SSA Zirtirtute leh Tripura YMA ten CM kawmin JESAM in CM Relief Fund an chhunglut

Chief Minister Lalduhoma chuan Mizoram SSA Teachers' Association hruaitute chu nimin khan a Pisa-ah kawmin an harsatna te a ngaihthlak sak.

Chief Minister hian Zirtirtute dinhmun siamrem an tum dan leh zirna kawnga sawrkar policy tlangpuite Mizoram SSA Teachers' Association hruaitute chu lo hrilhin, an harsatna thlen te chu a changtu department hotute a lo sawipui tur thu hrilhin, engkim inringtawn taka kalpui tha a tih thu a lo hrilh a. High Court thuremna Mizoram Sawrkar-in a tihhlawhtlin loh avanga kum liamta a Mizoram SSA Teachers' Association-in sawrkar laka thubuai an thehluh mek chu hnukdawk tura ngenin, “Sawrkar thar in thinlung tharin in dinhmun a ngaihtuah dawn a ni,” a ti bawk.

Mizoram SSA Teachers' Association hruaitute hian Chief Minister hnenah hian lawmthu sawiin, a hnathawh zelna turah duhsakna an hlan a, Chief Minister ngenna te chu an pawlin rang taka an lo ngaihtuah tur thu an sawi a ni.

Nimin vek khan Chief Minister Lalduhoma hi Tripura Group YMA hruaitute chuan a Pisa-ah hmuin lawmpuina an hlan bawk a. Tripura Group YMA hruaitute hian Chief Minister chu, “Zofate Chief Minister ah kan ngai che a, I Office-ah ngei lawmpuina rawn hlan che kan duh avangin kan rawn kal a ni,” tiin Chief Minister lawmpuina an hlan chhan an sawi a. Chief Minister hi Thuziak an hlan bakah Tripura Group YMA inkhawmpui-ah Khuallian atan an sawm nghal bawk a ni a. Chief Minister chuan Tripura Group YMA hruaitute hi an Group YMA chanchin leh an hmalak dante lo zawtin lawmthu a hrilh a, thil pawimawh hrang hrang an sawiho nghal bawk a ni.

Chief Minister Lalduhoma hi nimin khan Junior Engineer Service Association of Mizoram (JESAM) te chuan a Pisa-ah hmuin an inkawm bawk a, Chief Minister Relief Fund atan Rs. 50,000/- an pek bakah Chief Minister hi chawimawina thuziak an hlan bawk a ni. Chief Minister hian lawmthu sawiin, tangkai takin an thilpek chu hman a nih tur thu a lo hrilh a ni.

Comments

Popular News (Last 30 Days)

LPG man bithliah thar