Lungchhuan PES a kangral

Serchhip District chhung Lungchhuan khuaa Presbyterian English School chu nizan hmasa dar 8:00 vel khan a kang a, bungrua engmah chuh hman a ni lo.

Lungchhuan khuaa Presbyterian English School hi Assam Type Building niin Lungchhuan Presbyterian Kohhran Biak In atanga meter 200 vel leka hlaa awm a ni a, nizan hmasa a Inkhawm an ban hma deuhin School Building hi a kang tih hriat niin mi tlawmngai te tlankhawm mah se thelh theih a ni lo a, mihring thi leh hliam tuar an awm hriat a ni lo a, kangmei chhuah chhan hi chiang taka hriat a ni lo bawk.

Lungchhuan khuaa Presbyterian English School hi kum 2005 a din niin KG atanga pawl 8 thleng zirna a awm mek a, Zirlai mi 74 awmin Zirtirtu mi 9 an awm a, he School building kang ta hi kum 2019-a hawn kha niin tun tumah hian he School Office leh Classroom te a kangral vek a. Delhi-a cham mek Bialtu MLA Lalmuanpuia Punte chuan he thil thleng hi pawi a tih thu leh a tawrhpui thu sawiin, hnatlang te thingpui lumna atan nimin khan Rs. 5000/- a thawn nghal a. MNF Hqrs. a Secretary Lalremruata Chhangte pawhin Lung-chhuan VC hnenah Rs. 2000/- leh School Managing Board-ah Rs. 5000/- bakah Silpouline 3 a pe nghal bawk a ni.

Tuichangral Zirlai Pawl chuan Lungchhuan PES Building bungrua engmah chuh hman loha a kangral chu pawi an tih thu sawiin, School Building sak that leh thuai anih theih nan a theih chinah theihtawp an chhuah dawn thu thuchhuah siamin an tarlang a, Zirlaite pawhin zirna khaihlak lo a an zirlai an chhunzawm leh theihnan theihtawp chhuahin hma an lakpui tur thu an sawi a. Zirlaiten an zirna an chhunzawm leh nghal theih nan PES, Lungchhuan pual hian vehbur khawn relin, Gpay hmangin Ph. No. 8794005597 (Sama Ralte, Treasurer TCZP)-ah emaw, Bank Account hmangin Hranghmingthanga (Vice President TCZP) Mizoram Rural Bank-a Account No. 97009335132-ah pawisa thawh turin mipuite chu an ngen a ni.