Ramchhung hmundang te rualin Serchhip-ah National Voters' Day vawi 14-na hman a ni

National Voters' Day vawi 14-na chu chu nimin khan rampum-ah hman niin Serchhip ah pawh District Bawrhsap leh District Election Officer David Lalthantluanga hovin Serchhip DC Conference Hall-ah hman a ni a, he ni puala zirlaite tana Essay inziahsiakna lawmman sem nghal a ni bawk.

Serchhip-a National Voters' Day hman ah hian Bawrhsap chuan he huna kalkhawmte chu National Voters' Day Chibai bukin, kumin hian 'Nothing like Voting, I Vote for Sure' tih chu he Ni thupui atan hian hman a nih thu leh hei hian a tum ber chu Vote thlak chu thildang zawng aia pawimawh leh Inthlan apianga Vote thlak ngei tura inzirtir a nih thu a sawi a. Khawvel ram zau zawk kan thlir chuan roreltute thlang thei lo ram tam tak an awm thu leh roreltute thlang thei ram tam takah pawh Hmeichhia ten Vote an neihna chu a la rei lo tih sawiin, “Hei vang hian India khua leh tui ten vote thlak thei tura dikna chanvo kan nei hi a hlut zia kan hriata Electoral Roll-a hming awm/chuan chu duhtawk mai lova inthlanpui apianga Vote kan thlak a pawimawh zia kan hriat a ngai a ni,” a ti.

Serchhip District Bawrhsap chuan National Voters' Day chu Election Commission of India din champha ah hman thin a nih thu sawiin, India ram chu khawvel-a Democracy ram lian ber a nih thu leh Vote nei ten Vote kan thlak chu Democracy innghahna lungphum a ni tih a sawi a. Kan aiawha roreltu tur thlang turin Power kan neih thu leh tha kan tih loh te pawh kan paih thei bawk tih sawiin, langtlang leh felfai taka inthlanna kan nei thin te chu lawmawm a tih thu a sawi a. Mizoram Assembly Inthlanpui hnuhnung berah Serchhip District-a Assembly Bial pathum-ah Vote za zela 84.78 a tlak thu leh hei hi District hrang hrang zingah Vote tla thatna ber a ni tih a sawi bawk.

Serchhip SDO (Sadar) leh Election Officer Rebecca Laldinmawii Hrahsel kaihhruaia he hun hman ah hian he huna tel te hian Addl. DC Lalnundika kaihhruaiin 'Voter Thutiam' an chhamrual a. National Voters' Day 2024 puala Serchhip-a Higher Secondary School zirlaite tana Essay Writing Competition tun thla ni 22-a Serchhip DC Office-a buatsaiha tithate hnenah lawmman sem nghal niin pakhatna Vanlalremtluangi, Govt. Higher Secondary School, Serchhip chuan Rs. 3000/- leh Certificate a dawng a. Pahnihna Laldampuia, Eklavya Model Residential School, Serchhip chuan Rs. 2000/- leh Certificate dawngin pathumna Vanlalbuatsaihi, Brilliant Higher Secondary School Serchhip chuan Rs. 1000/- leh Certificate a dawng a, he intihsiakna ah hian zirlai 13 telin intihsiakna a tel midang zawng hi Rs. 500/- theuh pek an ni bawk.

National Voters' Day hi Govt. Serchhip College-ah leh DIET Serchhip-ah pawh hman niin Democracy ram ni hlutna leh chumi atana Vote thlak pawimawh zia inzirtirna hun hman a ni a, heng hun hmanna ah hian 'Voter Thutiam' chu chhamrual a ni bawk.