Dengue vei hmuh tam ber kumah thi pahnih awm

Nikum (2023) kha Mizorama Dengue natna vei hmuhchhuah an tam ber kum a ni a, Dengue vanga thi pawh mi pahnih an awm bawk a ni.

Health Department chhinchhiahna atanga a lan danin nikum chhung khan Mizoram-ah Dengue vei nia rinhlelh mi 12,949-te thisen endik niin hetah hian hri vei mi 2,060 hmuhchhuah a ni a, vanduaithlak takin mi pahnihin an thihpui a. Dengue vei leh vei lo enfiahna hi sawrkar pawm bik Elisa leh NS1 Antigen-a finfiah chauh a nih avangin hri vei leh thi hi hei aia tam an awm thei nia thudawn a ni.

Health Department chhinchhiah danin kum 2013 atang khan Mizoram-ah Dengue natna vei hmuhchhuah tan a ni a, Dengue natna thihpui erawh kum 2022 atang khan an awm chauh a ni. Chhinchhiah danin kum 2013 atanga January 21, 2024 thleng khan Mizoram-ah Dengue natna vei mi 5,082 hmuhchhuah a ni tawh a, hri vanga thi mi pasarih an awm tawh a. Dengue natna thihpui hi kum 2022-ah mi panga leh nikum-ah pahnih an awm a ni.

Dengue natna vei hi kum 2022 atang khan an pung nasa hle a, kum 2022-ah hian positive mi 1,868 hmuhchhuah an niin nikum khan positive 2,060 hmuhchhuah an ni bawk a. Kumin bikah hian January 21, 2024 thleng khan Dengue kai mi 20 hmuhchhuah an ni a, kumin hian Dengue vanga thi an awm hriat a la ni lo thung.

Comments

Popular News (Last 30 Days)

Vawiin-ah HSSLC Exam result

LPG man bithliah thar