizawngtu an tlahniam tawh hle a ni,” tiin an party zawmthar te a lawmlut bawk.

Mizoram Pradesh Congress Committee (MPCC) Spokesperson Dr. Lallianchhunga chuan nimin khan Aizawl Press Club-ah thuthar thehdarhtute kawmin Village Council leh Local Council Inthlan lo awm turah an party mipuiten theihtawp an chhuah zarah Congress party chuan hma a sawn em em tih a sawi a. ZPM sawrkar hnuaia Mizoram hmasawnna atana kan mamawh chu Opposition VC a nih thu pawh sawiin, hmasawnna tha leh tlo a awm theihna turin Congress party VC Candidate zawng zawng thahnem ngai taka lo vote pui turin Mizoram mipuite a ngen bawk.

Nimin khan Lunglei-a ZPM Party Office-ah mithar lawmluhna hun buatsaih niin he hunah hian ZPM Party zawm thar mi 771 te chu ZPM President Lalliansawta chuan a lawmlut tih ZPM chuan thuchhuah siamin an tarlang a. ZPM President chuan Mizoram hi kalphung thar mipui sawrkar ni turin din thar an tum hle tih sawiin, “Kan Minister te hian theihtawp an chhuah takzet a, hun vawndik kawngah a hmahruaitu an ni chho thei zel a. Hmingchhiatna-a kan hlauh ber pakhat corruption-ah an filhlim hle niin kan hria,” a ti.

India Infrastructure Finance Company Ltd (IIFCL) te chuan nimin khan Chief Minister Lalduhoma chu a Pisa-ah hmuin Mizoram State sawrkar leh IIFCL Projects Ltd. te thawhona zarah infrastructure changtlung leh hmasawn zawk a lo awm theih dan turte an sawiho a. IIFCL Projects Limited hian Chawnpui Veng-a PM Ekta Mall sakna atan hna an kalpui mek a ni.

Central YMA chuan Aizawl khawpui laili a Assam Rifles ram chu mipui tana tangkai thei ang bera hman a nih theih nana hma la turin Sawrkar an ngen. Tunkar Thawhtanni a Central YMA Executive Committee thukhawm chuan Assam Rifles in Aizawl khawpui laili-a an awmna an chhuahsan tum chungchang an ngaihtuah a. Nikum Oct. ni 23-a Mizoram Sawrkar leh Assam Rifles ten inremna an ziah tawh angin Assam Rifles te hian an ram hi an chhuahsan dawn hnai nia hriat a ni a. Assam Rifles ram te chu mipui tan a tangkai thei ang bera hman a nih theih nana hma la turin sawrkar an ngen a. Mimal, Political Party, Kohhran leh Pawl hrang hrang te mahni tana remchang lo zawng lo turin an ngen a ni. Central YMA chuan heng rama mimal LSC nei engemaw zatin an LSC an hlan let chu ropui an tih thu leh ram tana an inpekna an ngaihlu tih an sawi a, LSC la nei thenkhat te pawhin ram leh hnam tana hlan ve turin an ngen a ni.

Mizo Zirlai Pawl (MZP) General Hqrs. hruaitute chuan Mizoram hmun hrang hranga NHI-DCL hnuaia kawngpui siam mek te chu tha taka thawk turin an ngen.

Khawvel puma Pharte ni ‘World Leprosy Day’ chu nimin khan hman niin tun dinhmunah Mizoram-ah Phar natna vei mi 10 an awm a ni.

Mizoram State Project Monitoring Commitee (MSPMC) chuan nimin leh niminpiah khan Saiha leh Lawngtlai District-a sawrkar hmalakna thenkhat te tlawhin a hmunah an enfiah.

Zo Reunification Organisation (ZORO) buatsaihin nimin khan Serchhip-ah Free Movement Regime (FMR) hlih leh Border fencing tum duhloh lantirna neih a ni a, hemi rual hian Aizawl-ah hmundang ah pawh hun hman niin FMR hlip a, kengkawh tura India sawrkar thupek leh Mizoram sawrkar thupek te chu hal a ni.

PM Cares kaltlanga Serchhip District-a tanpuina dawngtu naupangte kawmna hun nimin khan Serchhip-ah Bawrhsap Paul L. Khuma hovin neih a ni.

Village Council Inthlanpui neih tura Polling Official te tana Training chu Vawiin hian neih a ni dawn a, nimin khan Master Trainer te tan briefing neih a ni.

Serchhip District Bawrhsap Paul L. Khuma chuan nimin khan Serchhip Sports Complex-ah Serchhip District Football Championship 2025 kharna hun a hmanpui a, infiammi kalkhawmte chu kum lamah pawh la naupang tak tak, hmabak hun eng tak nei an ni tih sawiin, Pathian tih chungin an nun hmanh chho zel tur leh tumruhna leh taimakna vawng reng turin a chah a, nun an hman chhoh zelna ah Ruihhlo laka fihlim tur an ni tih hre reng tura chahin, midangte hnenah pawh ti ve chhinlo tura fuihtu ni zawk turin a chah bawk. Serchhip District Football Championship 2025 Final-ah hian Thanzuala FC, Thenzawl chuan si hnih fai-a Hmar Veng FC, Serchhip hnehin an Champion a, MFA Cup-ah Serchhip District aiawhin an kal dawn a ni.

Baptist Church of Mizoram (BCM) hmunpui Serkawn-ah nimin khan kum 2025-2028 chhunga BCM puipa turte chu Assembly Executive Committee ten an thlang a, BCM khaipa ber General Secretary atan Rev. Dr. H. Lalthlamuana, Lawngtlai Executive Secretary nilai mek leh a thawhpui turte thlan an ni a, March thla a BCM Assembly neih hunah mawhphurhna an la tan ang.

Mizoram sawrkar chuan nikum December 20-a Council of Minister thukhawm in a rel angin Society hnuaia awm thin Zoram Medical College (ZMC) chu sawrkar hnuaia awm turin a dah a, ZMC hian State Referral Hospital a ken tel avangin a hming pawh ‘Zoram Medical College & Hospital, Falkawn’ tiin thlak nghal a ni bawk. Hemi chungchangah hian nimin khan sawrkar chuan thuchhuah siamin a tarlang a ni.

ZPM party chuan thuchhuah siamin nimin khan ZPM Lai District Headquarters buatsaihin Lawngtlai khawpuiah mithar lawmluh inkhawm buatsaih a nih thu leh mi thar 1325 zet ZPM Party ah lawmluh a nih thu an sawi a. Mi thar an lawmluh zingah hian Mizoram BJP State Vice President T. Zakunga MDC leh amah tawiawmtute an tel niin an tarlang.

Sports & Youth Services Minister Lalnghinglova Hmar chuan nimin khan DoNER Minister Jyotiraditya Scindia chu New Delhi-a a chenna In-ah kawmin DoNER Ministry kaltlanga Mizo-ram leh Northeastern a Sports tihhmasawn theih dan hrang hrang an sawidun a. DoNER Minister chuan Mizoram Sports Minister chu tha taka lo dawngsawngin, Sports discipline hrang hrangah result lian tham nei thei tur project siam uar turin a lo chah a. Project proposal tam zawk nen New Delhi-a inhmuh leh thuai a duh thu sawiin, Mizoram chu theihtawp chhuaha puih a inhuam tih a lo hrilh a ni.

Mizoram Upa Pawl (MUP) General Hqrs. hruaitute chuan nimin khan an President Nghaklianmawia hovin Larsap (Dr) VK Singh chu Raj Bhavan-ah hmuin duhsakna an hlan a. Kum upa te tana hamthatna awmte tarlangin theihtawp chhuahpui turin an ngen a. Heng bakah hian Mizo-ram hmasawn nena pawimawh hrang hrangte an sawipui bawk a ni.

St. Pauls Higher Secondary School-a pawl 10 zirlai Lalnunsangi Ralte chu kum 2025 Pariksha Pe Charcha 8th Edition-ah Prime Minister Narendra Modi nen inkawm tura thlan a ni. Prime Minister Narendra Modi hova zirna chungchang a inkawmhona Pariksha Pe Charcha-ah hian ram-chhunga zirlai hrang hrang thlanchhuah te an tel thin a, kuminah hian zirlai 100 chuangin Delhi an pan hnuah zirlai 36 chu Prime Minister nena inkawmhona ah hian an tel thei dawn a ni.

Nimin khan Aizawl-a SCRET Auditorium-ah Primary Sikul leh Anganwadi Zirtirtute tan Jadui Pitara leh e- Jadui Pitara Workshop neih a ni.

Sawrkar kum kal meka Lengpui Airport in sum a hmuh tura beisei zat chu an hmuchhuak dawn hnai nia thudawn a ni.

Mizoram Information Commission (MIC) chuan Mizoram RTI Online kan hman mek chu tun aia tha leh changtlung zawkin an duang mek tih sawiin, Software tha zawk nen version thar hman a nih tawh dawn avangin RTI Online apps hlui chu hun reilote chhung a khaihlak mai thei tih an sawi a. App thar hi January 30, 2025-ah Google Playstore/Apple Appstore-ah te upload a ni ang a, anni lamin an approve hnuah hman theih a ni dawn tih an sawi bawk. He apps thar hman dan tur sawiin, mahni phone a Mizoram RTI Online download/install sa chu paih (uninstall) phawt tur a ni a, hemi hnuah Mizoram RTI Online (version 2) hi download/install tur a ni a. Credentials/password etc. hman mek kha chhutluh leh mai tur niin, RTI zawhna, Appeals, Complaints an lo thehluh tawh te leh chhanna an dawn tawh zawng zawngte pawh a bo dawn lo a ni.

Mizoram Fire and Emergency Services chhinchhiah danin kum 2018 atanga 2024 chhungin Mizoram-ah kangmei chhuak avangin mi 19 in nunna an chan.

Mizoram Governor Gen (Dr) Vijay Kumar Singh chuan India ram hmarchhak hmun pawimawh tak, thenawm rambuaiin a chim mekte hualvelah kan awm tih sawiin, “Ram inpumkhatna turin mawhphurhna kan neih nasat phah a ni,” a ti.

Mizoram chhungah kum 2024 chhungin Hmarcha quintal 5858 leh kg 5065 chin a ni a, quintal 37,929 leh kg 475 tharchhuah beisei a ni.

Serchhip District chhunga Village Council 56-a inthlanna thla thar February 12-a neih turah chuhtu awm lova tling-a puan mi 7 awmin an vai hian ZPM Candidate te vek an ni a, ZPM hian VC pakhat la tawhin Vote thlakna tur VC hrang hrangah inbuatsaihna ngawrh taka kalpui mek a ni bawk.

Mizoram Pollution Control Board (MPCB) leh District Education Officer (DEO) Office Ser-chhip te tangkawp buatsaih ni hnih chhung awh Pa (Mushroom) khawi dan zirhona BRC Hall, Serchhip-a neih chu nimin khan zawhfel a ni a. He Training hi Serchhip District chhunga Eco Club School Teacher-te tana buatsaih niin School hrang hrang atangin Zirtirtu mi 31 an tel a, Sr. Horti. Demonstrator Maggie C. Zosangpuii chu Resource Person atan hman niin Pa khawi dan leh enkawl dan hrang hrangte an zir a ni.

Serchhip District-a Village Council Inthlanna neih turah Cote nei mi 50,594 an awm dawn.

Mizoram sawrkar General Administrative Department-in tun thla ni 24-a thuchhuah a siam angin, Village Council Inthlan 2025 lo awm turah mipui ten zalen taka vote an thlak theih nan Ser-chhip District pumah February ni 12, 2025 (Nilaini) chu Sawrkar Chawlh (Public Holiday) ah puan a ni tih Serchhip DC chuan mipuite a hriattir.

Chief Minister Lalduhoma’n hmasawnna hna tam zawk thawk thei turin State Own Revenue tam zawk an mamawh thu a Social Media, Instagram account kaltlangin a sawi a. State sawrkarin sumfai tum tur a neih chuan central pawisa a hailuh theih a ni tih sawiin, Central Scheme tam zawk chu sawrkar laipui leh State sawrkar te intum sem thin a ni a, Central in za zela 90 tumin State sawrkar in za zela 10 a tum thin tih a sawi. Chief Minister dan anga chhiah lakkhawm chu hmasawnna ke chheh hmasa a ni tih sawiin, Sawrkar sum hnar chu chhiah a ni tih a sawi a, an sawrkar hnuah chhiah lakkhawm lamah hma an sawn hle tih sawiin, Hmasawn zel theihna remchang tam tak a la awm tih a sawi bawk.

Mizoram chhungah kum 2024 chhungin Aieng quintal 7817 leh kg 155 chin a ni a, heng atang hian quintal 81,609 leh kg 9 tharchhuah beisei a ni.

Central YMA Executive Committee (CEC) chu nizan hmasa khan thukhawmin Sawrkarin Lengpui Airport midang kuta hlan a tum chungchang an ngaihtuah a. Hemi hnua thuchhuah an siamah “Ni 9.8.2024-a NGO Co-ordination Committee-in, Indian Air Force (IAF) kuta Mizote rohlu Lengpui Airport hlan a remtih loh thu a lo puan chhuah tawh chu kan dinna ngai niin, kan ram leh hnam rohlu Lengpui Airport hi IAF kuta hlan hi kan remti ngai dawn lo a ni,” an ti a. Sawrkar chu Mizo ram leh hnam tana tha ber tur thlir chunga ngaihtuahna hmang nawn leh turin an ngen bawk.

Mizoram Chief Minister kalchhuak ta Zoramthanga chuan nimin khan Mizoram Governor Gen (Dr) VK. Singh chu Raj Bhavan-ah hmuin an inkawm a, Chief Minister hlui Zoram-thanga chuan Governor hi duhsakna hlanin Mizoram tana pawimawh leh tul hrang hrangte inpawh takin an sawidun a ni. Niimin vek khan Brig Girish Upadhya, HQ 23 Sector Assam Rifles, Aizawl leh Sudheer Kumar Dwivedi, Director & Head Meteorological Centre, Aizawl te chuan Governor hi hmuin an hmalakna te an hrilhfiah bawk a ni.

Mizoram Fire and Emergency Services-te chhinchhiah danin nikum 2024 chhung khan Mizo-ram chhungah kangmei tum 113 a chhuak a, hemi hun chhung hian ramkang hmun 45-ah a awm a, In kang 40 awmin lirthei leh thildang kang 28 a awm a, kangmei chhuak avang hian mi pakhat in nunna chanin bungrua leh In kangral hlutna hi Rs. 942,24,322 hu a ni. Fire and Emergency Services hotute chuan kangmei laka kan him tlan theihna atan mitin ten In chhuahsan hma leh zan mut hmain kangmei tichhuak thei thil a awm leh awmloh enfel hmasa tur leh kangmei tichhuak thei thildang laka fimkhur turin an chah a ni.

Health & Family Welfare Minister Lalrinpuii chuan nimin khan Mara Autinomous District Council (MADC) tlawhin Chief Executive Member (CEM) M Laikaw leh a thawhpuiten an lo dawngsawng a, Health Minister chuan MADC hotute chu Kumthar chibai bukin Siaha District mipuite tan theihtawp chhuah puiah a sawm a, Siaha District chhungaa department hnuaia Project hrang hrang hmalaknate tarlangin, hmasawnna rotling thlentu a nih ngei a beisei thu a sawi a. An mamawh te theihtawpa ngaihven pui tur leh hmalakpui zel a tum thu sawiin, Project an thehluh turte pawh a bawhzui pui zel tur thu a sawi bawk.

Mizoram Larsap General (Dr) Vijay Kumar Singh chuan Mizoram Legislative Assembly 9-na thutkhawm vawi 4-na leh Budget Session ni bawk chu thla thar February 19 chawhma dar 10:30 atanga neih turin a ko a. Session neih in a awh rei zawng leh hun hman dan tur chu Assembly Speaker kaihhruai BAC thukhawm in an la ngaihtuah dawn a ni.

Commerce and Industries Department Commissioner leh Secretary Dr. Lalzirmawia Chhangte chuan ni hnih awh tur 'CPSE Level Vendor Development Programme cum Industrial Exhibition' chu nimin khan Aizawl-a Vanapa Hall-ah a hawng a, Entrepreneur-te chu ram vengtu sipaite tih loh ah mi huaisen berte an nih thu a sawi bawk. He hun hi CPSU leh MSE-te inkara thawhhona tha leh chak zawk siam a nihna tura buatsaih a nih bakah sumdawngte leh anmahni dawrtute'n sawrkar Department hrang hrang leh MSE-ten an siamchhuah phochhuahna hmun leh hun siamsak niin, Vendor Registration Process hrilhfiahna hun hman a ni bawk.

National Health Mission buatsaihin ‘National TB Elimination Programme’ hmalakna hnuaiah nimin khan Aizawl-ah Helen Lowry Higher Secondary School NSS Unit te nen ‘TB Awareness Rally’ neih a ni a, National Health Mission (NHM)-a Mission Director Dr. Eric Zomawia chuan a vailiam a ni.

Mizoram Journalists' Association (MJA) Mamit District chuan nimin khan Annual Conference vawi 17-na hmangin Mamit DIPRO Biak-nungi chuan khuallian niin a hmanpui.

Sericulture Department changtu Secretary Florence Zotluangpuii hovin nimin khan Sericulture Department a thawk Officer ten Silk Samagra 2 hnuaia Project an thawh mek chungchang an sawiho.

Mizo Students’ Union (MSU) General Hqrs. hruaitute chuan nimin khan Chief Minister Lalduhoma chu a Pisa-ah hmuin kumin-a School hawn hun a pelh tawh hnu thlenga mahni hnathawhna hmuna awm tha duhlo Zirtirtu report an dawn chungchang te, Zirna In-a Zirtirtu semrual a tul thu te, zirna In engemawzat chu thawmthat a pawimawh tawh takzet thu te an thlen a. Mizo zirlaiten hma an sawn zel theih nan leh harsatna nei lova zirna an kalpui theihnan chak zawka hma lakpui turin a ngen bawk. MSU chuan mahni hmun-a awm tha duhlo Zirtirtu dapchhuah hna an thawh mek thu sawiin, Zirtirtu hetianga lo awm an awm chuan dan anga hremna an chunga lekkawh anih hma ngeia lo insiamrem turin an hriattir bawk.

International Fund for Agricultural Development (IFAD) bultum Fostering Climate Resilient Upland Farming Systems in the North East (FOCUS) Mizoram hnuaia hlawhtlinna (Project Completion Report) thlirletna chu nimin khan Taxation Auditorium, Aizawl-ah neih a ni a, he hun hi Chief Secretary Khilli Ram Meena chuan hmanpuiin Loneih chu Mizoram a mipui, abikin Zokhaw lama cheng mi tam berte eizawnna a nih avang leh Agriculture chu ram economy innghahna bulpui ber pakhat a nih avangin, Agriculture lama hmasawnna chu a pawimawh hle tih a sawi a. Sawrkar hmalakna ah te pawh Agriculture hmasawnna leh loneitute hamthatna kaihhnawih Scheme-te chu uar lehzuala kalpui tula a hriat thu a sawi bawk. He hunah hian Mizoram-a FOCUS hmalakna hrang hrangte sawihona neih a ni.

Mizoram Chemists & Druggists Association (MCDA) chuan nimin khan thuchhuah siamin damdawi zuarte harsatna Chief Minister-in a chinfel sak tih an tarlang.

ZPM President Lalliansawta chuan Pathian in an Party zawm thar duh a pe zel chu an lawm hle tih a sawi.

MNF Vice President Lalchhandama Ralte chuan ZPM chu a thlang tlingtu mipuiin an nin tan mêk thu a sawi.

Mizo Zirlai Pawl (MZP) General Hqrs. hruaitute leh Thangram Indigenous Peoples' Movement (TIPM) hruaitu chuan nimin khan Chief Minister Lalduhoma chu a Office-ah hmuin Thangram dinhmun hrang hrang an sawiho a, Mizoram chhungah Thangram rinluh a nih theihna tura hmalak pui turin Chief Minister hi an ngen bawk.

Chhuanthar Tlangnuam Village Council Inthlan chuh tura Nomination File mi 4 te chu an inhnuh-dawh avangin ZPM Ticket-a ding te chu chuhtu awm lovin tling-ah puan an ni a, he VC-ah hian seat 5 awmin General Seat 4 chuh turin ZPM 4 bakah Congress leh Independent atangin mi 2 ve ve leh Reserved Seat chuh turin ZPM atangin mi pakhat in Nomination an file a. MNF chuan sawrkar dinglai an ken thu lo sawi tawhin nimin khan Congress leh Independent atanga hming pelut te hi an inhnuhdawh leh avangin Vote thlak ngai lovin ZPM Candidate te hi tling ah puan theih an ni.

Nimin khan Serchhip-ah District Bawrhsap Paul L. Khuma hovin National Highway-54 zauh leh cheithat hna thawktu Contractor te leh Official ten an hnathawh thlirletna leh hmachhawp te sawihona hun an hmang.

Serchhip District Bawrhsap Paul L. Khuma chuan Inkalpawhna kawng tha neih chu sawrkar chuan a ngai pawimawh em em tih a sawi.

Govt. Serchhip College NSS Unit te chuan nimin khan damlo a mamawh apiangte hman turin District Hospital Serchhip Blood Bank-ah thisen Unit 17 an pe a, thisen petute hi mipa 14 leh hmeichhia pathum niin Serchhip Blood Bank-ah kalin thisen hi an pe a ni.

Serchhip District Magistrate Paul L.Khuma chuan thuchhuah siamin Serchhip District chung khaw hrang hrangah dan kalha kuhva phur lirthei an kal thin tih hriat a nih thu tarlangin, Serchhip District chhunga dan phal loha kuhva phurh a lo rem theih nan Section 163 of Bharatiya Nagarik Suraksha Sanita, 2023 tlawhchhanin Serchhip District chhungah dan lova kuhva lakluh leh phurh khapna thupek a tichhuak a. He thupek hian thu leh a awm hma chu chhuah a nih, January 26, 2025 atanga thla hnih (2) chhung a huam dawn a ni.

Mizoram Sawrkar-a Home Department in a tihchhuah, Approved List of Mizoram Gorkhas, 2021 a chuang siamthat ngai te chu felfai zawka lehkha a kal theih nan Deputy Commissioner, Serchhip District hnenah dilna thehluh thin tawh tur a nih thu nimin khan thuchhuah siamin Serchhip District Bawrhsap Paul L Khuma chuan mipuite a hriattir a. Dilna thehlut turte hian mahni Electoral Photo Identity Card (EPIC), Aadhar Card, Birth Certificate leh mahni awmna Village Council te hriatpuina la in dilna hi an thehlut thin tur a ni a. Uluk taka enfiah a nih hnuah Home Department-ah thawn thin a ni ang. He hriattirna hian a chunga tarlan Notification-a chuangte detail siamthat chauh a huam dawn a ni.

Lawngtlai District Bawrhsap Cheemala Siva Gopal Reddy IAS chuan tunhnai khan a Office-ah NHIDCL hotute ko in Lawngtlai by-pass road-a Parapet chungchang a sawipui a. NHIDCL chu mipuite tan a kawngpui tha tak siam tur an nih lai a, an hnathawh sawisel a ni fo chu pawi a tih thu a sawi a, tun hnuah tha leh rintlak tak a hna thawk tawh turin a hrilh a. NHIDCL hotute chu an hnathawh uluk tur te, tha, rintlak leh daihrei zawka hnathawk turin a chah bawk.

Border Security Force (BSF) 163 Battalion-te chuan nimin leh niminpiah khan India leh Bangladesh inrina depa khaw pathum Khojoysury, Naya Basti leh Letisury khuaah te Civic Action Programme kaltlangin thilpek chi hrang hrang an sem a, zirlaiten an mamawh thil chi hrang hrang bakah infiamna hmanrua thahnem tak chu a dawng tura thlanchhuahte hnenah an hlan a ni. Civic Action Programme hun hmannaah hian BSF Assistant Commandant RK. Yadav leh Satyam Raj ten thilpek chi hrang hrang semchhuah pahin, ramri ralmuanna chu BSF sipaite mai ni lo, mipuite kut-ah thui tak a innghah tel avangin remna leh muanna vawnnun kawngah theihtawp chhuah turin khawtlang hruaitute, zirna In-a thawktute leh mipui kalkhawmte an sawm a ni.

Kumin ah African Swine Fever (ASF) hri leng avangin Mizoram-ah Vawk thi leh suat a la awm lo. AH&Vety Department hotute sawi danin kumin kum bul January ni 1 hnu lamah Mizo-ram-ah ASF hri leng avanga Vawk thi leh Vawk damlo suat a la awm lo a, tun dinhmunah chuan he hri leng hi a reh rih niin a lang a ni. Mizoram hi ASF hian kum 2021 bul lam atang khan luhchilhin kumtin he hri hi a leng ta ziah a, kum 2021 March ni 21 a Lunglei District-a Lungsen khua a ASF hri a leng tih hmuhchhuah a nih atanga nikum kum tawp lam thleng khan Vawk 62,761 thi tawhin Vawk 49,267 suat a ni tawh bawk a ni.

Mizoram Public Service Commission in Disaster Management & Rehabilitation Department hnuaia District Organiser (Contract Basis) leh Food Civil Supply & Consumer Affairs Department a Junior Accounts Officer exam a buatsaih tur chungchangah MPSC Secretary H. Lianzela chuan nimin khan Lunglei-a Exam buaipuitu turte tan briefing a neihpui a, Lunglei-a Exam Centre-ah hian heng hna atana exam tur hi mi 350 an awm a ni.

Mizoram District 9-a Village Council leh Local Council-a inthlanna thla thar February 12-a neih tur chuh tuma hming pelut te tana inhnuh-dawh theih hun chu nimin tlai dar 3:00 khan a tawp a, inhnuhdawhna hun a tawp hnu hian Candidate te hi an Symbol tur pek nghal niin hemi hun tawp thlenga inhnukdawk lo te chuan inthlanna hi an chuh thei dawn ta a ni. Hetihlai hian VC Inthlan tum te chuan Veng hrang hrangah ngawrh takin Campaign an nei chho mek a ni.

Local Administration Department (LAD) Minister C. Lalsawivunga chuan Mizoram sum dinhmun thlir chunga hun an ruat ah Village Council leh Local Council Inthlan an beisei thu a sawi.

MNF Treasurer Lalruatkima chuan dan kalha a hun hmaa inthlanna buatsaih chu mipui rorelna (Democracy) kalphung zah lohna leh pawngsualna nasa tak a tlin thu a sawi.

BJP Mizoram-a State Core Group Member Dr. K. Beichhua MLA chuan BJP chu Manifesto anga Mipui tana hna thawk thin party an nih thu a sawi.

Mizoram-a damdawi In lian ber leh mipui pan tam ber Civil Hospital, Aizawl (CHA)-ah nikum (2024) chhung khan damlo inentir mi 5,03,956 an awm a, an zinga 4,53,960 chu OPD a inentir niin a dang 49,996 hi Casualty (Emergency) a inentir an ni.

Aizawl Municipal Corporation (AMC) area-ah kum sarih kalta (2018-2024) chhungin lirthei chesual vangin mi 107 an thi a, hliam 125 an awm bawk.

Adviser to Chief Minister, TBC. Lalvenchhunga chuan Indian Air Force (IAF) kuta Lengpui Airport hlan a nih chuan Full load a thlawhna tum tir theih tura thuamthat a ni dawn a, hei hi mipuiten an chhawr tangkai zawk dawn tih a sawi.

Lawngtlai Chandmary leh Electric Veng inkalpawhna tur kawng chu nimin khan laih tan niin LADC-a Chief Executive Member (LAD) C. Lalmuanthanga hovin he kawng laih hna hi bul tan a ni a, he kawng hi Kilometres 2 vel a thui tur niin Multi Modal kawng tia hriat lar, National Higway 502A chungah sial a ni dawn a, a laih hna hi a thlawnin HNIDCL, PMPL leh ABCI ten an thawk dawn a ni. He hunah hian LADC-a CEM chuan kawngin a tihchhiat tura ram neitute inpekna fakawm a tih thu a sawi bawk.

Kangmei venna Hapta, Fire Prevention Week 2025 chu kumin hian February 10-15, 2025 chhung khian hman leh a ni dawn.

Mizoram Larsap Gen. ( Dr) Vijay Kumar Singh chuan nimin khan Mizoram-a tlawmngai pawl, YMA, MHIP leh MZP hruaitute chu Raj Bhavan-ah kawmin Mizoram hmasawn nana pawimawh leh tul hrang hrangte a sawipui a, tlawmngai pawl te thu thlen hrang hrang chu a theih anga a bawhzui tur thu a sawi a ni.

Mizoram District 9-a Village Council leh Local Council Inthlanpui neih tur chuh tuma hming pelut te tana inhnuhdawh theih hun chu Vawiin tlai dar 3:00 hian a tawp dawn ta.

Republic Day vawi 76-na chu Aizawl Sipai Lammual-ah nimin khan hman niin Larsap Gen. Vijay Kumar Singh chuan Hman puanzar pawtpharhin Parade Contigent-te zahna chibai buk a chhang let a ni.

Thla thar February ni 12-a Village Council (VC) inthlan lo awm tur atana hming pelut mi 6,942 te hming pek luh chu endik hnu-ah pawm a ni.

India Republic Day vawi 76-na chu nimin khan ramchhung hmun hrang hrangah urhsun taka hman a ni a, Serchhip-ah pawh Republic Day hi District Bawrhsap Paul L. Khuma hovin Serchhip Sports Complex-ah hman niin Bawrhsap hian Hnam Puanzar pawtparhin Parade Contingent te chibai buk chu a chhanglet a ni.

Republic Day lawmna chi khat atana buatsaih Volleyball Tournament chu Inrinni khan khelh zawh niin Hmeichhia-a New Serchhip VC leh Mipa-ah Chhiahtlang VC te an Champion.

National Voters' Day vawi 15-na chu Inrinni, January 25, 2025 khan ramchhung hmun hrang hrangah hman niin Serchhip-ah pawh District Election Officer leh Bawrhsap Paul L. Khuma hovin hman a ni.

Mizoram Khawpui Fai inelna leh Swachh Survekshan inbuatsaihna atana UD&PA Department in Serchhip in Faina kawnga inelna hrang hrang a buatsaiha titha te hnenah nimin-a Republic Day lawmna ah lawmman hlan a ni a. Sawrkar Pisa Fai thlanna ah District Cooperation Office chu pakhatna niin District Jail chu pahnihna an nih bakah PHE Serchhip WATSAN Division chu pathumna an ni. School Fai thlanna ah Marian H/S chu pakhatna niin Presbyterian English School leh Hmar Veng Primary School ten an dawt a, Hospital & Health Care Fai thlanna ah Health & Wellness Centre, New Serchhip chu pakhatna niin District Hospital chu pahnihna an nih bakah Mercy Hospital chu pathumna an ni. Hotel/Guest House fai inelna ah Tourist Lodge, Serchhip chuan lawmman pakhatna lain KH Hotel, Serchhip chu pahnihna an nih bakah Jamela Hotel, Serchhip chu pathumna an ni a. Heng lawmman dawngtute hnenah hian thuziak leh pawisa fai hlan an ni.

Serchhip District chuan Mizoram khawpui Fai inelna ah lawmman pathumna a dawng.

India Republic Day 2025 lawmna nimin-a Serchhip Sports Complex-a neih ah Serchhip District Executive Force (DEF)-a hna thawklai mi pathum te chu an hnathawh that avanga ‘DGP Commendation Disc’ an dawn te Bawrhsap in a hlan a. Heng chawimawina dawngtute hi ASI R. Vanlalfinga, ASI Lalchhuanawma Pachuau leh Const. Lalhruaitluanga te an ni. DGP Commendation Disc hi Police hna thawk tha, Rank leh Seniority thliar lova pek thin a ni a, Police te hian an service chhungin tum khat chauh an dawng thei a ni.

Nimin-a India Republic Day lawmna Ser-chhip-a neih ah Parade Contingent 14 ten Hnam Puanzar chibai bukin March past an nei a, he March past hi SI H. Lalremthangpuii (MRP) leh SI Vanlalhriata (2nd Bn. MAP) te kaihhruaina hnuaiah neiin Un-Armes Contingent 4, School Contingent 9 leh Pipe Band pakhat te an ni. Heng March past nei zingah hian Unarmed Contingent-ah NCC Govt. Serchhip College Air Wing chu pakhatna niin NCC Marian H/S Air Wing chu pahnihna leh Scouts and Guides, Little Flower Convent School chu pathumna an ni. School Contingent-ah Goodwill English Academy chu pakhatna niin Brilliant Higher Secondary School chu pahnihna leh Chawngbuangi Memorial School chu pathumna an ni bawk.

India Republic Day 2025 chu nimin zing khan Thenzawl-ah pawh SDO (Civil) Complex-ah hman niin SDO (Civil) K. Lalhlimpuia chuan Hnam Puanzar a pawtparh a, he huna kalkhawm te chu Republic Day chibai bukin Indian Constitution chuan India mipuite hnenah ‘anmahni rorel saktu’ tur duhthlan theihna leh mipui sawrkar siam a nih theih nan kawng a hawng tih chu kan hriata kan chhinchhiah a pawimawh thu a sawi bawk.

Nimin-a India Republic Day 2025 lawmna chu ramchhung hmundang te rualin North Vanlaiphai Civil Sub-Division leh East Lungdar RD Block-ah te pawh hman a ni a, heng hmun ah te hian SDO (C) leh BDO Dr. Peter Malsawm-tluanga chuan India Hnam puanzar pawtparhin mipuite chibai a buk a, awrkar Department hrang hrangte hmalakna pawh a tarlang bawk.

Ministry of Home Affairs chuan India rama Civil mite chawimawina Padma Award dawng thei tur mi hrang hrang hming a puang a, heng zingah chuan Mizo pa R. Lalrawna pawh a tel a ni. Padma Award chi thum dawng turte hming hi Inrinni tlai khan tihchhuah a ni a, kumin hian Padma Vibhushan dawng turin mi 7, Padma Bhushan dawng turin mi 19 leh Padma Shri dawng turin mi 113 thlan an ni a, Mizoram atanga he chawi-mawina dawng tura thlan R. Lalrawna hi Literature and Education huang-a dawng tura thlan niin Mizo zingah Mizo thu leh hla tih hmasawnna tura thawh hlawk tak a ni a, chawimawina chi hrang hrang lo dawng tawhin nikum 2024 pawh khan Bhasan Samman award (Sahitya Akademi) a dawng tawh a ni.

January 23-25, 2025 chhunga Bangalore-a International Trade Fair neih chu Agriculture Minister PC. Vanlalruata chuan hmanpuiin he hunah hian Organic (Chemical Fertilizer tello) thlai hmanga eitur chi hrang hrang siamchhuahte phochhuah a nih bakah Buhtun (Millet) chawilarna tur campaign neih a ni bawk.

Mizoram-a zirlaite hnena Scholarship thawh thumna (3rd installment) tur chu Central sawrkar, Ministry of Tribal-in Mizoram sawrkar hnenah pawisa an la rawn pek loh avângin sem theih a la ni lo tih MZP chuan an sawi.

Mizoram in kawlphetha a lakna NEEPCO Tuirial chu Zirtawpni zan khan Lok Sabha MP Richard Vanlalhmangaiha chuan tlawhin NEEPCO hotute nen Mizoram sawrkar nen an thawhho dan leh Power man tlem zawka lakluh a nih theih dan turte an sawiho.

BJP Mizoram hruaitute chuan Inrinni khan Mizoram mamawh chawkluhna kawngpui, Sairang leh Kolasib inkar chu tlawhin harsatna awm leh hmalak mek dan te an enfiah.

ZORAM THAR LEH VC/LC INTHLAN - Rev. Dr. Zaichhâwna Hlâwndo 

Tun thla ni 21 atanga Beti Bachao Beti Padhao (BBBP) kum 10 tlin lawmna leh National Girl Child Day lawmna neih chu nimin khan a kharna hun hmangin hemi denchhena intihsiakna hrang hranga lawmman semna neih a ni.

Village Council Inthlanpui neih tura Serchhip District tana Observer tura ruat UD&PA Department-a Joint Director C. Lalduhzuali chuan Serchhip District rawn tlawhin VC Inthlanpui neih tura inbuatsaihna hrang hrang a enpui.

Serchhip District Volleyball Association in an buatsaih ‘Republic Day Volleyball Tournament’ chu Vawiin chawhma dar 11:00 hian Final khelh a ni dawn ta a, nimin-a Mipa Semi Final inkhel ah Chhiahtlang VC chuan New Serchhip VC chu 3-2 (25-17) (22-25) (25-23) (22-25) (15-12) a hnehin Darnam VC in Vengchung VC chu 3-0 (25-21) (25-21) (25-22) in an hneh bawk a, Chhiahtlang VC leh Darnam VC te hian Final hi an khel dawn a ni. Hmeichhe lamah New Serchhip VC leh Darnam VC ten Final an khel dawn bawk a ni.

Serchhip District Jail, Chhiahtlang-a thawktute chuan tunkar Ningani, January 23 khan kumthar atana inhlantharna hun hi an Pisa-a an nei a, he hun hi District Jail Superintendent C. Lalbiaktluanga chuan kaihruaiin fuihna thu a sawi bakah inhlantharna hun hi an hmang a ni. Hemi hnu hian Staff Meeting neih zui niin kum 2025 atana Mizo-ram Jail Employees Association (MJEA), Serchhip Branch hruaitu tur thlanna neih nghal a ni bawk.

Naktuk January 26 hi India Republic Day vawi 76-na a ni a, ramchung hmun hrang hrangah he ni hi urhsun taka hman tur a ni ang.

Vawiin January 25-a National Voters Day denchhenin nimin khan Serchhip DC Office chuan Govt. Higher Secondary School, Serchhip-ah ‘Voters Awareness cum Quiz Competition’ an buatsaih a, he hunah hian National Voters Day chungchang te, Inthlanna a thalaite tel ve a tulzia inzirtirna leh Voters Education chungchang te inhrilhhriatna neih a ni bawk. He Quiz Competition-ah hian Serchhip DC Office-a SDC Dr. Marilyn Lalruatkimi chu Quiz Master-ahh hman niin zirlai naupang mi 270 vel an tel a ni.

United Pentecostal Church (UPC) North East India hnuaia thalai pawl, Pentecostal Youth Department (PYD) te chuan nizan atang khan Pastor Bial hrang hrangah Bial PYD Conference an nei a, Serchhip Bial PYD Conference vawi 49-na chu Ngentiang UPC Biak In-ah neiin Serchhip Dinthar Bial PYD Conference vawi 24-na chu Hriagtlang UPC Biak In-ah neih a ni bawk a, naktuk Pathianni zan-ah an tiak ang.

Mizoram Presbyterian Kohhran hnuaia Pastor Bial hrang hrangte chuan naktuk Pathianni hmang hian Kristian Thalai Pawl (KTP) Pastor Bial Conference an hmang dawn a, nizan lam khan Bial Conference hi tanin Vawiin hian Rorelna hun hmangin chawhnu lamah hruaitu tur an thlang nghal dawn a ni. Serchhip Pastor Bial KTP Conference vawi 70-na chu Serchhip Bethel Kohhran Biak In-ah neih niin Serchhip Vengchung Pastor Bial KTP Conference vawi 22-na chu Serchhip Chhim Veng Kohhran Biak In-ah neih niin New Serchhip Pastor Bial KTP Conference vawi 33-na chu Bukpui Kohhran Biak In-ah neih a ni bawk.

Village Council Inthlanpui neih tur chuh tuma hming pekluh te chu nimin khan enfiah niin inhnukdawk duhte tan hun hawn leh mek a ni.

Indian Air Force (IAF) kuta Lengpui Airport hmunhma engemawzat Mizoram sawrkarin hlan a tum tha tih loh avanga pawl din, Lengpui Airport Forum chuan IAF kut-a Airport hlan chu mipuite tana tha lo turah ngaiin hlan lo tur leh hnukkir leh hram tura an duh thu sawiin, AAI kut-ah hlan ni zawk se an duh thu an sawi bawk.

Siaha-a Legal Metrology te chuan nimin khan Siaha khaw chhung-a dawrkai-te buhfai zawrh endikin buhfai bag pawn lama a rih zawng inziaklo leh buk diklo dawrkai 16 atangin Bag 153 an man a, karleh lamah an chungthu ngaihtuah a ni ang. Legal Metrology hian hemi hmalam hian dawrkai te chu buhfai bag pawn lama a rih zawng inziaklo chu zuar leh chah tawhlo turin lehkha in an lo hriattir tawh a ni.

Thirsakawr hmanga India ram fangchhuaktu Vanlallawmzuala Varte (Lza), Mission Veng Aizawl chuan India ram a fanchhuahna hmanrua leh thuamhnaw bakah India Book of Records a Record pahnih a siamna Certificate leh Medal te chu nimin khan Mizoram State Museum-a mipui en theih turin Art & Culture Department Director Carol VLMS. Dawngkimi hnenah a hlan a. India Book of Records-a Mizo hming chuang hmasa ber Vallallawmzuala Varte (Lza) hian nikum January ni 25 khan Aizawl chhuahsanin November ni 5 khan Aizawl a lo thleng leh a ni. Lza Varte hian India Book of Records-ah record pahnih - India ram thirsakawr hmanga State tin leh Union Territories tlawh chhuaka hun hmang reilo ber record leh kawng chho tlan hnem ber record a siam a ni.

Zo Re-Unification Organisation (ZORO) Thalai Hqrs. President Michael Lalramsanga chuan nimin khan Aizawl Press Club-ah thuthar thehdarhtute kawmin ZORO chu Political Party a nih loh thu leh khawvel hmun hrang hranga awm Zofate kan insuihkhawm a, lungrual taka kan awm a, rorelna pakhat hnuaia kan awm lehna tura beitute an ni. tih a sawi a. India Sawrkar in Free Movement Regime (FMR) a thiah leh India-Myanmar border hung a tum duhloh lantir nan January 29, 2025 khian khaw hrang hrang ah Sawrkar laipui thupek leh Mizoram Sawrkar thupek te an hal dawn thu a sawi bawk.

BJP Mizoram chuan nimin khan Aizawl-a an Party Office-ah Friday Political Session neiin he huna thu sawitu State Core Group Member Dr. K. Beichhua MLA chuan thalai tam tak leh mi vengva tak takte chuan BJP chu Political Party pakhat ve mai a nih hriain hlauh en in an en tawh lo tih a sawi a, “Sawrkar kal tawh leh Sawrkar mek te en hian Mipui rintlak Sawrkar kan duh tih a chiang tawh,” a ti bawk.

Mizoram Pradesh Congress Committee (MPCC) chuan nimin khan Aizawl-a Congress Bhavan-ah Friday Political Session neiin MPCC Sr. Vice President Lalnunmawia Chuaungo chuan Local Council leh Village Council inthlan lo awm turah tan an lak a ngai tih a sawi a, “Congress party hi miten a tak taka thawk thei tur kan ni tih an hre chho mek a ni. Tunah pawh ram hmangaihtu mithar tha tak tak ten min rawn zawm mek a ni. Heng kan mithar te hi kan party min tichak turin MPCC hmingin lawm takin ka lawmlut a ni,” a ti bawk.

MNF Party chuan nimin khan Aizawl-a Mizo Hnam Run-ah Inkhawm neiin he huna thu sawitu Rajya Sabha MP K. Vanlalvena chuan MNF party chu Mizo Nationalism keng nung tura Pathian hruai an nih thu a sawi a, Chief Minister-in USA a zin naa a thu sawi (Mizo Tribe tih leh Mizo Nation) tih kal zelah kan Chief Minister chu a thusawiah ding tlang ngam tur leh Ramdanga a thusawi chu hre ngei se an duh thu sawiin, India ram chhung kan chenpui mek te ah phamar leh sawimam mai lo turin a ngen tih a sawi a, “A rûk a lo Nationalist a tul lo, India mipuite mithmuh ngeiah Nationalist a tul,” a ti bawk. He hunah hian MNF President Zoramthanga chuan Local Council leh Village Council Inthlan thuchah tlangzarhna hun a hmang bawk a ni.

Supply Minister B.Lalchhanzova hovin nimin khan a Pisa-ah Supply Department hotute leh Mizoram State Food Commission Member ten National Food Security Act, 2013 chungchang an sawiho.

Mizoram Truck Owners Association (MTOA) leh Mizoram Truck Drivers Association (MTDA) te chuan Vairengte leh Sairang inkar kawng chhiat avang nimin zing atanga an tlan loh hnuah zanin dar 6:30 atang khan an tlan leh tan ta a, Sawrkar in hma laa Kawnpui leh Khamrang inkara kawng chhe zual hnawh a nih tak avang leh kawng an la siam that zel dawn avang a tlan leh an rel thu an sawi a ni.

Fostering Climate Resilient Upland Farming System (FOCUS) Project chu a lo tawp dawn tak avangin nimin khan Serchhip-ah FOCUS Exit Strategy Meeting neiin kuthnathawktute tana FOCUS Project hnuaia hmalakna hrang hrangte chu Farmer Interest Group (FIG) te hnenah hlan a ni.

Thla thar February 12-a Village Council Inthlanpui neih tur chuh tum te tana hming pekluh theih hun chu nimin tlai khan a tawp ta a, heng hming pelut te hi Vawiin hian an Nomination paper enfiah a ni ang.

State Election Commission, Mizoram chuan Village Councils Inthlanpui 2025 lo awm tura Duty tura ruatte - Persons on Election Duty (PED) te tan vote thlak dan tur a ruahman a. Hemi ang hian Serchhip District chhunga Election Duty tura ruat te chuan Vote thlak dilna, Form 21 chu District Election Office, Serchhip District-ah la in thehluh leh tur a ni dawn a ni. Sawrkar in ruahmanna a siam dan chuan District chhunga vote nei, Election Duty tura ruatte tan February 7, 2025 aia tlai lovah Form 21 hi thehluh tur niin February ni 6 atanga ni 8 chhungin Vote thlak theih a ni dawn a. District pawna vote nei, Election-a duty tura ruat te chuan February 1, 2025 aia tlai lovag Form 21 hi thehluh tur niin February 6-ah Vote hi thlak tur a ni dawn thung a. Vote thlakna hmun hi DC Office, Serchhip-ah siam a ni ang.

Naational Girl Child Day 2025 leh Beti Bachao Beti Padhao (BBBP) kum 10 tlin lawmna puala kawngzawh chu nimin khan Serchhip-ah neih a ni.

Serchhip District Volleyball Association (SDVA) buatsaih Republic Day Volleyball Tournament khelh mek chu Vawiin hian Semi Final khelh a ni dawn.

Thla thar February 12-a Village Council Inthlan neih tura Congress party in Serchhip-a an Candidate turte chu nimin khan an puang.

Mizoram Board of School Education (MB-SE) chuan kumin a pawl 10 zirlaite tana High School Leaving Certificate (HSLC) Exam neih turah Practical Exam hun atan Febraury ni 5 ruat a nih thu tun thla ni 17 khan thuchhuah siamin a tarlang a. Hemi hmalam nikum Nov. 4 khan MBSE hian HSLC Exam neih hun tur a tihchhuah ah Practical Exam hi Feb. 12-a nei turin ti mah se VC/LC Inthlan neih a ni dawn avangin sawn a ni.

Mizoram Truck Owners Association (MTOA) leh Mizoram Truck Drivers Association (MTDA) te chuan Vairengte leh Sairang inkar National Highway kawng chhia avangin nimin atang khan an lirthei te an dintir a, MTOA Secretary Dina Tlau chuan nimin khan PWD Minister hova kawng chhe zual  ngaih pawimawh hmasak te sawiho a nih thu sawiin, beiseina sang tak an neih thu a sawi a ni.

Mizoram Police leh Excise & Narcotics Department te chuan thla kalta December 2024 chhung khan Rakzu litre 4709.88 zet manin zu bilhlai Tin 4139 an man a, Zurui mi 64 manin Zu zuar mi 473 an man bawk a ni. Thla kalta chhung vek khan Sapzu (IMFL) Um puitling 1216 an man a, a chanve Um 1552 leh ml 180 chi um 3375 an man bawk a, Beer um 8 an man bakah Canned Beer 5912 an man bawk. Hemi hun chhung vek hian BEDC litre 539 manin rampawn atanga lak Zu um 47 leh Beer can 1196 an man bawk a, Zu sakna atana hman Bel 98 manin lirthei 10 an man bawk a ni.

Nimin khan Kolasib District Horticulture Office buatsaihin Kolasib Venglai Bazar building-ah ‘Horticulture Fair cum Exhibition 2025’ neih a ni a, he hun hi Kolasib DC Robert C. Lal-hmangaiha chuan khuallian niin a telpui a, Kolasib chu leilung behchhana eizawngtute puihna kawngah sawrkar in hma a la nasa a, heng te avang leh kuthnathawktute thawhrimna avangin Kolasib District chu thei leh thlai tharchhuah lamah hma a sawn takzet tih a sawi a ni. He Exhibition-ah hian Stall hrang hrang 17 awmin Horticulture kaih-hnawih thil siamchhuah hrang hrang te, thlai thar-chhuah te bakah thlai enkawlna lam te, pangpar leh plant chi hrang hrang te phochhuah a ni.