Mizoram atanga Myanmar Sipai te phurchhuak tur Thlawhtheihna Lengpui Airport-ah a chesual

Myanmar atanga Mizoram chhunga rawn tlanchhia Myanmar Sipai te phur haw tura Thlawhtheihna lo kal chu nimin khan Lengpui Airport-ah chesualin vanneihthlak takin thi an awm lo a, mi 14 chuanna he Thlawhtheihna chesual avang hian mi 8 te chuan hliam an tuar a ni.

Mizoram sawrkar Aviation hotute sawi danin he chetsualna hi nimin chawhma dar 10:20 vela thleng niin Myanmar Airforce thlawhtheihna hi tun thla ni 17-a Lawngtlai District Bandukbanga-a Myanmar sipai tlanchhiate phur tura lo kal a ni a, niminpiah khan tum hnih rawn kal tawhin tum khatah mi 100 zel phurin, niminpiah lama a phur haw bak mi 72 te phur haw leh turin nimin khan Lengpui Airport-ah hian a rawn tum leh a, Lengpui Airport Runway-a a tlan laiin kawngsir-ah a kawi thut a, chetsualna a thlen chhan hi chiang taka hriat a ni lo thung a ni.

Myanmar Airforce Thlawhtheihna, Y8B200 Chinese Aircraft chesual-ah hian mi 14 chuangin mi 8 te chuan hliam an tuar a, Lengpui PHC panpui nghal niin ngaihtuahawm lutuk an awm lo a, Assam Rifles-in an hmunpui lamah Myanmar sipaite hi an hruai nghal a ni.

Myanmar Airforce Thlawhtheihna chesual vang hian nimin khan Lengpui Aiport chu khar nghal a ni a, Thlawhtheihna thlawkchhuak turte pawh thulh nghal vek a ni a. Vawiin atang hian Thlawhtheihna hi a pangngaia service tir leh tum niin chetsualna hmun enfiah tur hian Vawiin-ah Directorate General of Civil Aviation (DGCA) Kolkata atangin mithiamte an lo kal dawn a ni.

Tarlan tawh angin kar kalta Nilaini khan Lawngtlai District-a Bandukbanga khua ah Myan-mar sipai 276 te chu an ralthuam te nen an rawn tlanchhia a, heng te hi kar hmasa khan Aizawl lamah lak niin Lengpui Airport atang hian Myan-mar Rakine State lamah hruaichhuah an ni.

Hemi hma nikum November thla khan Myanmar sipai 104 lo lutte chu Indian Air Force Helicopter hmangin Manipur-a Moreh hmunah dahin an rama hruai luh an lo ni tawh a. Kumin January ni 2 khan Myanmar sipai 151 chu Myan-mar Air Force Cargo thlawhna hmangin Lengpui atangin Sittwe-a dah an ni a, January ni 9 khan sipai dang 104 te chu Lengpui atangin Sittwe-ah tho Myanmar sipai Cargo thlawhtheihna-in dah chhoh an ni tawh bawk a ni.