House Pass dilna Revenue Director hnenah hlan

Revenue Minister B. Lalchhanzova chuan House Pass dilna Minister kaltlang kher a lak a ngai thin chu titawpin Department Director kutah a hlan.

LR&S Department a thawktute chuan nimin khan Directorate of Land Revenue & Settlement Conference Hall-ah kum 2024 kumtir inhlan-tharna hun hmangin he hunah hian Revenue Minister chuan House Pass dilna Minister kaltlang kher a lak a ngai thin chuan mipui tana harsatna a thlen tam zawk ni a a hriat avangin, a tihtawp thu sawiin, Director kuta a hlan thu a sawi a. Surveyor indaihlohna phuhru turin Survey hna Outsource na tur pawh peihfel tawh a nih thu leh EOI tihchhuah mai theih a nih tawh thu a sawi a. Property Registration leh thil tul danga hman turin E-Stamping Rules pawh duan mek a nih thu sawiin, hei hian mipui tan awlsamna a thlen bakah Stamping atanga sawrkar sum lak luh pawh a pui hle dawn tih a sawi bawk.

Assam Rifle ram chhuahsan tura mimal ram nei surrender tawh te chu fakawm a tih thu leh Lawmthu sawina lehkha ziak pek vek a tum thu Minister chuan a sawi a, la surrender lo te pawh a mal mala kawm a chinfel dan zawnpui a duh thu a sawi bawk.

Revenue Minister chuan Revenue Department hnuaiah hna hautak leh uluk taka hma-chhawn tur tam tak an nei tih sawiin, Department of Land Resources a dawr chungchanga Delhi lama hotute an inhawn zia te a zuk hmu chuan phurna a pek thu leh Mizoram-a Revenue Department pawhin tan lak a ngaih thu a sawi a. LR&S chu mipui mimir, sawrkar leh pawl anga mamawh nitin a lo thawktu an nih anga an mawhphurhna pawimawhna te a sawi a. Department a thawktute chu Department hmasawnna kawng leh mipui rawngbawlna tha zawka an thawh theih nan ngaihtuahna seng turin a chah bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar