Fisheries Department leh YMA thawkdun dawn

Kan ram lui-a nungchate an lo inthlahpun zel theih nan leh awmze nei leh tha zawka humhalh a nih theih nan Fisheries Department leh Central YMA te chuan nimin khan kum hnih chhung atan Thawhhona Thuthlung an ziak.

Fisheries Minister Lalthansanga Pisa-a Thuthlung an ziah ah hian Fisheries Department aiawhin F. Vanlallawma, Director, Fisheries Department leh Central YMA aiawhin Lalhmachhuana, President ten an hming an ziak a. Hetiang Thawhhona Thuthlung hi kum 2021 khan ziah a lo ni tawh a, hlawhtling taka kalpui niin Luidung Nungcha humhalh kawngah pawh nasa takin hmasawnna hmuh tur a lo awm tawh thin a ni. 

Mizoram Fisheries Act, 2002 leh Mizoram Fisheries Rules, 2019 hian phalna nei lo a luidung nungchate man leh an chenna hmun tibuai leh ti bawlhhlawh zawng a hmalak a khap tlat a, he thawhona hmasa neih chhung hian Mizoram Fisheries Act leh Rules hnuaiah dan bawhchhia mi 27 te hremna pek lo ni tawhin nikum YMA Khawmpui lian Biate a neih ah khan luidung humhalh tha YMA Branch leh Group pathum (3) ve ve te hnenah lawmman hlan an lo ni tawh bawk a ni.