National Girl Child Day hmang
Child Development Project Officer (ICDS), Serchhip ICDS Project buatsaiha an Office-a he ni puala hun hman ah hian Serchhip CDPO Caryll Lalpari chuan hmeichhiate hlutna leh ram leh khawtlang tan leh chhungkaw tana an hlutna leh tangkaina hrang hrangte a sawi a; India rama hnam thenkhatte leh khawvel huap pawha hmeichhe dinhmun dahhniamna leh rahbehna nasa tak chu kan ramah hian a bo tan tawh thu te sawiin, hmeichhe nau piang thar lo awm zel te pawh thinlung taka an lo lawm zel te kan mawh a nih thu a sawi a. Mizoram-ah chuan hmeichhiate dinhmun a zia hle tih sawiin, anmahni venhim, dawmkan leh an chanvo dik tak an hmuh theih nana tanpui kawng ah theihtawp chhuah zui zel a tul thu a sawi bawk.
National Girl Child Day pual hian Ser-chhip ICDS-a thawktute chuan Hmeichhia te lak thutiam (Pledge) chhiar rualna hun hmangin hemi hnu hian Serchhip-a Office hrang hrangah leh Bazar hmun leh dawr-ah te ‘Signature Campaign’ neih a ni bawk.
Kumin-a National Girl Child Day pual hian January 24, 2024-a hmeichhe naupiang thar te lawmpuina leh chawimawina hun hman a ni dawn a. Amaherawhchu, heng naupiang te hi CHC, PHC leh Damdawi In-a piang ngeite chauh an ni dawn thung a. Khaw tina Anganwadi Worker ten hei hi chhinchhiahin lawmpuina ‘Nau Puak Puan’ bakah Certificate leh Rs. 2000/- an hlan dawn a ni.
Hei bakah hian ‘National Girl Child Day’ pual hian ‘Pa leh Fanu Thlalak Intihsiakna’ huaihawt a ni dawn bawk a. Thlalak tha thlan-chhuah pathum te tan Rs. 2000/- theuh bakah Citation pek an ni bawk dawn a ni. Thlalak te hi January 23, 2024 thlengin Ph. No. 6909504440 (whatsapp)-ah emaw, shewmizoram@gmail.com-ah thawn theih a ni.
Comments
Post a Comment