Home Minister in Mizoram Police Hqrs. tlawhin District pali tan Mobile Forensic Van a vailiam

Home Minister K. Sapdanga chuan nimin khan Aizawl-a Police Hqrs. tlawhin Mobile Forensic Van pali (4) chu Aizawl, Lunglei, Champhai leh Kolasib-a hman turin a vailiam a. Ruihtheihthil avanga DEF leh Battalion lama sipai thi an awm thin chu thil pawi tak a nih thu a sawi 

Home Minister hian Mizoram Police Hqrs. G.S Arya Mess-ah Mizoram Police hotu kalkhawmte fuihna thuchah sawiin, discipline tha taka kengkawh tur leh State dang Police te chin tha lo chu an tih ve a rem loh thu a sawi a. Police tanglai 8000 vel chauh awm mahse an Uniform te nawtmar a, theihtawp chhuah turin a chah a. Post awl 4000 vel awm leh thil dang mamawhte pawh a tul anga ngaihtuah zel anih tur thu sawiin, ruihtheihthil avanga DEF leh Battalion lama sipai thi an awm thin chu thil pawi tak a nih thu a sawi a, an naute chu khawng taka enkawl a, an mawhphurhna hlen turin a chah bawk.

Home Minister in a vailiam Mobile Forensic Van, hnuchhui nana hman tur te hi pathum (3) chu Basic Model niin pakhat (1) hi Higher Model a ni a. National Forensic Sciences University, Gujarat leh Kwick Soft Solution Pvt. Chennai te kutchhuak niin Higher Model hi Rs. 82,53,482/- man a ni a. Basic Model hi Rs. 44,99,999/- man niin pathum man belhkhawm hi 134,99,997/- a ni a. A vaia a pali man belh khawm chu Rs. 217,53, 479/- a ni a. Assistance to States for Modernization of Police hnuaiah Mobile Van te hi lei a ni. Mobile Van te hi General Investigation Kit, Narcotics Detection Kit, Explosive Detection Kit, DNA Collection & Sexual Assualt Kit a thuam niin Higher Model hi Digital Evidence Investigation Kit leh Nano Pro Digital Investigation Kit a thuam a ni bawk.

Home Minister hian lawmman chi hrang hrang sem nghalin Champhai PS Officer Incharge (OC) hnenah lawmpuina thilpek hlanin Champhai Police Station hi nikum 2023 a Annual Ranking of Police Station-ah Palina dinhmun an hauh avangin kumin Republic Day 2024-ah India President hnen atangin President Medal chu Champhai SP-in a dawng dawn a. Best District in CCTNS Project hnuaia DEF titha ber lawmman chu Aizawl SP hnenah a hlan bakah Inspr. R.K.Rosangliana, CID (SB), Asadharan Aasuchana Kushalata Padak Awardee hnenah leh C/257 Amos P.C. Malsawmzuala, Lawngtlai DEF te hnenah lawmpuina a hlan bawk a ni.