LESDE Department hnuaia inzirchhuakte awlsam taka sum siam tum lo turin chah

Labour, Employment, Skill Development & Entrepreneurship (LESDE) changtu Minister Lalnghinglova Hmar chuan LESDE Department hnuaia inzirchhuakte chu awlsam taka sum siam tum lo tur leh thiamna tak tak hmanga eizawn tum tlat turin a fuih.

LESDE kaltlanga Industrial Training Institute (ITI) atanga zirchhuak, thiamna hmanga mahni kutkawiha eizawn tumtute puih nana intihsiakna ‘Kawtchhuah-2024' tum hnihna tun thla ni 23-25 chhunga neih kharna hun Govt. Aizawl ITI Auditorium-a niminpiah a neih a hmanpuina ah LESDE Minister chuan ITI atanga mi 4767 te'n thiamthil an zirchhuak tawh leh heng zinga 50.61% te'n eizawnna ngelnghet an nei thei chu ropui a tih thu a sawi a. Sawrkarin tih takzeta hmalatute puih a tum thu leh 'Bana Kaih' Policy a kalpui dawn thu sawiin, ITI zirlai leh zir chhuakte chu eizawnna ngelnghet nei thei tura theihtawp chhuah turin a fuih a. Hun vawng dik tur leh hnathawh nana hun tam zawk hman tum turin a chah a, hlawhtling turin midang aia danglam leh hun hmang tangkai nih a ngai tih a sawi bawk.

LESDE Minister chuan ITI zirlaite chu eizawnna tura pawimawh thiamthil zir tura ITI a lut an ni tih hre reng tura chahin, hming ziahluh ringawta duhtawk mai lova ei hmuhna tlak thiamna zirchhuak thei tura tan la turin a chah a. Trade hrang hrang hnuaia zirlai training-te chu thawhrimna leh teirei peihna ngai pawimawh turin a chah a. Hlawhtlinna chang ta lo te pawh hnual mai lova theihtawp chhuah chhunzawm zel turin a fuih bawk a. LESDE Department hnuaia inzirchhuakte chu awlsam taka sum siam tum lo tur leh thiamna tak tak hmanga eizawn tum tlat turin a fuih a. A taka hna thawktute tan Sawrkar a inhawn reng thu pawh sawiin, theihtawp chhuahtu leh hlawhtlin tumte hmalaksak an nih tur thu a sawi bawk.

Kawtchhuah-2024 hi Ministry of Skill Development & Entrepreneurship (MSDE) hnuaia Skill Strengthening For Industrial Value Enhancement (STRIVE) project kaltlanga buatsaih a ni a, mi 30 ten intihsiakna neiin mi 15 hnenah lawmman cheng nuai khat theuh hlan an ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar