Bangladesh nena insumdawn tawnna sawipui

Commerce and Industries Department changtu Minister F. Rodingliana chuan niminpiah khan Bangladesh High Commissioner Md. Mustafizur Rahman kawmin Mizoram leh Bangladesh insumdawn tawnna chungchang a sawipui.

New Delhi-a an inkawmna ah hian C&I Minister chuan kum 2022-ah Mizoram leh Bangladesh insumdawn tawnna tur inremna ziah tawh a nih laiin a tawn tawnah infrastructure mumal buatsaih anih loh avangin tun thlengin insumdawn tawnna mumal zawk a la kalpui theihloh thu Bangladesh High Commissioner hi a hrilh a. Inkalpawhna tha - khawmual leh lui tui chunga siam chu pawimawh hmasa a tih thu leh Bangladesh pawhin hma la ve se a duh thu a sawi a ni.

Bangladesh High Commissioner chuan C&I Minister thu sawi hi a tawmpui thu sawiin, Mizoram leh Bangladesh insumdawn tawnna tura ruahmanna awmsate tihlawhtling turin Central Sawrkar a Ministry of External Affairs lam an pawimawh thu leh nasa lehzuala nawr tlan a tul thu a sawi a. Mizoram thlai tharchhuah zingah Sawhthing leh Aieng te chu Bangladesh-ah mamawhna a sang hle tih pawh sawiin, inkalpawhna chungchang ah a theih anga Bangladesh in hma an lo lak tur thu a sawi bawk a ni.