MZP in Zirtirtu aikal lak titawp tura hmalakna thlawpin Feb. 10 hmaa aikal la report turin an hriattir

Mizo Zirlai Pawl (MZP) General Hqrs. chuan Mizoram sawrkar-in zirtirtu aikal lak titawp tura a hmalakna chu an thlawp thu sawiin, sawrkar tha tichak tura tan lak an tum thu an sawi.

MZP General Hqrs. Executive Committee thutkhawm nimin-a an President H. Lalthianghlima kaihhruaia neih chuan aikal lak titawp tura hmalakna chungchang hi sawiin, Education Minister Dr. Vanlalthlana pawh chak taka hma la turin a ngen tih an sawi a. February ni 10 ralhma ngeia aikal la leh mahni post-a awm lote chu MZP General Headquarters-ah report turin an hnuaia Headquarters, Sub-Headquarters leh Branch te a hriattir a, February thla ralhma ngeia chingfela hmalak an tum tih an sawi a ni.

MZP hian India leh Burma ramria zalen taka inkalpawh theihna, Free Movement Regime (FMR) thiah tumna awm chungchang pawh he thutkhawm ah hian ngaihtuah niin, Mizo hnam inpumkhatna leh inunauna tichhe thei tur a nih avangin a tawp thlengin dodal zel an tum thu an tarlang bawk.

He thutkhawm ah hian Bangladesh atanga sahimna zawnga raltlante Central Force ten an lo dan fo laia Myanmar-a Zofa unaute tibuaitu ber Myanmar (State Administration Council) sipaite zalen taka an ralthuamte nen awlsam taka ramri an rawn kan fo chu thalo an tih thu an sawi a, Civil mi tanpuina mamawha lo lutte laka an khawng em em laia buaina siamtu ber Burma sipaite a ngaihsak em em leh duat taka an thawnkir fo chuan mit a ti kham hle tih sawiin, Mizoram-ah Myanmar SAC sipaite hi lo lut tawh lo tura an duh thu an tarlang a ni.

Comments

Popular News (Last 30 Days)

LPG man bithliah thar