Mizoram mi ni lo te ram leitu fimkhur turin ti

Land Revenue & Settlement Department hotute chuan Mizoram a cheng nghet ni lo ram lei thinte tan fimkhur a ngaih thu an sawi.

Hemi chungchanga LR&S Secretary thuchhuak chuan, tunlai hian chhan hrang hrang avanga State dang leh ramdang atanga Mizorama rawn lut ten ram an lei nasa nia thu a than thu sawiin, hei hi sawrkar chuan a ngai thu tak hle a, The Mizoram (Land Revenue) Act 2013 sawi angin ram neih chungchangah leh ram leh ram lei chungchangah mipui fimkhur a ngai tih a sawi a. Mizorama cheng nghet, an chhungte January 26, 1950 hma lama cheng tawh emaw, India President-in Constitution Article 342(1) hnuaia Mizoram State tan bik Schedule Tribe atana a puan te ni lo chuan, ram inhlan chhawnah sawrkarin phalna a pe hmasa a nih loh chuan Tribal ni lo hnamdang hnenah ram hlanchhawn tur a ni lo tih a sawi a. ‘Sawrkarin phalna a pek hmasak ngai bikah chuan phalna a pe hmasa a nih chauh loh chuan ram inhlanchhawnna lehkha chu register theih a ni loa, Land Record-ah pawh chhinchhiah theih a ni lo,’ a ti a. Dan loa ram inhlanchhawn reng reng chu thu tlinga ngaih a ni loh bakah eng Court-ah mah dan anga kenkawh (enforce) theih a ni lo tih a sawi bawk.