P&E Minister in British Dy. High Commissioner kawm

Power Minister F. Rodingliana chuan British Deputy High Commissioner for Eastern India Andrew Fleming chu Inrinni khan kawmin thil pawimawh hrang hrang a sawipui.

Mizoram Chief Minister Lalduhoma leh British Deputy High Commissioner-ten kumin January 6-a inkawmna an lo neih tawh bawhzuina atana Inrinni kaltaa Kolkata-a an inkawm lehna ah hian P&E Minister F. Rodingliana chuan Mizoram in kawlphetha MW 4000 lai tharchhuak thei tura theihna a neih thu leh tuna tharchhuah chu beitham tak a nih thu a hrilh a. Sawrkar tharin kawlphetha-a Mizoram intodelh mai bakah hralhchhuaktu ni thei tura tanlak a tum thu sawiin, hmalakna kawngah British Deputy High Commissioner chu theihtawp chhuahpui tura sawmin, Foreign Funding leh Foreign Investor-te zawnpui turin a ngen a ni.

British Deputy High Commissioner for Eastern India Andrew Fleming chuan Mizoram chanchinte a lo hriat nual tawh thu sawiin, Power Sector-a investment ti tur foreign company-te a lo zawnpui ngei tur thu Minister hi a lo hrilh a, UK a tuipui ral (overseas) lama investment khawihtu UK Export Finance pawh a lo dawr tur thu hrilhin, Mizoram tan project eng te nge awm thei tih a lo enfiah tur thu a sawi bawk.

Heng bakah hian Andrew Fleming chuan British Army-a Mizo thalai tam zawkte an luh theih dan turte a lo enchian tur thu sawiin, Commonwealth ramte tan ngaihnathiamna thar British sawrkarin a siam thu a sawi a, chungte chu chhawr tangkai dan dap tlan a nih tur thu Minister hi a lo hrilh a. Mizoramin Agriculture Technology (Agritech) lama hmasawn a la ngaih nasat zia a lo hriat thu sawiin, hmalakpui a inhuam thu a sawi bawk a. Minister F. Rodingliana chuan British High Commissioner for Eastern India chu Mizo thlalai, zirlai leh hnathawk tura UK pan tumte'n awlsam zawka VISA an neih theih nana hmalakpui turin a ngen bawk.

Minister F. Rodingliana hian kar hmasa Zirtawpni khan New Delhi Mizoram House-ah Government of India hnuaia PSU lian Water and Power Consultancy Services (India) Limited (WAPCOS) hotute pawh hmuin kawlphetha MW 24 ve ve pechhuak thei tur Tlawng leh Tuichang Hydel Project DPR siam tur chungchang pawh a sawifel pui nghal a. Hemi hnu hian World Bank hotute nen pawh inbiain, World Bank hotute hian tun dinhmunah Mizoram-ah cheng vbc. 411.19 hu hnathawh mek leh la thawh hmabak an neih thu Minister hi an lo hrilh a. Project thar awm thei turte pawh sawiho nghal niin, la bawhzui zel ni se ti a thu dah a ni.

Heng mi pawimawh a kawmna ah hian P&E Minister hi P&E Department-a Secretary Lalhmingliani Hmar leh Chief Engineer (Civil) C. Lalropianga te chuan an tawiawm a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar