Mizoram Governor in India ram State 4 leh UT pakhat din champha lawmna hun a buatsaih

Mizoram Governor Dr. Hari Babu Kambhampati chuan nimin khan Raj Bhavan-ah State pali - Manipur, Meghalaya, Tripura, Uttar Pradesh leh Union Territory of Dadra and Nagar Haveli and Daman& Diu and Diu te Foundation Day lawmna hun a buatsaih.

Ek Bharat Shreshtha Bharat hmalakna hnuaia Raj Bhavan Durbar Hall-a he hun hmanna ah hian Governor chuan heng State leh UT mipui te chibai bukin, hmarchhak State 3 leh State upa tak pakhat leh UT pakhat ten an State leh UT din champha phak an hmang rual chu lawmawm a tih thu sawiin, inpumkhatna tha zawk a lo awm zel theih nan hetianga hun hman ho te hi a pawimawh em em tih a sawi a. He hun pawimawh tak an hman chhan chu India ramah hian mi chi hrang hrang cheng khawm mah ila kan inlungrual a nih tih kan lantirna a ni tih sawiin, “He inlungrualna hi kan chakna thuruk a nih tih kan in hriat thar tir lehna a ni,” a ti. Governor chuan Foundation day lawmna hunah hian India in kum 2027 a ralhmaa ram hausa leh ramchang a nih tum chungchang te leh he hmachhawp atana mitin te mawhphurhna a sawi nawn leh bawk a ni.

Princely State Manipur leh Tripura te hi kum 1949 khan India hnuaiah lutin kum 1956 khan Union Territory atan hlankai an ni a, tuna Meghalaya pawh hi India ramin zalenna a hmuh lai khan Assam ram chhungah la awmin kum 1969 khan State-ah hlankai a ni a, January 21, 1972 khan North Eastern Region (Re-organisation) Act, 1971 hnuaiah khan Manipur, Meghalaya leh Tripura chu State puitlingah hlankai an ni.

Uttar Pradesh hi British India hnuaia United Province tia hriat kha a ni a, a hmaa Province anga awm Agra leh Oudh te pawh UP ah hian rinluh a ni a. January 24, 1950 khan United Provinces chu Uttar Pradesh tia thlak a ni.

Union Territory of Dadra and Nagar Haveli and Daman and Diu hi January 26, 2020 khan ram hran pahnih, Portuguese ram thuneihna hnuaia awm thinte iinsuihfin-a piang a ni bawk.