Lok Sabha Inthlanpui atan Saitual District tlawh

Kumin-a Lok Sabha Inthlanpui neih tur atana inbuatsaihna te thlirin Chief Electoral Officer (CEO) Mizoram Madhup Vyas IAS chuan Inrinni khan Saitual a tlawh.

Mizoram CEO hian Saitual District Election Officer Dr. Lalngura Tlau leh Election Officials te chu Saitual DC Conference Room-ah kawmin MLA Election neih zawh takah Saitual chuan District a nihna angin a vawi khatna atan hmachhawn mahse felfai takin inthlan an buatsaih thei chu Election Official te leh thawktute inpekna vang a ni tih sawiin, lawmawm a tih thu a sawi a. Kan hma a MP Election lo awm tur atan pawh theihtawp a tan la a, a bik takin vote tla tlemna leh Critical Polling Station area bik te vote tla average a pun theih nan hmalakna neih a tul zia a sawi a, SVEEP leh hmanraw hrang hrang hmanga theihtawp chhuah turin a chah bawk.

CEO ho hian kan hma lawka MP Inthlan lo awm tur atan kawng hrang hranga inbuatsaihna tur sawiho a ni a,chung zingah chuan EO, ERO leh AERO te indaihlohna te, Security chungchangte, MLA General Election a vote tla aia hniamlo tura tan lak te a tel a. Vote tlak thatlohna area ah za zela panga (5%) tala Vote tla tisang tura SVEEP hmanga tan lak chungchang te pawh an sawiho a ni.