Governor hovin Pariksha Pe Charcha lo chhim a ni

Zirlaite’n mahni inringtawk tak leh nuam ti taka Exam an hmachhawn theih nana Prime Minister Naredra Modi-a’n ruahmanna a siam, ‘Pariksha Pe Charcha’ chu nimin khan Bharat Madapam, ITPO, New Delhi-ah neih a ni a, he hun hi Mizoram atang pawhin Video Conference kaltlangin Zirlaite, nu leh pa te, zirtirtute leh School Education official te chuan Aizawl-a Govt. Mizo H/S Multipurpose Hall a\angin an lo chhim a, he hun hi Governor Dr. Hari Babu Kambhampati te nupa chuan an hmanpui a ni.

Nimin-a he hun hman ah hian Governor chuan ‘Pariksha Pe Charcha’ program chu zirlai tam takin Exam an huphurh avanga rilru lama harsatna an neih thin tih ziawm a nih theih nana Prime Minister hmalakna pawimawh tak a ni tih a sawi a. Prime Minister chuan zirlai tam takin Exam hmachhawn huphurhna avanga harsatna an tawk a vei thu leh a mah ngei pawhin zirlaite kawng kawhhmuhna atan lehkhabu ‘Exam Warriors’ tih a ziah thu a sawi bawk.

Governor chuan Zirlaite chu ram nghah-fak te an nih avangin ram tan an hlu tih sawiin, an rilru hriselna lam hi kan ngaihpawimawh tlan a ngaih thu a sawi a. “Exam a ni emaw, harsatna engpawh huaisen tak leh huphurhna nei lova hma-chhawn a nih phawt chuan harstna pal ngamtu chuan a hnuah hlawhtlinna lian zawk a hlawh chhuak thin,” a ti a. Zirlate tan Exam hi a tawpna a ni lo tih pawh sawiin, “Mark hmuh tlem pawh hlawh-chhamna tehna a ni lova, mark hmuh tam pawh hlawhtlinna tehna a ni hek lova. Rilru chak leh chak lo te hian hlawhtlin theihna an neih dan a intiat vek a, an hlawhtlinna tur kawng erawh a danglam mai a ni,” a ti a. Exam chungchanga zirlaite harsatna awm thei te zirlai leh nu leh pate an ngaihven thuai a, an tanpui a pawimawh tih a sawi bawk. Tarlan tawh angin he hunah hian Mizoram a\ang pawhin zirlai naupang pahnih an tel a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar