Check Gate-a Hmunphiah kaltlang lo enfiah duh

Minister hlui Zodintluanga Ralte chuan Mizoram sawrkarin Vairengte Forest Check Gate-a Hmunphiah phur an kaltlang tir lo chu enfiah turin sawrkar a phut tih a sawi.

Inrinni khan Zodintluanga leh MPCC Secretary te chuan Vairengte Forest Check Gate tlawhin Hmunphiah chingtute harsatna a hmunah en in an harsatna te an zawtfiah a, kum dangah chuan tun ang hunah hian Hmunphiah hi a man (rate) sâng tak takin an hralh tawh thin nia sawiin, Kut hnathawktu ngai pawimawh in ti sawrkar in hetia kut hnathawktute tharchhuah ve chhun Hmunphiah Check Gate-a kaltlang an phal lo chu sawrkar mawhphurhna ah ngai in, Mizoram mipui zahlohna leh Hmunphiah chingtute hmuhsitna a nih thu a sawi a. “Hmunphiah hi a keh hunlai tak niin, a par tawh chuan kg. 1 Rs. 8 bawrin an hralh thei chauh a. Aman a tlahniam nasa hman tawh hle thin a. Hetiang anih avang hian sawrkar thuchhuah nghakin an Hmuhphiah pâr tur hi beidawng takin an thlir mek a. Sawrkar tharin Hmunphiah chingtute tana thutlukna a la siam theih loh avanga an harsatna hi a rang thei ang bera chinfel sak turin Mizoram sawrkar ka ngen a ni,” a ti bawk.

Hetihlai hian Kolasib-a Land Resources, Soil & Water Conservation Department chuan khaw tinah Hmunphiah ching te chu Association/Society din tura hriattirin, an Hmunphiah chu a ro (dry) in RR Associates, Damalsosh, Shilobari, Kamrup, Assam in kg-ah Rs.100/- aia tlawm lovin an lei tur thu leh a sang lamah chuan Association/Society te nena inbiakremna a nih tur thu an hrilh a. RR Associates leh Association/Society inremna hi LRS&W Department in a hriatpui tur thu leh a bak chu Department in telna a nei loh tur thu an sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man