Ruihhlo do chungchang ah inrawnkhawmna nei

Social Welfare and Tribal Affairs, Women & Child Development Department buatsaihin nimin khan Mizoram Kohhran hrang hrang Hmeichhe hruaitute leh Mizo Hmeichhe Insuihkhawm Pawl (MHIP) General Hqrs. chuan Kohhran leh Inchhungkhur theuh a ruihhlo dona kawnga hmalak dan tur leh enkawl dan tur zirhona leh inrawnkhawmna Aijal Club Conference Hall-ah an nei.

He inrawnkhawmna hunah hian Social Welfare Minister Lalrinpuii chuan ruihhlo in khawtlang nun a thalo zawnga a nghawng nasat zia leh, ruihhlo avanga thi an tam dan te, naupang zingah ruihhlo ti tan an pun belh dan leh ruihhlo man zat a tam zel dan te a sawi a. Heng avang hian ruihhlo do hna ngawrh taka thawh thin chu tha thlah lova nasa lehzual zawka hmalak chhunzawm a tul thu a sawi a. Sawrkar pawhin ruihhlo do a ngaihpawimawh zia sawiin, sawrkar leh tlawmngai pawl thenkhat chauh tih tur a nih loh thu te, kan zavai tanrual a pawimawh thu a sawi a. Khawtlang nun siamthat kawnga hmeichhiate pawimawhna sawi telin, ruihhlo do kawngah pawh nasa takin sul an sut kuak theih tur thu a sawi bawk.

He hunah hian Lalhlupuii Sailo, CEO, MSD&RB, Social Welafre & Tribal Affairs Department chuan Mizoram a naupang leh ruihtheihthil inkaihhnawihna (Child Drug Survey) chungchang ah presentation pe in, Vanlalhruaii, MSD&RB, Social Welfare & Tribal Affairs Department hnen atangin Kohhran leh pawl theuha ruihhlo dona leh ruihhlo hmansual laka invenna kawnga hmalak dan tur zirtirna ngaihthlak a ni.

Presentation-ah hian kum 2022-a Mizoram School 122 a zirlai 10,733 (kum 10 -17) zirchianna ah ruihtheih thil eng chi pawh vawi khat tal ti tawh an awm em tih zawhna chhanna atanga a lan danin High School leh Higher Secondary School zirlai aiin Middle School kal zingah ti an tam zawk a. He zirchianna atang hian rilru hriselna leh Inchhung khur boruak leh zu/ruihhlo inkaihhnawihna te, naupang ruihtheihthil khawih te hian puitling ruihtheihthil khawih ang tho an hman dan te tarlan a ni.