Thenzawl Dragon Fruits Growers & Marketing Society Assembly Chief Minister in a hmanpui

Thenzawl ram, Lamlian dung zau-a Dragon Fruits chingtu pawl, Thenzawl Dragon Fruits Growers & Marketing Society chuan Inrinni khan General Assembly vawi 3-na hmangin he hun hi Bialtu MLA leh Chief Minister Lalduhoma chuan khuallian niin a hmanpui a ni.
Gaby's Farm-a Thenzawl Dragon Fruits Growers & Marketing Society General Assembly-ah hian Chief Minister Lalduhoma chuan Lamlian dung zau-ah hian sawrkar sum leh huan neitute sum tam tak senral a ni tawh tih sawiin, hmalakna pawh zau taka kalpui mek a nih thu a sawi a. Helai hmun ah hian tam tham takin Dragon Fruits thar mek a nih thu leh a puitlin theih nana an mamawh ber chu a panna kawng a nih avangin a panna kawng en chu a kal chhan pawh a nih thu a sawi a. “Sialsuk dai emaw, a remchanna hmun atanga he in huan hmun panna tur kawngpui siam nan hian cheng vbc. 31.84 kan dah hrang tawh a, kawng grade tha tak siam turin hma kan la dawn a ni,” a ti a. He sum hian black topping na nen vek chuan a daih rih lo mai thei tih sawiin, amaherawh chu contractor ten dik taka an hman phawt chuan tluang taka hman theiha laihna tur chu a daih an rin thu a sawi bawk.


Chief Minister chuan Dragon Fruits thar lei saktu tur Local Soda Pvt. Ltd te nena thawhhona an lo siam chu thil lawmawm tak a tling tih pawh sawiin, “Local Soda te hian kuthnathawktute thlai tharchhuah an leisaka, an process a, hma an sawn zel dawn phawt chuan Hand Holding Policy hnuaiah kan thawkdun theiin a rinawm a ni,” a ti a. Tunhnaiah Mizo thalai fing leh thiam tak tak, entrerenuer tha an rawn pung chho zel tih pawh sawiin, “Heng thalaite hi sawrkar chuan an banah kaiin kan hnuk dawr dawr dawn a ni,” a ti a. “Hmasawnna hna engkimah kan sawrkar chuan a dawngtu beneficiary tur thlanah duhsak zawng a nei lova, mi hlawhtling ngei turte a zawng zawk a ni. Nangni pawh eng party pawh lo ni ula kan thliar lo che u, mahse in huan hi lo tipuitling rawh u,” tiin a chah bawk.

Lamlian dung zau-ah ah hian kum 2021 atang khan chhungkaw 50 ten ram hectare 82.79 a zau ah Dragon Fruit hmun an siam a. Sawrkarin MIDH, FOCUS leh tanpuina awm thei dangte in Unit 129 siamna an pe a, Drip Irrigation System te an pe bawk a. Unit 1 hi ban 200 zel niin Sawrkarin a tanpuina leh an mimal hmalakna te nena belhkhawmin tunah hian Unit 150 an nei tawh a, a vaiin kung 30,000 vel nei ah an inngai a ni. Ban khatah hian kumtin kg. 30 vel a rah thei niin an sawi a, an Dragon Fruit te a puitlin vek hunah chuan kumtin cheng nuai 300 man vel an thar thei turah an inngai a ni. An Dragon Fruit tharchhuah te leisak turin kum thum chhung atan Local Soda Pvt. Ltd te nen inremna an ziak a, kumin atangin an tharchhuah ang ang te Farm Gate-ah kg. khat Rs. 150 zelin an leisak dawn a, a seng hna pawh an thawk nghal vek dawn a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man