Sahimna zawnga Mizoram-a rawn lut Myanmar Sipai te Vawiin ah an ram lamah lak tum an ni

Kar kalta Nilaini a Lawngtlai District chhung Bandukbanga khua a Myanmar sipai an ralthuam nena rawn tlanlut mi 276 te chu Aizawl thlenpui vek an ni tawh a, Vawiin hian an ram lamah thiar an nih beisei a ni.

Home Department hotute sawi danin Myanmar sipaite hi tualchhung buaina kal zelah Arakan Army hel pawlin an awmna Camp an laksak avangin kar hmasa Nilaini, January 17, 2024 khan Bandukbanga, a thenin Bondukbangsora ti a an sawi bawkah an rawn lut a. Assam Rifles hovin lo buaipuiin a then chu Parva lamah an hruai a, an tam tham deuh avangin a then chu Zorinpui lamah an hruai bawk. An zingah hian hliam tuar mi 11 an awm a, na lutuk erawh chu an awm lo ni a thudawn a ni.

Tun tuma himna zawnga Mizoram chhunga rawn lut Myanmar sipai 276 zinga 36 te hi Officer an ni a, a dang 240 te chu sipai pangngai an ni a, Colonel-in a ho a ni. Ningani khan Myanmar sipai 200 te chu Lawngtlai kaltlangin Lunglei-ah Assam Rifles truck hmanga phurh phei an ni a, Lunglei a zan khat an riah hnuah a then chu Zirtawpni khan Aizawl panpui an ni a, Inrinni khan Zorinpui amite zawng zawng nen Aizawl thlenpui-in Zokhawsang-a Assam Rifles hmun thlenpui an ni. Home Department hotute chuan Myanmar sipaite hi January ni 2 leh ni 9-a an lo tih tawh angin Lengpui thlawhna tumhmun atangin Myanmar Air Force Transport thlawhna hmangin Myanmar ram Sittwe (Akyab) khua a phurhluh an nih leh rin a ni a. Vawiin hian Mandalay atangin Myanmar Air Force Cargo thlawhna lo thlawkin Sittwe khawpui-a phurhluh leh tura ruahman a nih thu thudawnna chuan a sawi.

Nikum kumtawp lam atang khan Myanmar tualchhung buaina thleng avang hian Myanmar Sipai te hi sahimna zawngin Mizoram chhungah an rawn tlanlut ta zeuh zeuh a, nikum November thla khan Myanmar sipai 104 lo lutte chu Indian Air Force Helicopter hmangin Manipur-a Moreh hmunah dah a, an rama hruailuh an lo ni tawh a. Kumin January ni 2 khan Myanmar sipai 151 chu Myanmar Air Force Cargo thlawhna hmangin Lengpui Airport ataning Sittwe-ah dah an ni leh a, January ni 9 khan sipai dang 104 te chu Lengpui Airport atangin Sittwe-ah tho Myanmar Sipai Cargo thlawhna-in dah chhoh an ni tawh bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar