Minister in Vaivakawn Zohnuai kawng tlabal an tlawh

Vaivakawn Zohnuai kawng tlabal in harsatna dang a thlen tawh loh nana hmalak dan tur leh kawng siam that dan tur chu nimin zing khan DM&R changtu Minister K. Sapdanga leh PWD changtu Minister Vanlalhlana te chuan a hmunah an enfiah.

He hunah hian DM&R Minister K. Sapdanga chuan leimin avanga Vaivakawn Zohnuai peng kawng tlabal thawmthat thuai chu sawrkarin a ngaih pawimawh thu a sawi a. Mamawhna nasa leh hmalak ran ngai a nih avangin a siamthat nana senso tul angte pawh ruahman a nih tur thu a sawi a. Chak zawka a tul angte buaipuia hma la turin Line Department hotute a chah bawk. PWD Minister Vanlalhlana pawhin PWD anga an tih theih chin chu tha taka tih an tum thu sawiin, “Department Officers-te pawh thahnemngai taka thawk turin ka chah nawn leh duh a ni. Heng thilah hian Department hrang hrang kan thawhho a tul a, harsatna awm lova tha taka hna thawh a nih theih hi ka duh ber a ni” a ti bawk.

Ruahman dan chuan Vaivakawn-Zohnuai peng lei tlabal hi RCC Balcony hmanga siam tum a ni a. Hemi atan hian cheng nuai 218 senna tur DPR siam niin, hemi tur hian SASCI sum cheng nuai 60 chu dahfel tawh a ni a, a dang chu Fund remchang atanga pawh tum a ni. Hmalakna hmasa atan tuna leithaw inchhek mek Cubic Metre 4900 dawn chu thenfai thuai tum a ni a. Leih paih dan tur, a paihna tur leh hemi avanga kawng khar lailawk ngai leh bawhzui ngai dangte chu DDMA thutkhawmah ngaihtuah nise tih a ni a. Line Department hrang hrang hotute atangin report ngaihthlak a ni bawk.

Vaivakawn Zohnuai peng to Ropaiabawk, Chawlhhmun panna kawng bik chu mamawhna a nasat avangin hman lailawk turin LMV chin kal theih nana chei that hmasak niin, he kawng siam thar hi January ni 19, 2024 khan hawn a lo ni tawh a. Hmalak lehna tura ruahman chu leimin avanga harsatna dang thleng tawh lo tura furpui thlen hma ngeia leithaw chhek khawl paih fai, tui luankawr tha tawk tak leh kawng tha leh tlo tur RCC Balcony hmanga siamte a ni.

Comments

Popular News (Last 30 Days)

LPG man bithliah thar