Serchhip-ah Republic Day vawi 75-na District Bawrhsap hovin hman a ni
Serchhip-a India Republic Day lawmna ah hian Bawrhsap chuan Serchhip District mipuite Chibai bukin duhsakna a hlan a, January ni 26, 1950 atang khan India Danpui chu a taka hman tan a nih thu sawiin, “He ni hi India khua leh tui te tana ni pawimawh leh chhinchhiahtlak, India ram chanchin ziahna atanga thai bo leh ngai tawh loh tur a ni,” a ti a. India Danpui thuthlung hmasa ber chuan mipui rorelna atana thil pawimawh hmasa zual Dikna, Zalenna, Intluktlanna leh Inunauna a tarlang tih sawiin, “India Danpui hnuaia rorelna khawl peng hrang hrang te chuan mipui rorelna kengkawhin roreltu thlan theihna te, mahni dikna leh chanvo humhalh theihna te a buatsaih sak a ni,” a ti a, Kan ram tana sulsutu hmasate, zalenna min thlena Danpui tha tak min siam saktute hre rengin, zahna chibai buk turin mipuite chu a chah bawk.
Serchhip District Bawrhsap chuan kum kalta chhunga Serchhip District-a sawrkar hmalakna hrang hrang tarlangin, Dan leh thupek kengkawhtu kan District Police te inpekna a chhuanawm thu leh kum kalta chhung khan thubuai 175 ziaklutin, pawikhawihtu thiamloh chantir zat chu za zela 97.08 a nih thu a sawi a. Nikum (2023) chhung khan Serchhip District-ah nau piang 435 awmin thi 11 an awm thu leh Infant Mortality Rate (IMR) chu 25.3 niin nu nau chunga thi an awm lo chu lawmawm a tih thu a sawi a. PHE Department hnuaiah kum kalta chhung khan Tui Connection pekchhuah zat chu khawpui-ah 690 leh thingtlang-ah 2622 niin JJM hnuaiah thingtlang In tinin anmahni Inchhungah tui herh haw tur an neih theih nan tan lak niin Serchhip District chhunga khaw hrang hrangah Project 13 thawh zawh tawh a nih thu a sawi bawk.
Agriculture Department chuan Vaimim thar kawngah tan lain Serchhip District chhung thingtlang khaw hrang hranga Vaimim tharchhuah MT 3167 chu Department chuan Vawk chaw leh Ar chaw siam nan a leikhawm sak thu pawh Bawrhsap chuan sawiin, PM-KISAN hnuaiah Serchhip District-a tanpuina dawng thei tur mi 5747 thlanchhuah an nih tawh thu a sawi a. LRS&W Department Serchhip chuan ruahtui khawlna Tank 43, Bench Terrace 64Ha a zau, Check Dam unit 5, Dil pakhat leh Spur unit 16 an siam zawh thu a sawi bawk.
Rural Development Department hnuaiah Job Card Holder 16,033 te tan December, 2023 thleng khan inhlawhna ni 69 siam sak an nih tawh thu pawh Bawrhsap chuan sawiin, DCPO Office kaltlangin kum 2023 January-2024 January chhungin naupang enkawl leh venhim ngai mi 54 hnenah thlatin sponsorship Rs. 4000/- pek an nih thu a sawi a, Swachh Bharat Mission-Urban hnuaiah UD&PA chuan vantlang inthiarna 16 sain a 16 dang an cheitha tih a sawi a, PMSVANIDHI loan chu mi 70 hnenah pek an nih thu a sawi bawk.
Bawrhsap chuan DCSO Serchhip hnuaiah Fair Price Shop 101 awmin ePOS hman vek tawh a nih thu a sawi a, PMFME Scheme hnuaiah mi 4 te hnenah Loan pekchhuah a nih tawh thu sawiin, Serchhip Industries Centre-ah Industrial Registration nei tawh Unit 187 an awm thu a sawi bawk.
Serchhip District inrelbawlna leh sawrkar hmalakna thlawp tlattu Kohhran te, Tlawm-ngai pawl te, Chanchinbumi te leh mipui mimir te chungah Bawrhsap chuan lawmthu sawiin, “In tanpuina leh tawiawmna tel lo chuan sawrkar hian a ruahmanna te hi a tipuitling theilo tih ka hria a ni,” tiin Serchhip District chu District dang te tan pawha entawntlaka kan siam theih nan thawhhopuiah a sawm bawk.
Comments
Post a Comment