Chhingchhip-a neih Tawitlang Block MHIP Conference Agriculture Minister in a hmanpui

Nimin khan Tawitlang Block MHIP chuan Chhingchhip-a Zonu Leng Run-ah Conference vawi 12-na an hmang a, he hun hi Bialtu MLA leh Agriculture Minister PC. Vanlalruata chuan khuallian niin a hmanpui a ni.
Tawitlang Block MHIP Conference-ah hian Agriculture Minister chuan Conference hmangtute chibai bukin, duhsakna a hlan a. Hmeichhiate chu Pathian in ropui takin a siam thu leh Mipa ropui te phenah Hmeichhe fel tak an awm zel thu sawiin, ram leh khawtlang inrelbawlna pawh hmeichhe tel loin a kal tak tak thei lo tih a sawi a. Midang hmuh leh hriatah ropuina langsar lo mahse, an dinhmun theuhah an ropuiin an pawimawh tih hre turin khawmpui hmangtu MHIP member te a fuih a. Hmeichhe dinhmun chawikanna kal zelah India Sawrkar chuan MP leh MLA-ah te Hmeichhia te tan Seat hauh (reservation) a siam dawn a, chuta tana lo inbuatsaih tur chuan Mizo Hmeichhia te a chah bawk.

Mizo Hnam dam khawchhuahna tur leh kan hnam a lo ropui theih nan pianpun kan mamawh thu pawh Agriculture Minister chuan sawiin, kan tu leh fa lo kal zel turte thinlungah pawh hei hi kan tuh tur a ni, a ti a. Naupang enkawl kawngah nu te mawhphurhna a sang em em tih pawh sawiin, ruihtheih thil leh mipat hmeichhiatna hman khawlohna lak ata kan hnam leh kan ram a fihlim theih nan naupang enkawl kawngah tan kan lak lehzual a ngai a ni tih a sawi bawk.

Nimin-a Tawitlang Block MHIP Conference hi an president Lalsiamkimi chuan kaihruaiin Block Conference hmasa leh tun tum Conference inkara an member boral mi 28 te sunna hun hman a ni a, kum 10 chhung a zawna hruaitu lo ni tawh leh kum 25 chhung hruaitu hna lo chelh tawh te chawimawina hun an hmang bawk a. MHIP General Headquarters leh Serchhip MHIP Sub-Headquarters hruaitute pawhin he Conference hi hmanpuiin thu an sawi bakah lawmpuina an hlan bawk a ni.

Tawitlang Block MHIP Conference hi niminpiah khan neih tan niin Thupui atan ‘Dikna leh Rinawmna Chawinun’ tih chu hman a ni a, niminpiah khan Chhingpuii Run-ah Rorel Inkhawm leh hruaitu thar thlanna hun hmang tawhin, kum 2024-2026 chhunga hruaitu tur thlanna neih ah President atan Lalsiamliani (Chhingchhip Mualpui), Vice President atan K. Lalhmunthangi (Khumtung), Secretary-ah R Sangzeli (Chhingchhip Venglai), Asst. Secretary-ah Hmingthanzauvi (Chhingchhip Venghlun), Treasurer-ah Lalsiamkimi (Baktawng Dawr Veng) leh Finance Secretary-ah H. Lalruatkimi (Baktawng) te chu thlan an ni.

Tawitlang Block MHIP hian Tuikum Bial chhunga khaw hrang hrang 16 huamin an huamchhung ah hian MHIP Branch 19 an awm mek a ni.