Ramkalna a chesual boral

Saitual Chhim Veng-a cheng C. Zosangzela (57) chu nimin khan an ramvahna ah chesualin kham-ah a lum a, a hmunah a boral.

Thudawn danin C. Zosangzela hi Sabbath serh thin niin nimin zing khan a thiante pahnih nen ramvak tura chhuakin Saitual chhuahlam Mualzen ram-ah an kal a, a thiante nen hian inthendarhin zing dar 8:00 vela an haw tur innghakkhawm chu a rawn lan ve tak mai loh avang leh darkar khat vel hnuah pawh a rawn lan tak loh avangin a thiante hian an zawng a. A kalna lama an chhui zui hnuah mihring au thawm hriain kham chhengchhe tak hnuaiah an zuk hmu a, a thian ten an zuk hmuh hnu rei vak lo ah hian a hliam tuar lovin a boral zui ta niin an sawi.

C. Zosangzela chetsualna hi kham chhawr-dawh sang tak a nih avangin ruang in lachhuak tur pawhin hun a duh rei hle niin a hmuna kal te chuan an sawi a. A nupui leh a fate pathum kalsanin a ruang hi nizan khan lumen a nih hnuah Vawiin hian vuiliam a ni ang.