Anna Food Production Industry hawnna CM in hmanpui

Chief Minister Lalduhoma chuan mahni kut kawih eizawn nana hmangtute tan sawrkarin kawngka zau taka a hawnsak tur thu leh Hand Holding Policy hmanga an tana ruahmanna tha tak an siam tur thu a sawi.

Luangmual Industrial Growth Centre-a Anna Food Production Industry hawnna hun nimin-a neih Chief Minister Lalduhoma chuan kan rama resources awmsa hmang tangkai thiam te, kan kuthnathawktute thil tharchhuah lo process thiam te leh mipuite awlsamna thlen thei hmalakna nei thiam (entreprenuer) te kan mamawh em em tih sawiin, chutiang ti thei zinga pakhat Anna Food Production Industry thar hawn a ni ta chu lawmawm a tih thu a sawi a. Bawnghnute thartute tana Industry tangkai leh an hlawkpui tak ni ngei tura a beisei thu a sawi a. Mizo thalai, entreprenuer thate tan sawrkarin kawngka zau taka a hawnsak tur thu leh Hand Holding Policy hmanga an tana ruahmanna tha tak an siam tur thu a sawi bawk.

He hunah hian Agriculture Minister PC. Vanlalruata pawhin Mizoram sawrkarin loneitute tharchhuah te State pawna hralh tlak ngeia process-a tum dan a sawi a. Anna Food Production ten hmalakna tha tak an kalpui avangin Industrial Growth Centre-a lo awm tawhsa te an lawm hle tih sawiin, Industry neitute an la tam loh avang leh a ti chhunte an hlawhtlin thin avangin rawn lut awm belh zel se an duh tih a sawi bawk.

Anna Food Production dintu leh neitu Daniel Lalawmpuia chuan an hmalakna chu kum 2020 khan Belpui pakhat leia a nupui nen bul an tan thu leh kar khat chhung leka Belpui pariat an mamawh chhoh dan a tarlang a. He huna tarlan a nih danin an hmanraw man ah cheng nuai 104 vel seng tawhin an bawnghnute supply-tu tur Muthi lamah Bawngvulhtute nena Society an din tawh a. Tunah hian Lassi siam rih mah se bawng-hnute siam chu an tum ber tur a nih thu leh thawktu mi 14 an awm mek thu an tarlang bawk.