Education Department-ah aikal chhawr 601 awm

Mizoram sawrkar School Education Department hnuaia thawktu zingah aikal chhawr mi 601 an awm mek.

RTI hmanga Zonet zawhna School Education Department-in a chhannaa tarlan a nih danin, Mizoram sawrkar-in a hnuaia thawk aikal chhawrte in-report tur a tihah School Education Directorate hnuaia thawk mi 601-in aikal an chhawr tih an report a, aikal chhawr zinga 547 chu Zirtirtu an ni a, a bak 45 chu thawktu dang UDC, LDC, IV Grade leh Peon-te an ni a, aikal chhawr zingah hian Work Education Teacher, Contract-a thawk, CSS Hindi Teacher, SSA Teacher, MR Teacher leh SEDP Teacher-te pawh an tel a ni.

District Education Office hnuaiah Lawngtlai-ah aikal chhawr tam berin 58 an awm a, Aizawl-ah 31 leh Lunglei DEO hnuaiah 21 ten an dawt a, Khawzawl DEO hnuaiah aikal chhawr pakhat awmin, aikal chhawr tlem berna a ni. Sub-Division Eduation Office hnuaiah Lunglei South SDEO hnuaiah aikal chhawr an tam ber a, mi 46 an awm a, Aizawl East-ah 44 leh Aizawl West-ah 34 ten an dawt a ni.

Aikal chhawr report-na lehkhaah hian an hming, an hnathawh leh hnathawhna hmun te, pay level, aikala an chhawr hming, aikal nen an inlaichinna, lawmman an pek zat leh aikal an chhawr chhante tarlan a ni a. Aikal chhawr ten an chhawr chhan an tarlan zingah damloh vang leh chhungte damlo enkawl ngai tih te chu a tam zual a ni a, zirna chhunzawm vang te, zu in nasat avanga chhawr tlak loh tih te, In luah tur awm loh avang leh motor service awm loh vang tih te, nupa inkar buai vang te, an thawhna hmuna chengte tawng thiam loh vang te, Sakhaw thil avang te leh sikul tihtawp ngai chhanchhuah nana department leh Local Council-te ruahman anga aikal lak tir tih te an ni hlawm a, chhan hriat loh mi 33 an awm bawk.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result