Aizawl-ah Governor hovin Republic Day hman a ni

India Republic Day 2024 chu nimin khan Mizoram hmun hrang hrangah urhsun taka hman niin Mizoram-a he ni lawmna pui ber Aizawl Lammual-a neih ah Governor Dr. Hari Babu Kambhampati chuan India Hnam Puanzar pawtparhin Parade Contingent 27 ten Hnam Puanzar zahna chibai an buk chu a chhanglet a ni.

Aizawl-a Republic Day lawmna ah hian Governor chuan mipuite hnenah thuchah sawiin Zoram mipuite chu duhsakna chibai a buk a, “January ni 26, 1950-a ram Danpui kan inpek atang khan India ram chu mipui thlante rorelna ram lian ber kan ni ta a. He kan ram Danpui hi khua leh tui zawng zawng tan dikna, zalenna leh intluktlanna hum sak tlat tura duan a ni a. A pawimawh em avangin Vawiin-ah pawh ram pumah a lawmna hun kan hmang tlang a ni,”a ti.

Tunhnaiah Inthlanpui muanawm, felfai leh entawn tlak taka kalpui a nih avangin Mizoram mipui zawng zawng chungah Governor chuan lawmthu a sawi a. Sawrkar hnathawkte leh dan leh thupek kengkawhtute bakah, tlawmngai pawl hrang hrangte, Kohhran leh a bik takin Mizoram People’s Forum (MPF) te’n inthlanna felfai tak nei tura theihtawp an chhuah avangin thinlung lawmthu a sawi a. Hmasawn tur chuan remna leh muanna a pawimawh tih sawiin, Remna leh muanna venhim hna thawktu Police leh dan kengkawhtu hrang hrangte hmalakna mai bakah, NGO te, Kohhran te, Thuthar thehdarhtute leh mipui thahnem ngaihna avangin India rama State muanawm ber kan la ni chhunzawm chu lawmawm a tih thu a sawi bawk.

Governor chuan a sawrkarin hma a lak uar na tur lai te tarlangin, Mizoram Sawrkar chuan ngaih pawimawh tur, khawtlang mamawh bulpui paruk atan zau takin hma a la dawn tih a sawi a. Chung zingah hian Sawrkar inrelbawlna tha siam, Kil tina hmasawnna ngelnghet leh tlo siam, Thil siamna lam (industry) puihbawmna pek leh ‘Bana Kaih’ te, Khawtlang himna (social security) - hriselna leh eibar a vantlang himna leh thlei bik awm lova hmalak te, Thalaite hmakhua ngaihtuah te, Environment humhalh te, Thil tum hun rei zawk mamawh (Long term development project) siam a hmasawnna lian tham thlen leh Mahni thil tharchhuah leh siamchhuaha innghat economy nei tur a hmalak te a tel thu a sawi a ni.

Hei bakah hian a sawrkar chuan State sumpai dinhmun sawhnghet a, tihmasawn turin hmalak a tum a tih Governor chuan sawiin, “Sawrkar sum hmuh leh hmanral inbuktawk leh sum enkawl dan felfai tak te, inrenchem, hmasawnna kaihhnawih lova sum hman tihtlem leh hmanraw hrang hrang enkawl leh hman dan tha leh felfai zawk te kalpui tum a ni ang a. Kan sumpai dinhmun sawh nghet turin insingsak nan hun engemaw chen chu kan mamawh ngei dawn a ni,” a ti bawk.