Sum tihchingpen thubuai-ah LADC-a CEM nilai leh midang te tang turin an chungthu rel a ni

Special Court (Prevention of Corruption Act) chuan sum tihchingpen thubuaia thiamloh a chantir LADC Chief Executive Member (CEM) V. Zirsanga chu kum 4 tang tur leh cheng nuai 4 chawi turin a hrem a, he thubuai a thiamloh chang midang te hremna pawh puan nghal a ni.

Kum 2012-a Mizoram Sawrkar-in Chhimtuipui District huamchhunga Middle School thenkhat lain hetah hian Lai Autonomous District Council huamchhunga School 18 pawh a tel a, hemi kaihhnawih-ah hian zirtirtu leh thawktu dang mi 41 te thla hnih hlawh Rs. 1,33,56,884/- chu khatih laia LADC Executive Member, Middle School changtu V. Zirsanga leh midang pathum te chuan LADC sum atanga pe tawh anga insawiin, Lawngtlai Treasury Office kaltlangin an la chhuak a. Hei hi chhuichian a nih hnuah Special Judge (Prevention of Corruption Act), Dr. HTC Lalrinchhana chuan Zirtawpni khan heng mite hi sum tichingpen thubuai ah hian thiamloh a chantir tawh a ni.

Nimin-a Court in heng mite hremna a puan danin LADC CEM V. Zirsanga chu thubuai pahnih-a thiamloh chantir a nihna ah kum li chhung lung In tang tur leh cheng nuai li chawi tura hrem a ni a, a sum chawi tur hi a pe thei lo a nih chuan kum hnih dang a tan belh a ngai dawn a. Court-in thiam loh a chantir dang khatihlai-a Lawngtlai District Education Officer, Lalduna Chinzah chu kum li chhung lung In tang tur leh cheng nuai ruk chawi tura hrem a ni a, a sum chawi tur hi a pe thei lo a nih chuan kum thum dang a tan belh anga. Lawngtlai Sub-Hqrs. M/S Teachers Association President, NC. Muankima chu he sum tihchingpen thubuaiah hian a mawhphurtu ber a nih avangin kum nga chhung lung In tang tur leh cheng nuai ruk chawi tura tih a ni a, a sum chawi tur hi a pe thei lo a nih chuan kum thum dang a tan belh a ngai dawn a. Lawngtlai Sub-Hqrs. M/S Teachers Association Secretary, C. Lalchawiliana chu kum li chhung lung in tang tur leh cheng nuai li chawi tura tih a ni a, a sum chawi tur hi a pe thei lo a nih chuan kum hnih dang a tan belh a ngai ang.

Court chuan, zirtirtu laknaa lehkha lem hmanga lut leh kum 1992 vel daih tawha Zirtirtu-a tang tawh anga Service book lem siam tih finfiah mi 30-te chu lung In an lo tan tawh bak hremna dang pek belh loin, cheng nuai ruk theuh chawi turin an chungthu a rel sak bawk a, sum hi an pe thei lo a nih chuan kum thum theuh an tan a ngai dawn thung a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar