Sawrkar in Zirtirtu semrual a kalpui dawn

Mizoram sawrkar enkawl zirna In a Zirtirtu indaihlohna awm thin tiz iaawm turin Education Department-in Zirtirtu semrual a kalpui dawn.

School Education Minister Dr. Vanlalthlana chuan Zirtirtu semrual an kalpui dawn tih hi tunhnai khan amah kawmtu Thuthar thehdarhtute hnenah sawiin, “Fel fai takin Zirtirtu sem rual kalpui tum a ni a, Rules awmsa hi siam that a ni ang,” a ti a. Academic Session thar atangin zirna kawngah thil danglam deuh hmuh tur a awm dawn tih sawiin, Lehkhabu lei kawngah awmze nei zawka kal dan tur an ruahman tawh thu te, Samagra hnuaia kalpui tur Pilot Project-ah intodelh zirtir lam hawi kalpui a ni dawn tih a sawi bawk.

Socio Economic Development Programme (SEDP) hnuaia Zirtirtu sang khat chuang bân an nih tur chungchang zawhna pawh chhangin, “March thla chanve thleng hi chhawr tur an ni a, an aiawh tur hi kan ngaihtuah dawn a, hemi mi sang rualte hi chawl mah se harsatna awm lo turin ruahmanna kan nei tawh,” a ti a. SEDP hnuaia Zirtirtu chu Education Department lak a nih loh thu leh an hlawh pawh an khawih lo tih a sawi bawk.

Zirtirtu ten aikal an lak chungchang zawhna pawh chhangin Mizoram sawrkarin aikal lak chu a ngai thu tak a, titawp turin hma a lak thu a sawi a, sawrkar hnuaia thawk Zirtirtu aikal laa hna dang thawkte chu an hna ngaiah an let leh vek dawn a, an thawk chhunzawm duh lo a nih chuan an hna atangin an bânte pawh a ngai dawn tih a sawi bawk.