Lenkawl

National Highway-54 laihzauh leh siamthat hna thawh meka Serchhip District chhung khaw hrang hranga zangnadawmna la tawh, mahni In leh bungrua leh senghawi lo te chu naktuk, January 31, 2024 khian Magistrate te kaih-hruaina hnuaiah thiah saka an bungrua te senghawi sak an ni dawn.

Serchhip Mat Phai Zau pali (4) kawlphetha pek hna thawh chu zawhfel a ni tawh a, tunah hian Zau pathum (3)-ah kawlphetha pek hna hi thawh leh mek a ni.

Mipa leh Hmeichhe inkar zau lutuk tihtlemna tura hmalakna, ‘District Level Launching of Community LED Campaign Against Gender Discrimination’ chu nimin khan Mizoram State Rural Livelihoods Mission, District Rural Development Office, District Mission Management Unit (DMMU) Serchhip District buatsaih Serchhip P&E Veng YMA Hall-ah neih a ni.

Azawl-Thenzawl-Lunglei (ATL) kawngpui siam leh cheithat hnathawh mek chu nimin khan PWD changtu Minister Vanlalhlana chuan a hmunah a tlawh.

Serchhip District-a Fisheries Department chuan kum kalta chhung khan PMMSY hnuaiah Sangha Dil thar laihna atan tanpuina sum mi 182 hnenah semin Sangha khawilenna Dil (rearing pond) laihna tur mi 100 hnenah an pe a. Sangha note khawi lenna tur Dil thar siamna tur mi 82 hnenah pein, mi 651 hnenah Sangha chaw tha leina tur Rs. 1200 theuh an pe a, Sangha Dil nei te hnenah Sangha note 70% subsidy pek an ni bawk.

Mizo Zirlai Pawl (MZP) General Hqrs. hruaitute chuan nimin khan Chief Minister Lalduhoma chu a Pisa-ah hmuin Free Movement Regime (FMR) thiah tumna leh Myanmar hung tumna awm chu theihtawp chhuaha dodal tlat an tum thu leh a tawp thlenga an hmalakna thlawp zel turin an ngen a. Chief Minister chuan, Prime Minister leh Union Home Minister te hnenah FMR thiah tumna leh ramri hung tumna awm chu a duh loh thu a thlen tawh thu a lo hrilh a ni.

MNF Party chuan nimin khan Aizawl-a Mizo Hnam Run-ah Chhung Inkhawm neiin MNF Adviser Lalchhandama Ralte MLA chuan sawrkar thar chuan sawrkar hmasa hmalakna a nih vang ringawtin thil tha hnawl lo se a duh thu sawiin, til tha ah chuan an thlawp zel tur thu a sawi a. “SEDP hnathawktute sawrkarin a chhawr zui zel hi a lawmawm a. Chutih rualin, an kal zel dan tur leh engtin nge hma an lak zui dawn tih hi ka zawt a ni,” a ti bawk.

Mizoram Science, Technology & Innovation Council (MISTIC) buatsahin nimin khan ni khat awh Japanese pa ‘Shiitake’ leh Oyster Pa khawi dan leh UV hmanga heng Pa a Vitamin D tihpun dan zirhona chu Directorate of Science and Technology Conference Hall-ah neih a ni a. He hunah hian MISTIC in kum 2021 atanga a lo thawhpui tawh CSIR-IHBT Senior Scientist Dr. Rakshak Kumar chu Resource Person atan hman niin MISTIC te bakah Science and Technology peng hrang hranga Officer te an tel a ni.

India Sawrkarin Burma leh India ramri hrul a zalen taka inkawlpawh theihna dan, Free Movement Regime (FMR) tihtawp a tum leh India leh Burma hrul ramri hung a tum chu ZO Reunification Organisation (ZORO) chuan tha lo an tih thu leh an duhloh thu an sawi a. India Sawrkar chuan Zofate hi min thendarh a tum ni ah an ngaih thu sawiin, he hmalakna hi an dodal zel dawn thu an sawi a. He hmalakna an duhloh zia lantir hian nimin khan Aizawl-ah Uion Home Minister Amit Shah-a Lim chu an hal bawk.

Nimin khan Champhai-ah District Consultative Committee chu an Chairman leh District Bawrhsap James Lalrinchhana hova thukhawmin Champhai District chhunga Bank hnathawh hrang hrang thlirho a nih bakah mipui tana tangkai zawka hmalakna tur sawiho a ni a. September 2023 Quarter thlenga Bank hrang hrangte Deposit belhkhawm chu cheng nuai 53449 niin, Advance-ah (loan) cheng nuai 36,491.22 pek a ni bawk a. Heti hian Champhai District Credit Deposit Ratio chu 68.27% a ni. Champhai District Chest Branch chu Mizoram Chest Branch pakua (9) zingah Cash Currency intodelh awmchhun a ni a, tuna Currency Chest an neih hian a dawl zawh tawh loh avangin Reserve Bank of India chu Strong Room lian zawk leh Retention Limit sang zawk ngaihtuah tura ngen a ni.

Mizoram Information Commission (MIC) chuan din a nih, kum 2006 atangin RTI hmanga zawhna 27,000 chuang a dawng tawh. MIC hotuten nimin-a an Pisa-a thuthar lakhawmtute an kawmna ah Chief Information Commissioner John Neihlaia chuan RTI zawhna lut zawng zawng atanga zaa 98 chuang chu complaint chhunzawm lo a chinfel theih a ni tih sawiin, Local body Village Council leh Local Council pawh Public Authority-ah rinluh tel niin RTI zawh ve theih an ni tih a sawi a; hei hi mipuiten an la hre tawk lova a hriat thu a sawi bawk.. Hei bakah hian sawrkar Department website-a dah ngei tur dah leh dah loh vilzui kawngah thawktute pui a, hriattir thin turin a chah bawk. MIC tarlan danin RTI dan hnuaiah MIC din kum khan SPIO mi 3 te chu dan an zawm kim loh avanga pawisa chawitir an ni tawh a, Department 40 chuang chu an hmalakna an tarlan that tawk loh avangin vaukhanna ek an ni tawh bawk.

Sawrkar kumthar 2024- 2025 Budget-ah ‘Bana Kaih’ (Hand holding policy) kalpuina atan sawrkarin cheng vbc. 150 a dah dawn.

ZPM Working President leh Home Minister K. Sapdanga chuan nimin-a ZPM in Aizawl-a an Office-a Chhung Inkhawm an neih ah Chief Minister-in sawrkarna an siam tirhah ni 100 chhunga thawh tur a puan chu bul an tan nghal thu a sawi a, “MLA thar ten Motor a thlawna cheng nuai 10 an dawn theih chu tihtawp a ni a, second 1 chhungin cheng nuai 400 kan hlep nghal ringawt mai a, Chief Minister tiamin Minister ten Car pakhat leh support car pakhat chauh kan kawl ta a ni,” a ti a. Minister leh MLA-ten thawktu leh an dawn theih tam tak a zat ve a tihhniam a nih thu leh Office leh Bangla bungraw thar lei rih rih loh niin sawrkar kumthar tur chu Year of Consolidation-ah puan a nih thu a sawi bawk.

Social Welfare and Tribal Affairs, Women & Child Development Department buatsaihin nimin khan Mizoram Kohhran hrang hrang Hmeichhe hruaitute leh Mizo Hmeichhe Insuihkhawm Pawl (MHIP) General Hqrs. chuan Kohhran leh Inchhungkhur theuh a ruihhlo dona kawnga hmalak dan tur leh enkawl dan tur zirhona leh inrawnkhawmna Aijal Club Conference Hall-ah an nei.

Agriculture Minister PC. Vanlalruata chuan Agriculture Department hming chu ‘Agriculture & Farmers' Welfare Department’ tia thlak tuma hma lak mek a nih thu a sawi.

Kan ram lui-a nungchate an lo inthlahpun zel theih nan leh awmze nei leh tha zawka humhalh a nih theih nan Fisheries Department leh Central YMA te chuan nimin khan kum hnih chhung atan Thawhhona Thuthlung an ziak.

Zirlaite’n mahni inringtawk tak leh nuam ti taka Exam an hmachhawn theih nana Prime Minister Naredra Modi-a’n ruahmanna a siam, ‘Pariksha Pe Charcha’ chu nimin khan Bharat Madapam, ITPO, New Delhi-ah neih a ni a, he hun hi Mizoram atang pawhin Video Conference kaltlangin Zirlaite, nu leh pa te, zirtirtute leh School Education official te chuan Aizawl-a Govt. Mizo H/S Multipurpose Hall a\angin an lo chhim a, he hun hi Governor Dr. Hari Babu Kambhampati te nupa chuan an hmanpui a ni.

Mizoram Rajya Sabha MP K. Vanlalvena chuan kar kalta Niliani a\anga Inrinni chhung khan Mizoram chhim lama Myanmar ramri dep khaw thenkhat tlawhin Mara District leh Lai District-a Model Village pahnih Phura leh Pang khua te a tlawh nghal bawk.

Inrinni kalta khan Thalai Kristian Pawl (TKP) Thenzawl te chuan Serchhip Blood Bank-a dah turin thisen unit 37 an pe a, heng mi tlawmngai te thisen la tur hian Serchhip atangin Blood Bank-a thawktute an kal a ni.

Thenzawl ram, Lamlian dung zau-a Dragon Fruits chingtu pawl, Thenzawl Dragon Fruits Growers & Marketing Society chuan Inrinni khan General Assembly vawi 3-na hmangin he hun hi Bialtu MLA leh Chief Minister Lalduhoma chuan khuallian niin a hmanpui a ni.

Serchhip District Court-ah kum kalta 2023 chhung khan thubuai ziahluh Criminal Case 286 leh Civil Case 187, a vaiin 473 a awm a, heng zingah hian Ccriminal Case 205 leh Civil Case 128, a vaiin Case 333 te chu chinfel a ni. Nikum chhung vek khan Lok Adalat thutkhawm vawi 4 neiin thubuai 278 chinfel a ni bawk.

Serchhip District Tennis Association (SD-TA) buatsaiha Leisekawt Tennis Court-a khelh ‘Republic Day Tennis Tournament 2024’ chu Inrinni khan Final khela zawhfel a ni a, Men’s Singles Final-ah Vanlalrinliana chuan K. Vanlalawmawia chu 7-6, 7-6 a hnehin a Champion a, Men’s Doubles Final-ah C. Hmingsangzuala leh Lalremruata te tangdun chuan K. Zoremsiama leh Jonathan Lalnunsiama te tangdun chu 8-7 a hnehin an Champion bawk a ni. He Tournament-ah hian Players 14 telin kar kalta Thawhtanni atang khan khelh tan a ni.

Kum 2023-2024 Academic Session chhung hian Samagra Shiksha hnuaiah Serchhip District-a zirlai naupang 4998 te hnenah a thlawnin Zirlaibu sem a ni a. Sawrkar School naupang 3700 te hnenah a thlawna Uniform sem a nih abkah zirlai naupang 7429 te hnenah Midday Meal chu buatsaih mek a ni bawk. Heng bakah hian Zirlai naupang rualbanlo ten tha taka School an kal theih nan naupang 20 hnenah Escort Allowance pek an ni a, naupang 20 hnenah Transport Allowance pek niin, Braille Stationery Material chu naupang 3 pek an ni a. Hmeichhe naupang 94 hnenah Stipend for Girls pek a ni bawk. Heng bakah hian ICT and Digital Initiatives hnuaiah Elementary School 13 leh Secondary School 5 hawn niin Computer Set kim leh Zirtirtu pek an ni.

UPC North East India Aizawl East District huamchhunga Pastor Bial hrang hrangah nimin Pathianni hmang khan Pentecostal Youth Department (PYD) Bial Inkhawmpui chu neih a ni a, Serchhip Bial PYD Inkhawmpui vawi 48-na chu New Serchhip Kohhran Biak In-ah neih niin thupui atan ‘Tunlai thil awmzia’ tih chu hmangin Speaker atan Evan T. Vanlalruata chu hman a ni. Serchhip Dinthar Bial PYD Conference vawi 23-na pawh Bungtlang Bazar Biak In-ah neih a ni a, Speaker atan Tk. HK. Lalhmangaiha chu hman a ni bawk.

Mizoram Presbyterian Kohhran hnuaia Kris-tian Thalai Pawl (KTP) Pastor Bial Inkhawmpui chu nimin Pathianni hmang khan Pastor Bial hrang hrangah neih a ni a, KTP Bial Inkhawmpui hi kar kalta Zirtawpni atang khan neih niin Report hrang hrang ngaihthlak niin Inrinni khan Rorel Inkhawm neiin hruaitu thlanna an nei a, Inrinni zan atangin Pathian Biak Inkhawm neiin nizan khan khawpui hi a tiak a ni. Serchhip Pastor Bial KTP Inkhawmpui vawi 69-na chu Hriangtlang Kohhran Biak In-ah neih niin Serchhip Vengchung Pastor Bial KTP Inkhawmpui vawi 21-na chu Serchhip Dinthar Kohhran Biak In-ah leh New Serchhip Pastor Bial KTP Inkhawmpui vawi 32-na chu New Serchhip Kohhran Biak In-ah te neih a ni bawk.

Nimin January thla a Pathianni hnuhnung ber kha Baptist Church of Mizoram (BCM) ni pawimawh ‘Phar pual Pathianni’ a nih angin BCM hnuaia tualchhung Kohhran hrang hrangte chuan urhsun takin an hmang a. The Leprosy Mission chuan ramchhungah Phâr enkawlna Hospital 14 nei mekin Phar enkawl dam te tan Vocational Training Centre 6 leh Mercy Home 5 a nei mek bawk a ni.

Rural Development Minister Prof. Lalni-lawma chuan Zirtawpni kalta khan Union RD Minister Giriraj Singh chu kawmin MGNREGS (Ni 100 inhlawhna) December leh January hlawh la lut lo te release thuai turin a ngen bakah March thla thlenga Wage Component chhut chhuah sa te pawh a hun taka release a nih theih nan ruahmanna siam sak turin a ngen nghal bawk

Inrinni kalta khan 20th Assam Rifles, Southern Mizoram leh Central Young Lai Association Hruaitute chuan Mizoram chhimlam leh khaw-thlang lama Border Area Duty chungchangah thawhho dan tur an sawiho a, Mizoram chhungah rampawn atanga Drugs tawlhruk leh Smuggling kalpui thin an tih hriat a nih avangin ramri-a lut leh chhuak te uluk lehzual a endik thin nise an ti.

Tunhnaia PAMRA in Lunglei leh Mamit District chhung hmun thenkhatah Bangladesh Chittagong Hill Tracts-a Chakma helpawl te an training mek anga thuchhuah an siam chungchang ah Mizoram Police hotute chuan, he thil enfiah tur hian intirh nghal a nih thu an sawi a, an thudawn chinah chuan, Mamit District chhungah hetiang training-na hmun hi a awm hriat a ni loa a, hetihlai hian Lunglei District a training-na hmun awm anga sawi awm chungchangah erawh enfiah tura an tirh te atanga thu an la dawn loh thu an sawi.

Saitual Chhim Veng-a cheng C. Zosangzela (57) chu nimin khan an ramvahna ah chesualin kham-ah a lum a, a hmunah a boral.

Union Minister for Power and New & Renewable Energy RK. Singh chuan Mizoram tan 10% Gross Budgetary Support hnuaia Power project 6 thawhna tur sum cheng vbc. 273.21 chu DONER Ministry lama tihfel ngai la awmte tihfel nghal a nih tur thu leh a rang thei ang bera release tir a tum thu a sawi.

Kumin-a Lok Sabha Inthlanpui neih tur atana inbuatsaihna te thlirin Chief Electoral Officer (CEO) Mizoram Madhup Vyas IAS chuan Inrinni khan Saitual a tlawh.

Nikum (2023) kha Mizorama Dengue natna vei hmuhchhuah an tam ber kum a ni a, Dengue vanga thi pawh mi pahnih an awm bawk a ni.

Minister hlui Zodintluanga Ralte chuan Mizoram sawrkarin Vairengte Forest Check Gate-a Hmunphiah phur an kaltlang tir lo chu enfiah turin sawrkar a phut tih a sawi.

Sawrkar laipuiin khua leh tui te hamthat nana ruahmanna a siam hrang hrang mipuite hnena inhrilhhriatna atan leh anmahni khua ngeia inzirtirna tura a buatsaih, Vikshit Bharat Sankalp Yatra (VBSY) chu Mizoram-ah tluang takin zawhfel a ni ta.

Sawrkar laipuiin mipui tana hamthatna a siam hrang hrangte mipui ten an hriatchian a tangkai zawka an hman theihna tura an khua ah ngei kal chilha heng Scheme hrang hrang mipuite hnena inzirtirna hun, Viksit Bharat Sankalp Yatra (VBSY) nikum December 18 atanga Serchhip District a kalpui chu nimin khan zawhfel a ni ta a, VSBY Campaign hi nimin khan New Serchhip Nort leh New Serchhip South VC bakah Hmawngkawn leh Hriangtlang khua ah te neih leh niin he hunah hian sawrkar Department hrang hrang ten mipuite zirtirna pein thuziak te an sem leh bawk a ni.

Ramchhung hmundang te rualin India Republic Day chu nimin khan Serchhip-ah pawh urhsun taka hman a ni a, Serchhip Sports Complex-a Republic Day lawmnaah hian District Bawrhsap David Lalthantluanga chuan India Hnam Puanzar pawtparhin Parade Contingent 18 te Chibai buk a chhanglet a ni.

Nimin-a India Republic Day 2024 lawmna Serchhip Sports Complex-a neih ah Parade Contingent 18 te chuan Inspr. R. Lalbiakhlua kaihhruaina hnuaiah March past an nei a. Parade Contingent zingah hian Armed Contingenct pakhat, Un-Armed Contingent 7 leh School Contingent 9 bakah 42nd Assam Rifles Pipe Band te telin Un-Armed Contingent zingah hian Govt. Serchhip College NCC (Army Wing) chu pakhatna niin Little Flower Convent School Scouts and Guides chu pahnihna leh Govt Serchhip College NCC (Air Wing) chu pathumna an ni bawk. School Contingent zingah Goodwill English Academy chu pakhatna niin Brilliant Higher Secondary School chu pahnihna leh Little Flower Convent School chu pathumna an ni bawk.

Serchhip-a India Republic Day lawmna nimin a neih ah Excise & Narcotics Department leh Police Department hnuaia hnathawk tha thlanchhuah te hnenah Bawrhsap chuan chawimawina a hlan.

Serchhip-a Excise & Narcotics Department chuan nimin khan Serchhip-ah Heroin hawng 4 an man. Serchhip-a Excise & Narcotics Department te hian nimin chawhnu lam khan Serchhip Bazar-ah heng ruihhlo, Heroin Hawng li hi manin gram 50.3 a rit a ni a, hemi kaihhnawih ah hian Veronica Krossheri (49), Mualpui Chhingchhip nia insawi leh Vanlalchhuma (59), Venglai Chhingchhip nia insawi te chu man an ni a, ND&PS Act hnuaiah thubuai siam sak niin Vawiin hian Serchhip District Court-ah hruai an ni ang.

India Republic Day 2024 chu Serchhip District Jail-a Prisons Department Staff leh Mizoram Homeguard (MRHG) te pawhin nimin khan urhsun takin an hmang.

India Republic Day 2024 chu nimin khan Serchhip District chhunga Civil Sub-Division leh RD Block thuthmun ah te pawh urhsun takin hman a ni a, Thenzawl-ah chuan nimin zing khan SDO (Civil) Pisa Tual-ah Republic Day hi hmangin SDO (Civil) mawhphurhna la mektu Gaston Vanlalhriatpuia chuan Hnam puanzar pawtparhin mipuite hnenah thuchah a sawi a. North Vanlai-phai-ah pawh SDO (Civil) Complex-ah North Vanlaiphai SDO (Civil) Daniel Sailo chuan India Hnam Puanzar a pawtparh a, thuchah a sawi bawk. East Lungdar-ah pawh BDO mawhphurhna chelh mekah DRDO Project Director HD. Lalpekmawia chuan India Hnam Puanzar pawtparhin thuchah a sawi bawk a ni.

Serchhip District Boxing Association (SEDBA) chuan nimin khan Serchhip Boxing Hall-ah kum 2024-2026 chhunga an hruaitu tur thlanna neiin President-ah Kapliana Pachuau (Bazar Veng); Sr. Vice President-ah V. Zosang-liana (AOC Veng); Vice President-ah T. Vanlalhnaia (New Serchhip Venglai); Secretary-ah Kaptluanga Ralte (Vengchung); Joint Secretary atan T. Lalhuthanga (New Serchhip Venglai) leh David Laldintluanga (New Serchhip Venglai); Treasurer-ah R. Sanglura (Serchhip Vengchung) leh Fin. Secretary-ah Prem Lalhmangaiha (Serchhip Chanmari Veng) te thlan an ni a. He inthlanna hi Serchhip District Sports Committee te kaihhruaina hnuaiah neih a ni.

Mizoram sawrkar chuan Serchhip District Hospital-a Obstetrics and Gynaecology hna thawk turin Dr. Jeremy Vanramenga Pachuau dah turin tunkar Ningani khan Order a tichhuak a, Order chhuah a nih atanga ni 15 chhunga a hna hi zawm tura tih a ni. Hemi rual hian District thenkhat a Doctor te pawh sawn an ni bawk.

Foundation For Drug-Free Mizoram hruaitute chuan an pawl member zinga MLA a thlan leh Supply Minister B. Lalchhanzova chu lawmpuina thuziak hlanin Politics a luhchilh hmaa vantlang rawngbawlna lama tawnhriat nei tawh anih angin mipui rawngbawlna hna thawhna kawnga intih hmasawn tawnna tur an sawiho a. He hunah hian Supply Minister chuan Vantlang tana thil tha hlenchhuah duhna Mission thuk tak nei a, khalh kal rawngbawlna an nei chuan rah duhawm a chhuah thin tih sawiin, Foundation For Drug-Free Mizoram te kum 4 chhung an zinkawng chu ngaihnawm a tih thu a sawi a, an pawl chu an kal zelna atan duhsakna hlanin tangkai theihna a neihna ah tlanchhiat a tum loh thu a sawi bawk.

Mizoram sawrkar School Education Department hnuaia thawktu zingah aikal chhawr mi 601 an awm mek.

Sawrkar laipui chuan kumin atana Civil mite chawimawina hrang hrang, Padma Shri, Padma Bhushan leh Padma Vibhushan dawng turte chu niminpiah khan a puang a, Padma Shri dawng tur mi 34 zingah Mizoram atangin TNT hotupa Sangthankima chu a tel a ni. Sawrkar laipuiin a tarlan danin Sangthankima hian mi tam tak tan chenna leh ei leh in bakah an nun siamthat kawnga a thawh that avangin Padma Shree chawimawina dawng tura thlan a nih thu a tarlang a ni. Sang-thankima hian November 14, 1988 khan Champhai-ah Thutak Nunpuitu Team (TNT) a din tan a, tunah chuan Aizawl bakah hmun dang dangah inzarpharhin, hetah hian a mamawh te tan an taksa leh thlarau mamawh ang zela tanpuiin hun pumin rawng a bawl mek a ni.

Mizoram-a sumdawng tam tak ten China atanga bungrua an lakluh tur chu Myanmar tualchhung buaina avangin a thangkhang mek nia sawi a ni a, Mizoram-a sumdawngte hian harsatna nasa tak an tawk mek nia sawi a ni.

Zirlaite’n mahni inringtawk tak leh nuam ti taka Exam an hmachhawn theih nana Prime Minister Naredra Modi-a’n ruahmanna a siam, ‘Pariksha Pe Charcha’ pualin karleh Thawhtanni khian Bharat Mandapam, Pragati Maidan, New Delhi-ah hun hman a ni dawn a. He huna tel tur hian Mizoram atangin zirlai naupang pahnih, Ruth Lalfakawmi, Pushpak KVS-a pawl 9 leh Thangvanlal Haokip, MZU KVS-a Pawl 9 te chuan Nilaini khan Aizawl an chhuahsan. State tin atanga School naupang tel turte chu Ministry of Education (MoE) leh NCERT tangkawpin MyGov.in portal-ah Multiple Choice Questions (MCQ) hmangin an lo thlang chhuak thin a. Mizoram atanga tel tur School naupangte hi nikum December ni 12 atang khan an lo thlifim tan tawh a ni.

Land Revenue & Settlement Department hotute chuan Mizoram a cheng nghet ni lo ram lei thinte tan fimkhur a ngaih thu an sawi.

Mizoram sawrkar enkawl zirna In a Zirtirtu indaihlohna awm thin tiz iaawm turin Education Department-in Zirtirtu semrual a kalpui dawn.

India Republic Day 2024 chu nimin khan Mizoram hmun hrang hrangah urhsun taka hman niin Mizoram-a he ni lawmna pui ber Aizawl Lammual-a neih ah Governor Dr. Hari Babu Kambhampati chuan India Hnam Puanzar pawtparhin Parade Contingent 27 ten Hnam Puanzar zahna chibai an buk chu a chhanglet a ni.

Labour, Employment, Skill Development & Entrepreneurship (LESDE) changtu Minister Lalnghinglova Hmar chuan LESDE Department hnuaia inzirchhuakte chu awlsam taka sum siam tum lo tur leh thiamna tak tak hmanga eizawn tum tlat turin a fuih.

National Voters' Day vawi 14-na chu chu nimin khan rampum-ah hman niin Serchhip ah pawh District Bawrhsap leh District Election Officer David Lalthantluanga hovin Serchhip DC Conference Hall-ah hman a ni a, he ni puala zirlaite tana Essay inziahsiakna lawmman sem nghal a ni bawk.

Nimin khan Tawitlang Block MHIP chuan Chhingchhip-a Zonu Leng Run-ah Conference vawi 12-na an hmang a, he hun hi Bialtu MLA leh Agriculture Minister PC. Vanlalruata chuan khuallian niin a hmanpui a ni.

Horticulture Department hnuaia PMKSY Scheme, Micro-Irrigation Per Drop More Crop (PDMC)-a beneficiary hnathawk thazual thlan mi 9 te leh an kawppui te chu Vawiin-a Republic Day lawmna New Delhi-a neih tur chhim turin Special Guest atan thlan an ni a. Heng zingah hian Ser-chhip District atang pawhin Lalzemawia, Serchhip Dinthar Veng te nupa chu an tel a ni.

Serchhip District Tennis Association buat-saih ‘Republic Day Tournament 2024’ chu khelh mek niin naktuk-ah Final khela zawhfel a ni ang. Tunkar Nilaini atanga Leisekawt Tennis Court-a khelh ‘Republic Day Tournament 2024’ ah hian Men's Singles leh Men's Doubles-ah intihsiakna neih niin players 14 an tel a, nimin khan Quarter Final khel tanin Vawiin hian Semi Final nen khelh zawh hman tura ruahman a ni a, naktuk-ah Final khela zawhfel tur a ni ang.

Republic Day Volleyball DC’s Running Trophy khelh zawh takah Khawbel G&SA chu an Champion. Serchhip Chanmari Volleyball Court a khelh Republic Day Volleyball DC Running Trophy hi nimin khan Final khelh niin Khawbel G&SA hian an khingpui Keitum Kawn Veng VC chu 3-1 (18-25, 25-16, 27-25, 25-16) a hnehin an Champion a ni. Tun tum Tournament-ah hian Best Spiker atan Johny Lalremruata (Keitum Kawn Veng VC) chu thlan niin Best Setter atan Isaac Vanmalsawma (Khawbel G&SA) chu thlan a ni bawk.

India Republic Day chu Vawiin hian ramchhung hmundangte rualin Serchhip-ah pawh hman a ni dawn.

Chief Minister Lalduhoma chuan nimin khan Mizoram Public Service Commission (MPSC) Chairman JC. Ramthanga leh Member Vanlalngaihsaka te chu a Pisa-ah a kawm a, he hunah hian MPSC Chairman chuan tun hnai kum hnih chhunga MPSC in hmasawnna a neih hrang hrangte leh an hmachhawp te a tarlang bawk a ni.

Horticulture Aromatic Medicinal Plants chungchanga Ph.D ti mek Laldingngheti Bawi-tlung, Siaha chuan nimin khan Hatkora leh Sernam atanga a siamchhuah Essential Oil te Chief Minister Lalduhoma chu a pisa-ah a hlan a. Hatkora atanga a Oil siam hi Immunity Booster a ni a, Sernam atanga a siam hi Lu phut leh Sam tlakawlh damdawi a ni. Tunah hian a raw materials mamawh awm thatna Hortoki-ah lian thama siamna khawl din tumin hma a la mek a ni. Chief Minister hian Laldingngheti Bawitlung hi lawmthu hrilhin, a hmalakna tur duante ziaka fel taka a hnena thehlut turin a lo hrilh a ni.

Mizoram Pradesh Congress Committee (MPCC) Office Bearers (OB) Meeting nimin-a Lal Thanhawla Auditorium-a neih chuan nikum Nov. 30-a MPCC in party Inthlan February 2024-a neih a lo rel tawh ang chu ngaihtuahin Inthlanna hun atan February ni 20, 2024 (Thawhlehni) an ruat a, Party OB leh Executive Member thlan tur a ni ang.

Mizoram Pollution Control Board (MPCB) Chairman Liankima Lailung chuan ‘Ride to Clean Air’ tih thupui hmanga India ram Thirsakawr a fan tum Vanlallawmzuala Varte (Lz Varte) chu nimin khan Aizawl atangin a vailiam a. Kan chenna boruak leh leilung humhalh tura zirtirna pe tura chhuak tur Vanlallawmzuala Varte hi MPCB chuan ‘Clean & Green Sustainable Lifestyle Under Mission Life’ hnuaiah sponsor-in State 28 leh UT 8 fangin khawpui 50 a tlawh dawn a, KM 16396 zinin kumin July thla thleng a zin dawn a. Nikum khan mipui zirtirin Lailapur atanga Mizoram chimtawp thleng ke in a kal tawh bawk a ni.

Mizoram State Level Co-ordination Committee on GST chu niminpiah khan Taxation Department Auditorium, aizawl-ah thukhawmin Mizoram-a GST a pun lehzual theih nana hmalak zel dan turte sawiho a ni a. He Meeting-ah hian Service Sector hnuaia Tax lak dan tur leh sumdawng te'n GST dan an zawm that lehzual zawk theih nan inhrilhfiahna leh zirtirna tam zawk pek nise tih te rel a ni. He thutkhawm ah hian Central GST Commissionerate leh State GST Commis-sionerate-a thawktute bakah Directorate General of GST Intelligence (DGGI), Guwa-hati Zonal Unit hnuaia Asst. Director te pawh an tel a ni.

Nimin khan Chief Minister Lalduhoma hovin Lengpui Airport Terminal building chei that mek a hmalak zel dan tur relin mi pawimawhte chu CM Meeting Room-ah an thukhawm a. He thutkhawm ah hian Lengpui Airport Terminal building cheina hna kal mekah sawrkarin contractor hnenah tha taka pawisa a pekchhuah zel thu leh chutihlaia hna a kal chak tawk loh thu sawi a ni a. Hei vang hian hnathawh tur hmabak la awm te chak taka thawh a nih theih dan tur chipchiar taka sawiho a ni. He thutkhawm ah hian PWD Minister bakah Commissioner & Secretary to Chief Minister leh GAD leh PWD hotute an tel a ni.

Nimin khan Incentive Cash Award for Proficiency in Science and Mathematics chuzirlaite hnenah semchhuah a ni.

Siaha-a Auto Rickshaw Auto Rickshaw Driver pakhat chu thah ngei nia hriat in a boral a, Myanmar atanga rawn raltlan ten an thah nia hriat a ni.

National Highway-54 laih hna thawh mekah Hnahthial District a chhungkaw pahnih chu zangnadawmna an lak hnuah an In leh lo an la thiah loh avangin nimin khan khawl hmanga an In thiah sak an ni.

Chief Minister Lalduhoma chuan hmasawnna hnathawhna tura sum leh pai an dawn apiang dik taka an hman tur thu a sawi.

Mizoram Governor Dr. Hari Babu Kambhampati chuan Mizoram in inthlanpui a lo hmachhawn thin dan chu chhuanawm a tih thu a sawi.

Chief Minister Lalduhoma chuan nimin khan a Pisa-ah Mizoram Quarry Association hruaitute kawmin an harsatna te a ngaihthlak sak.

Mizoram State Boundary Committee chu nimin khan an Chairman leh Home Minister K. Sapdanga hovin an thukhawm a, Assam sawrkar nena indawrna kallai chu tharthawha hmalak leh tha an ti.

Revenue Minister B. Lalchhanzova chuan House Pass dilna Minister kaltlang kher a lak a ngai thin chu titawpin Department Director kutah a hlan.

Serchhip District Volleyball Association in a buatsaih Republic Day Volleyball, DC Running Trophy chu Vawiin hian Final khelh a ni dawn ta.

Serchhip District-a Samagra Shiksha hma-lakna in nimin khan ‘Rangotsav 2024’ chu hman niin zirlai naupang ten intihsiakna an nei a ni.

Rashtriya Bal Swasthya Karyakram (RBSK) Mobile Health Team te chuan nimin khan Presbyterian English School, New Serchhip-a zirlaite hriselna dinhmun an enfiah sak.

Mizoram sawrkar chuan tun thla ni 22 khan ‘Mizoram State Project Monitoring Committee’ chu Chief Minister Lalduhoma kaihhruaina hnuaiah a din ta a. He Committee-ah hian R. Lalrinawma IRS (Rtd) chu Vice Chairman niin Er. Vanlalruata chu Secretary atan dah a ni a, Member atan hian Mizoram Kohhran Hruaitute Committee (MK-HC) aiawh pakhat bakah Political Party atangin INC, MNF, BJP leh ZPM bakah NGO atangin Central YMA, MUP, MHIP, MZP leh MSU aiawh pakhat ruat an ni a. He Committee hi an hnathawh tur hrang hrangte pawh tarlan nghal a ni a. TA/DA bakah Sitting Allowance an neih theih dan turte pawh tarlan a ni bawk.

Niminpiah-a Lengpui Airport-a Myanmar sipai Thlawhtheihna chetsualna hmun chu nimin khan New Delhi-a 'MLA Orientation Course' kal rawn haw Sports Minister Lalnghinglova Hmar, FCS&CA Minister B. Lalchhanzova, Deputy Speaker Lalfamkima leh MLA thenkhat ten a hmun ah an tlawh a, heng sawrkar hotute hi Deputy Controller, Civil Aviation Saidenga chuan hruaiin an chetsual dante a hrilhfiah a. Ram hruaitute chuan vanduaina thleng chu pawi an tih thu leh hliam tuarte an tawrhpui thu an sawi a ni. Hetihlai hian niminpiah-a he Thlawhtheihna chesual in a rawn phurh tur Myanmar Sipai te leh Thlawhtheihna chesual ta chuang te chu nimin khan Myanmar Sipai Thlawhtheihna dangin rawn phurin an ram lam panpui an ni tawh a ni.

National Commission for Sufai Karamcharis-a Chairman M. Venkatesan chuan nimin khan Mizoram rawn tlawhin AMC Auditorium-ah ‘The Prohibition of Employment as Manual Scavenger and their Rehabilitation Act, 2013’ chungchang sawiho a ni a. NCSK Chairman chuan North East-ah Safai Karamcharis te an harsatna hriat tuma inhmukhawm an nih thu sawiin, mi 146 lai an tel chu lawmawm a tih thu a sawi a. Safai Karamcharis te chu an ni khat hlawh chu Daily Minimum Wages nen a inmil leh inmil loh leh Employment Provident Fund (EPF) an neih leh neih loh bakah Life/Health Insurance Coverage pek an nih a tul thu sawiin, anmahni zingah hmeichhe hamthatna bik ngaihtuah tur Committee siam turin a chah bawk

Chief Minister Lalduhoma chuan nimin khan Mizoram Hindi Prachar Sabha hruaitute chu a Pisa-ah kawmin an harsatna te a ngaihthlak sak a, Mizoram Hindi Prachar Sabha hruaitute hian Chief Minister hi lawmpuina an hlan nghal bawk a ni. Nimin vek khan Flagship Health Workers' Association hruaitute pawhin Chief Minister hi a Pisa-ah kawmin Chief Minister hian an harsatna hrang hrang te a ngaihthlak sak a. Flagship Health Workers hruaitute hian Chief Minister hi lawm-puina an hlan nghal bawk a ni. Nimin vek khan Zomi Federal Union, Myanmar hruaitute chuan Chief Minister hi a Pisa-ah hmuin lawmpuina thuziak (Lehkhapui) leh Tedim Puan an hlan a. Chief Minister hian lawmthu hrilhin, an pawl chanchin leh thil pawimawh dangte an sawiho bawk.

Mizoram Legislative Assembly Speaker Lalbiakzama chuan niminpiah khan Lok Sabha Speaker Om Birla chu a chenna In-ah hmuin Mizoram-ah sawrkar thar hnuaia hmalakna kalpui an tum dan te bakah Mizoram tana thil pawimawh dang te a sawipui a. Mizoram Assembly Speaker chuan Mizoram tana sawrkar tha din an tum thu te, an hmalak tum dan tlangpui leh a bikin takin Assembly House entawn tlak nih an tum zel thu te a sawi a. Lok Sabha Speaker Om Birla pawhin Mizoram chanchin a lo hriat ang te a sawi bakah Assembly Session zahawm taka Mizoramin a kalpui thin te chu tha a tih thu sawiin, hun rem-chang hmasaah Mizoram rawn tlawh a duh thu te a sawi bawk.

Nimin khan Khawzawl District Consultative Committee (DCC), District Level Review Committee (DLRC) leh District Level Security Committee (DLSC) chu Khawzawl DC K. Lalrohlua hovin an thukhawm a, he hunah hian an District a Bank hrang hrangte hmalakna leh an dinhmun te thlirho niin hmachhawp an neih te leh hmalak zel dan turte sawiho a ni bawk.

Sports & Youth Services Minister Lalnghinglova Hmar chuan Ministry of Sports-a Secretary Sujata Chaturved-i kawmin sawrkar Laipui puihna Mizoram in a mamawh thu a hrilh.

Evironment, Forest & Climate Change Minister Lalthansanga chuan Mizoram Environment & Forest Consultative Forum (MEFCOF) te hmalakna chu tha a tih thu a sawi.

Mizoram Police Subordinate Officers’ Association (MPSOA) chuan Dan lova sumdawnna titawp tura sawrkar hmalakna chu zaa za an thlawp thu an sawi.

Commerce and Industries Department changtu Minister F. Rodingliana chuan niminpiah khan Bangladesh High Commissioner Md. Mustafizur Rahman kawmin Mizoram leh Bangladesh insumdawn tawnna chungchang a sawipui.

Mizoram Youth Commission (MYC) Chairman Malsawmzuala Ralte chuan Mizoram tlawha rawn kal United States Agency International Development (USAID) aiawhte chu niminpiah khan thil pawimawh hrang hrang a sawipui.

Mizoram Governor Dr. Hari Babu Kambhampati chuan nimin khan Raj Bhavan-ah State pali - Manipur, Meghalaya, Tripura, Uttar Pradesh leh Union Territory of Dadra and Nagar Haveli and Daman& Diu and Diu te Foundation Day lawmna hun a buatsaih.

AH & Vety Minister C. Lalsawivunga chuan ranchaw siamchhuah nana hmanraw mamawh zinga mi Vaimim leh Bekang bakah mamawh dangte pawh phai lam atanga chawlut lova khawtual thar ngeite rate mumal leh man man zawka lei a nih theih nan ngaihtuahna sen a tul thu a sawi.

Serchhip District chhunga khaw hrang hrang ten tunlai hian Hmarcha an tharchhuah hralh turin hma an la mek a, kumin hian Hmarcha man hi a sang hle nia thudawn a ni.

Serchhip-a Traffic Police te chuan kum kalta 2023 chhung khan dan zawm lo-a lirthei khalh 432 manin heng mite pawisa chawi tlingkhawm chu Rs. 4,66,750/- a tling. Serchhip SP Office atanga thu kan dawn danin Serchhip-a Traffic Police te hian nikum chhunga dan zawm lo lirthei an man zingah hian lirthei ka pali nei chi tam berin 231 man an ni a, an sum chawi tlingkhawm pawh Rs. 1,91,100/- niin lirthei ke hnih nei 173 man an ni a, an sum chawi chu Rs. 2,48,650/- niin lirthei ke pathum nei 28 man an awm bawk a, an sum chawi chu Rs. 27,000/- a tling bawk a ni.

Tunkar Zirtawpni-a India Republic Day lo thleng tur lawm turin Serchhip-ah inbuatsaihna kalpui mek a ni a, India Republic Day lawmna hi Serchhip Sports Complex-ah January 26, 2024 zing dar 10:00 atanga neih tur a ni a, School hrang hrang 13 bakah Un-Armed Contingent 5 tel tura beisei niin heng mite hian tunlai hian Rehearsal ngawrh takin an nei mek bawk a, tukin hian Final Rehearsal neih tura ruahman a ni.

Serchhip District chhunga Integated Health Campaign neih mekah nimin khan Govt. Higher Secondary School Serchhip-a Zirlai naupangte chu an hriselna dinhmun enfiah sak an ni a, he hunah hian zirlai naupangte hi HIV, VDRL, TB, Hepatitis B leh C bakah an HB leh Blood Sugar te a thlawna enfiah sak an ni a, he hmalakna hi kum 15 leh 49 inkar te tana ruahman a ni. Mizoram-a a hmasa ber ni tura Integrated Health Campaign Serchhip District-a neih mek hi nikum August 28 khan a hawnna neiin bul tan a lo ni tawh a, hemi hnu hian a tahtawl in District chhunga khaw hrang hrangah thalaite tan an hriselna endik hna hi kalpui niin tunah hian khawpui pawnlam chu zawhfel thawkhat a ni tawh a, kumin kumthar atang hian Serchhip khawpui chhungah neih chhunzawm leh niin tun dinhmun ah mi 2840 chuang te chu an dinhmun enfiah sak an ni tawh a, tun thla chhung hian he hmalakna hi zawhfel tum a ni.

Mizoram sawrkar in sawrkar hnathawk aikal la te leh an dinhmun kimchang sawrkar-a thehlut tura a tih chungchang ah Report tihfel ala ni lo.

Kumin February thla a Mizoram Pradesh Congress Committee (MPCC) Inthlanna neih tur chu thuang hnih-a inchuhna a awm dawn nia thudawn niin MPCC President nilai Lalsawta chuan a nihna chelh zui a tum dawn lo nia thudawn a ni a. He inthlanna neih turah hian Sr. Vice President nilai Lal Thanzara leh Treasurer hlui Zodintluanga Ralte te chuan President hi chuhin Vice President nilai Lalnunmawia Chuaungo leh MLA C. Ngunlian-chunga te chuan Vice President an chuh anga, Treasurer nilai Dr. Lalmalsawma Nghaka leh MLA hlui Lalrindika Ralte te chuan Treasurer an chuh bawk ang. MPCC Inthlanna neih hun tur hi tun thla ni 25-a OB thukhawm in an tichiang dawn a ni.

Nimin khan Khawzawl DC Meeting Hall ah National Bank for Agriculture Development (NABARD) leh North East Initiative Development Agency (NEIDA) tangkawp buat-saihin Khawzawl District chhunga khaw pali - Khawhai, Chawngtlai, Neihdawn leh New Chalranga-a ‘Integrated Livelihood Promotion’ hmanga loneih (farming) leh ranvulh (livestock) tanpuina an pek tur chungchangah inrawn-khawmna neih a ni a, he Project atan hian Rs. 2,13,74,500/- ruahman niin heng khaw 4-a chhungkaw 40 theuh ten thlai chi hnih - Dragon fruit leh Chana (Garden Pea) an ching anga; Chawngtlai, Neihdawn leh Khawhai a chhungkaw 10 theuh ten Ar an vulh bawk ang.

Mizo thalai Japan rama Nurse hnathawk turte thlahna hun chu nimin khan Aizawl-a LESDE Department Conference Room-ah neih a ni a, heng Mizo thalaite hi Japan leh India sawrkarin thawhhona thuthlung an siam ang a kal tur niin NSDCI, Ministry of Skill Development hnuaia Delhi-a Japanese tawng thla 9 chhung zir zo tawh an ni. Tun tumah hian a Batch hmasa ber ah mi 6 ten Japan hi an pan dawn a, tun thla ni 26-ah Delhi panin chuta tang chuan Tokyo-ah thlawk lutin Bullet Train in an thawhna hmun tur Ishikawa an pan leh dawn a ni. Anmahni bakah hian hna hmu tawh Visa la buaipui mek kal tur engemaw zat an la awm bawk a. Japanese language hi a thlawna zir theih anih bakah Japan an kalna man tur zawng zawng tumsak vek an ni.

Sports & Youth Services Minister Lalnghinglova Hmar leh Sports Authority of India Director General Sandip Pradhan chu nimin khan New Delhi-ah an inkawm.

Nimin January 23, 2024 khan PC Party chuan Aizawl-a an party Office hawnna hun an hmang a, he hunah hian an President Vanlalruata chuan PC Party chuan Opposition party in ram siamtha tura a tih theih sang ber an tih tur thu sawiin, “Ram siamtha turin chutiang buaipuitu zingah chuan tel a, engemaw nih a ngai a. A duh apiang tan kan party-ah hian hmun a awm a ni,” a ti a. Lok Sabha Inthlanpui neih tur chungchang sawiin, “MP Inthlan lo awm turah hian candidate tha tak neiin kan ram, kan hnam leh kan Sakhaw himna turin hma kan la dawn,” a ti bawk.

Vaivakawn Zohnuai kawng tlabal in harsatna dang a thlen tawh loh nana hmalak dan tur leh kawng siam that dan tur chu nimin zing khan DM&R changtu Minister K. Sapdanga leh PWD changtu Minister Vanlalhlana te chuan a hmunah an enfiah.

Chief Minister Lalduhoma chuan Mizoram SSA Teachers' Association hruaitute chu nimin khan a Pisa-ah kawmin an harsatna te a ngaihthlak sak.

Champhai leh Hnahlan-a Grape Winery enkawltute chuan nikum chhung khan Grape chingtute thar Grape leina atan Rs. 1,23,52,342/- an seng.

Mizo Zirlai Pawl (MZP) General Hqrs. chuan Mizoram sawrkar-in zirtirtu aikal lak titawp tura a hmalakna chu an thlawp thu sawiin, sawrkar tha tichak tura tan lak an tum thu an sawi.

Social Welfare, Tribal Affairs, Women & Child Development Department changtu Minister Lalrinpuii chuan Mizo hmeichhiate'n dinhmun sang tak tak an chelh theih zelna tura tan lak a pawimawh thu a sawi.

Mizoram Subordinate Services Selection Board (MSSSB) Chairman C. Lalhuliana chuan MSSSB thiah chungchang ah sawrkar atangin hriattirna an la dawn loh thu a sawi.

Myanmar atanga Mizoram chhunga rawn tlanchhia Myanmar Sipai te phur haw tura Thlawhtheihna lo kal chu nimin khan Lengpui Airport-ah chesualin vanneihthlak takin thi an awm lo a, mi 14 chuanna he Thlawhtheihna chesual avang hian mi 8 te chuan hliam an tuar a ni.

Mizoram-a Myanmar sipai rawn tlanchhiate hruaitu tur Myanmar Sipai thlawhna chu Vawiin khan Lengpui Airport ah a chesual a nia thudawn niin, nunna chan an awm lo.

Serchhip-a District Information & Public Relation Officer leh I&PR-a Deputy Director Lalnunmawii chuan Serchhip District-a MJA Member te chu nimin khan a Pisa-a leng-ah sawmin Kumthar atana Inhlanna an nei.

Serchhip District chhung Lungchhuan khuaa Presbyterian English School chu nizan hmasa dar 8:00 vel khan a kang a, bungrua engmah chuh hman a ni lo.

National Girl Child Day 2024 puala tun thla ni 24 thlenga hun hman tur chu nimin khan Ser-chhip-ah pawh a hawnna neih a ni.

Saitual District Bawrhsap Dr. Lalngura Tlau chuan nimin khan Ngopa khuaa Eklavya Model Residential School (EMRS) chu a hmunah a tlawh a, Science Laboratory te, Girls Hostel Extension sak mek te, Campus Health Centre te, Hostel dormitory te leh Staff Quarter te enfiahin, building thenkhat sakna hmunhma in a zirloh avanga thenkhat luah zui ngamloha awmte pawh a enfiah a, Saitual DC chuan tui luankawr tha leh luikawr thlenga tui kawng te siam thuai a tul thu a sawi bawk. Ngopa-a EMRS-ah hian Zirtirtu 12 leh naupang 240 vel awmin thawktu lak belh tur Interview chu DC ho hian neih nghal a ni.

Inthlanpui-a Vote thlakna atana hman Electronic Voting Machine (EVM) chu khua leh tui te'n an hriatchian a, a hman dan a taka an lo hmuha an tih chhin theihna tura Kolasib District chhung fangkual tura ruahman, EVM Mobile Demonstration Van chu nimin zing khan Kolasib District Bawrhsap Pisa Tual atangin District Bawrhsap leh District Election Officer John LT. Sanga chuan a vailiam a. EVM Demonstration Van hian mipuite hnenah EVM hman dan entirin February ni 23, 2024 hma hian Kolasib District chhunga Polling Station 89 te chu tlawh chhuak hman vek tura ruahman a ni.

Nimin khan Health Minister Lalrinpuii hovin a Pisa-ah Department hotu ten India ram State hrang hrang leh Mizoram a Covid-19 hri kai hmuh-chhuah chungchang an sawiho a. Covid-19 hri hian min kiansan mai dawnin a lan loh avangin mipui te chu fimkhur tur leh Covid Appropriate Behavior (CAB) zawm theuh turin an ngen a. Covid-19 vei ni a inringhlel a, symptom nei te tan Zoram Medical College (ZMC), Falkawn ah engtik lai pawha a thlawna RT-PCR test kalpui theih turin ruahmanna siam nghal a ni.

Rajasthan-a National Red Ribbon Quiz Competition neih zawh taka pakhatna lawmman latu Zonunsangi (Class 8) leh Jenet Malsawmpuii, (Class 9), Republic Presbyterian English School te chu nimin khan Chief Minister Lalduhoma chuan lawmpuiin a Pisa-ah thingpui a inpui a, Chief Minister chuan zirlai naupang taima leh entawntlak, Mizoram hming timawitu an nih avangin lawmthu a hrilh a, ram tana mi tangkai tak an nih chhoh ngei theih nan duhsakna a hlan a. Anmahni enkawltu Republic PES-a thawktute leh MSACS chungah pawh lawmthu a sawi bawk.

Siaha District Bawrhsap Lalhmunsanga Hnamte chuan Inrinni khan Amobyu Vaihthie leh Tipa inkar kawngpui NH. 54 National Highway and Infrastructure Development Corporation Limited (NHIDCL) siam mek chu a hmunaha tlawh a, he kawngpui laih avanga zangnadawmna la tawh, an In la thiat lo te chu Vawiin, January 23, 2024 ralhma ngeia an In lo thiat fel turin thu a pe a, NH- 54 chu mipuiten an chhawr tangkai ber dawn a, a hma thei ang bera zawh a tul tih sawiin, mipuite chu harsatna siamtu ni lova sawrkar thawhpuitu ni zawk turin a chah a, zangnadawmna la tawh si, In la thiat lo te avangin hnathawh a muan phah thu leh Jal Jeevan Mission kalpui mek pawh tihkhawmuan phah anih thu a sawi bawk a ni.

Chief Minister Lalduhoma chuan nimin khan Luangmual Industrial Growth Centre-a AMC hnuaia Plastic Waste Management Centre sak mek chu a tlawh a, he Waste Management Centre sak mek chinchang kimchang a hnena ziaka thlen turin thawktute hi a chah a. Plastic bawlh-hlawhte kan ngah zel a, a chinralna lam mumal neih thuai kan mamawh avangin tha taka sak puitlin vat a tul thu a sawi bawk.

Deputy Conservator of Forest, Aizawl Wildlife Division chuan Thang chi hrang hrang hmanga Sava leh Nungcha dang tam tak tihlumtu leh an chet dan video Youtube channel-a upload thin mi pahnih- Vanengmawia, Lungmawi leh PC. Malsawmzuala, South Vanlaiphai, Hnahthial District ve ve te chu Wildlife (Protection) Act, 1972 an bawhchhiat avangin pawisa chawitira hrem an nih thu leh an Youtube Chennel-a Thangkam dan leh nungcha chi hrang hrang an tihhlumna Video pawh nawhreh tir an nih thu a sawi a, hetiang tih ching te hi chhui mek an nih thu a sawi bawk. 

Mizo Zirlai Pawl (MZP) General Hqrs. chuan Myanmar leh India ramri-a zalen taka inkal-pawhna, Free Movement Regime (FMR) hlih tum duh lohna leh Myanmar leh India inkar ramri hung tum duh lohna Memorandum chu nimin khan India Prime Minister hnenah an thehlut. He Memorandum hi Mizoram Governor kaltlanga thehlutin Governor Dr. Hari Babu Kambhampati zin lai a nih avangin a aiawhin Secretary to Governor, V. Lalsangliana chuan a lo dawng a, Memorandum thehluh hnua chanchinbu mite zawhna chhangin MZP President H. Lalthianghlima chuan, MZP in Zofate daidang tur FMR leh ramri hung hi dodal zel tum a nih thu a sawi a ni.