Zangnadawmna la tawh, In la thiat duh lo te naktuk-ah khawl hmangin thiah sak an ni dawn

National Highway-54 laihzauh leh siamthat hna thawh meka Serchhip District chhung khaw hrang hranga zangnadawmna la tawh, mahni In leh bungrua leh senghawi lo te chu naktuk, January 31, 2024 khian Magistrate te kaih-hruaina hnuaiah thiah saka an bungrua te senghawi sak an ni dawn.

National Highway-54 laihzauh leh siamthat hna thawh meka Serchhip District-a Competent Authority for Land Acquisition (CALA) leh District Bawrhsap David Lalthantluanga hovin nimin khan Serchhip DC Meeting Room-ah khaw hrang hrang VC te, NHIDCL hotute leh sawrkar Official te chuan NH-54 kawngpui laih meka zangnadawmna la tawh, In thiat duhlo te chungchang hi an sawiho a. He thutkhawm ah hian khawtlang hruaitute atangin Chhiahtlang, Khumtung, Baktawng, Chhingchhip, Keitum leh Bungtlang VC te pawh telin nimin thutkhawm ah hian Zangnadawmna la tawh, an In te thiat tura vawi engemaw zat hriattirna pek tawh mi 20 te chungchang chhawpchhuaha sawiho niin an harsatna tawh dan te chipchiar taka sawiho a nih bakah, complain thehluttu thenkhat te chu anmahni ngei Meeting-ah hian ko in an harsatna tawh dan te sawifiah tir an ni a. Sum leh pai an dawn tur ang dawng kim tawh, mahni In la thiat duh lo te chu an chungah dan angin action lak a ni dawn a. Magistrate te kaihhruaina hnuaiah Team 4 ah inthenin January 31 hian khawl hmangin in thiahsak an ni anga. An In te thiahsak an nih bakah IPC Section 188 tlawhchhanin heng mite hi case awrh tir an ni dawn bawk a. Hetiang a thlen lohna tur hian District Administration chuan an in te thiat vek turin a hriattir nawn leh a ni.

Sawrkar thuchhuah tarlan danin NH-54 kawngpui siam hna hi March 31, 2024-ah zawhfel tura tih a nih avangin Central Sawrkar lam atangin nasa taka nawrna a awm tawh a. Chutihlaiin, In thiat duh lo leh hnathawktu te thawhna dal mi tlem te an la awm a. Heng avang hian hnathawh engemaw chen a sukuk lo thei lo a. District Administration chuan vawi engemawzat an chungchang thu a ngaihtuah tawh a, zangnadawmna la tawh te hi Eviction Order pe in, a hmunah kalchilh an ni a, lehkha pawh vawi engemawzat pek an ni tawh a ni.

Nimin thutkhawm ah hian Assessment tih hmaih avanga zangnadawmna la ngei tur, la ve rih lote chungchang pawh sawiho niin District Administration chuan zangnadawmna an lak ngei theih nan hma a la dawn a. Kawngpui siam avanga feh kawng, Internal Road, mimal leh vantlang thil tihchhiat te pawh siamthat sak emaw, a man hu sum fai NHIDCL in an pe dawn tih tarlan a ni.

Tarlan tawh angin nikum November 28 khan Chhingchhip khua ah zangnadawmna la tawh mi pakhat chu a In a thiah duh loh avangin khawl hmangin thiah sak a lo ni tawh a ni.

Comments

Popular News (Last 30 Days)

LPG man bithliah thar