Ranchaw siamchhuahna chawlut lova khawtual-a thar man man zawka lei theih nan ngaihtuahna sen tul ti

AH & Vety Minister C. Lalsawivunga chuan ranchaw siamchhuah nana hmanraw mamawh zinga mi Vaimim leh Bekang bakah mamawh dangte pawh phai lam atanga chawlut lova khawtual thar ngeite rate mumal leh man man zawka lei a nih theih nan ngaihtuahna sen a tul thu a sawi.

AH&Vety Minister hian nimin khan AH&Vety Department hmalakna hrang hrang- Animal Feed Plant, Ramrikawn; Zoram Poultry Development Societies (ZPDS) Hatchery Farm, Tanhril; Boar Semen Station, Lawngzawl, Lengpui leh Feed Godown & Feed Plant, Lengpui-te tlawhin hmalakna leh hmachhawpte a enfiah a, heng hmun a tlawhna ah hian Minister chuan ranchaw siamchhuah nana hmanraw mamawh zinga mi Vaimim leh Bekang bakah mamawh dangte pawh phai lam atanga chawlut lova khawtual thar ngeite rate mumal leh man man zawka lei a nih theih nan ngaihtuahna sen a tul thu sawiin, hengte hi Mizoram-ah ngei tha taka tharchhuah theih a nih avangin Support Price mumal tak siama hmalak a tul thu leh zirchianna pawh kalpui mek a nih thu a sawi a. Sa, Artui leh Bawnghnute tam zawk tharchhuak turin ranchaw tha leh man man taka hralh tur mamawh khawp siamchhuah a ngaih thu sawiin, thawktute chu ranchaw quality tha leh hrisel zawk siamchhuah kawngah theihtawp chhuah chhunzawm zel turin a chah bawk.

Department hmalakna leh thlen chinte chu hriat nuam leh lawmawm a tih thu Minister chuan sawiin, ZPDS Hatchery Farm Tanhril hmalakna chu chhuanawm a tih thu leh tun aia hmasawn lehzual tura theihtawp chhuah chhunzawm zel a tul thu a sawi a. Phai lam atanga Artui, Arsa leh Bawnghnute lakluh avanga cheng tam tak State pawna luangral thin chu intodelhna hmanga pumpelh a nih theihna tura tanlak tlan dan tur kawng zawnho zel chu vei tlan a pawimawh thu a sawi a. Intodelh turin engti kawng zawng pawha hmalak a tul thu leh kawng awm thei ang angte dap tlan a tul thu sawiin, hemi kawnga tuimi, tih takzeta hmalatute leh entrepreneur-te thlenga thawhhopui leh bultan sak te ngaihtuah a tul thu a sawi bawk.

Nimin-a Minister in a tlawh Animal Feed Plant, Ramrikawn-ah hian Feed Plant pahnih awmin heng hmangte hian a tlangpuiin nikhatah ranchaw quintal 50-100 her thin a ni a, Ar chaw, Vawk chaw leh Bawng chaw te siamchhuah niin din a nih atanga tun thlengin Ar chaw quintal 76775, Vawk chaw quintal 65934 leh Bawng chaw quintal 55646, a vaiin ranchaw quintal 1,98,355 an herchhuak tawh a ni.

Arsa leh Artuia intodelh a nih theihna tura kum 1987 a din Regional Broiler Chick Farm (RBCF) hi kum 2013-2014 khan tih changtlun niin ‘Zoram Poultry Development Society INDBRO Poultry Hatchery Farm, Tanhril’ tih a ni a. ZPDS Hatchery Farm hi North-East a Breeding farm awmchhun niin thiamna changkang Ar kahrai (Artificial Insemination), Cage system, Automatic drinking system leh Hatchery changkang tak, Setting Machine Artui 3,00,000 leng leh Hatching Machine kar khata Arte 1,00,000 awp keu theite a thuam a ni. Mipui rawngbawl tura hawn a nih May ni 18, 2015 atangin Artui 26,72,302 leh Ar note 19,31,984 a tharchhuak tawh a, Sawrkar-ah chhiah Rs.32,85,679.89 a chhung lut tawh bawk.

National Livestock Mission (NLM) project atanga kalpui Vawkpa chi sawngbawlna tura ruahman Boar Semen Station, Lawng-zawl, Lengpui hi Riverine Forest Reserve huamchhunga awm a nih avanga harsatna awm te Minister hian a hmunah a enfiah a. Lengpui rama Feed Godown & Feed Plant siam mek pawh tlawhin, he project hnuaiah hian SASCE sum cheng nuai 465 hmang leh RIDF-XXVIII (NABARD Loan) sum cheng nuai 744 hmangin Project pahnih kalpui mek te chu a enfiah bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar