Mizo hmeichhiate'n dinhmun sang tak tak an chelh theih zelna tura tan lak a pawimawh thu sawi

Social Welfare, Tribal Affairs, Women & Child Development Department changtu Minister Lalrinpuii chuan Mizo hmeichhiate'n dinhmun sang tak tak an chelh theih zelna tura tan lak a pawimawh thu a sawi.

National Girl Child Day 2024 denchhena District puma hman tur Beti Bachao Beti Padhao (BBBP) Scheme tlangzarhna hun nimin-a a Pisa-a neih ah Minister Lalrinpuii chuan BBBP thiltum ber hmeichhe naupang humhalh leh chawikan a nih angin department mi leh sate leh kalkhawmte chu theihtawp chhuah turin a chah a. Kan naupai laia mipa nge hmeichhia tih hriat tuma thil tih chu dan kalh tlat a ni tih hria a, eng mi pawh lo piang se an fate chu thliar lo turin a chah a. Mizo hmeichhiate'n dinhmun sang tak tak an chelh theih zelna tura tan lak a pawimawh thu leh infiamna lama hmeichhiate'n hma an sawn zel thu sawiin, hlawhtlinna an chan zel theih nan anmahni enkawltu nu leh pate'n an fanute an enkawl dan leh an zirtir dan a pawimawh thu a sawi a, an tawngkam hman pawh an fimkhur a ngaih thu a sawi bawk.

Women & Child Development-a Deputy Director (W) Flora Laltanpuii tarlan danin National Girld Child Day hi kumtin January 24-ah hman thin niin kuminah pawh Ministry of Women & Child Development kaihhruainain Hmeichhe naupangte ni pual Hapta hi January 19 atanga January 25 thleng hman a ni dawn a. He ni denchhen hian Programme hrang hrang hman thin niin kuminah pawh thingphun, Signature Campaign leh pa leh fanu thlalak intihsiakna buatsaih a ni a. Hei bakah hian hmeichhe naupang zirna leh kawng danga mi hmingthate chawimawina leh hmeichhe naupangte ni, January 24-a Mizoram puma Sawrkar damdawi In a hmeichhe nau piangte lawmpuina thilpek neih tura ruahmanna kalpui mek a ni bawk.

Beti Bachao Beti Padhao (BBBP) Scheme hian a tum ber chu Sex Ratio tih that a, hmeichhe nau piang tihpun a ni a, nimin-a he ni hman denchhen hian New Secretariat Complex-ah Minister leh NGCD Programme a tel sawmbik te'n Pencil Pine thingtiak 9 an phun nghal bawk a ni.