Agriculture Department chu Agriculture & Farmers' Welfare Department tia thlak tuma hmalak mek a ni

Agriculture Minister PC. Vanlalruata chuan Agriculture Department hming chu ‘Agriculture & Farmers' Welfare Department’ tia thlak tuma hma lak mek a nih thu a sawi.

Agriculture Minister hian nimin khan Thingdawl-a Agriculture Farm, Krishi Vigyan Kendra (KVK) Kolasib hmun leh Kolasib-a District Agriculture Office te tlawhin amah lo dawngsawngtute hnenah kut hnathawktute hlawhtlinna leh din chhuahna atan sawrkarin theihtawpin hma a la dawn tih a sawi a, kuthnathawktute hamthatna chu sawrkarin a ngaih pawimawh ber pakhat a nih dawn avangin Agriculture Department hming pawh ‘Agriculture & Farmers' Welfare Department’ tia thlak tuma hma lak mek a nih thu a sawi a. “Kut hna thawktute'n an thil tharchhuah hralhna tur (market) tha tak a awm sa tih hriaa ngaihngam taka hma an lak theih nan market ngaihtuahsak an ni dawn a, kum tharah market engemaw zat puan belh tum a ni,” tiin, thil thar lei tur zingah buh lei tel tuma hmalak a nih tur thu leh ram neih chungchangah inkhuahkhirhna felfai zawk a awm theih nan Mizorama leilet leh huan ram neitu zawng zawng khawl hmanga chhinchhiah (digitalise) tum a nih thu a sawi bawk.

Agriculture Minister chuan sawrkar hmalakna hrang hrangah hmasawnna ngelnghet leh tlo zawk a awm theih nan zirchianna leh zirbingna (research) behchhanin hmalakna kalpui a ni dawn tih a sawi a. Thawktu indaihlohna nasa tak a awm chungin, hna lak belh theih a nih hma chu thawktu awmsa te'n hnathawh tur a lo tam deuh a nih pawhin thahnem ngai lehzuala an thawh a beisei thu a sawi a. Kolasib KVK ram mimal tana sahthlak tuma hmalakna chungchangah DC atangin hma la chhunzawm lo turin Stay Order chhuah a nih tawh thu sawiin, kuthnathawh thil chawisan a nih theih nan leh sawrkar a\anga hmasawnna tura hmalakna atan sawrkar ram awmsa chu roh a tul avangin ram sahthlak chu phal a ni dawn lova, ram pek tuma hmalakna awmsa pawh sut vek a ni dawn tih a sawi a. Chutih rual chuan chenna In leh lo neilo te chu thlaphang lo tura chahin, an dinhmun chu sawrkarin a ngaihtuah tur thu a sawi bawk a ni.

Agriculture Minister hian Thingdawl Agriculture Farm-a hna thawh mek pahnih - NABARD RIDF sum cheng nuai 150 hmanga Seed Processing & Seed Storage Unit sak mek leh cheng nuai 258.89 senga Solar Powered Cold Storage for Potato Seed sak mek te chu a hmunah tlawhin a enfiah nghal a. He'ng hna pahnih ah hian Civil Work chin chu thawh zawh tawh niin, a pumpuiah hna thawh tur za zela 50 vel chu zo tawh anga ngaih a ni.

Comments

Popular News (Last 30 Days)

LPG man bithliah thar