Ramri chungchanga Assam nena indawrna kallai tharthawh leha hmalak tha tih a ni

Mizoram State Boundary Committee chu nimin khan an Chairman leh Home Minister K. Sapdanga hovin an thukhawm a, Assam sawrkar nena indawrna kallai chu tharthawha hmalak leh tha an ti.

Directorate of Forensic Science Laboratory Conference Hall-a Mizoram State Boundary Committee thutkhawm ah hian Home Minister chuan Member leh sawm bikte lawmna thu sawiin, thutkhawm koh a nih chhan leh thil pawimawh dangte sawifiah a. Ramri him tak, mipuite thlamuang taka an khawsak theihna tur nawrchhuah chu an thupui ber a nih thu sawiin, thenawm State te nen kan lungrual tlanna tur kan zawn a pawimawh a ni, a ti a. Sawrkar hmasa hmalakna te chu zahawm a tih thu sawiin, an ngai pawimawh hle bawk tih a sawi bawk. He hunah hian H. Lalengmawia, Commissioner & Secretary, Home Department, Boundary Committee Member Secretary ni bawk chuan report a pe bawk a ni.

He Meeting hian sawrkar hmasa hun tawp lama Mizoram sawrkar leh Assam sawrkar indawrna kaltluang lai, Mizoram inthlanpui neih dawn vanga chawlh lailawk chu tharthawh tura hmalak tha a ti a, hei bakah hian ramri chungchanga ngaihdan hrang hrang awmte sawiho niin hun remchang hmasa berah thutkhawm leh nise an ti a ni.

Boundary Committe thutkhawm hmasa ber hi July ni 30, 2021 khan neih a ni a, thutkhawm vawi 2-na chu September ni 7, 2021 khan neih leh niin a vawi thumna chu November ni 17, 2021 khan neih a ni a, a vawi lina chu September 9, 2022-ah neiin a vawi ngana chu January ni 20, 2023 khan neih leh a ni a. Tun tum hi Mizoram-ah sawrkar thar a pian leh hnua thutkhawm hmasa ber a ni thung.