Power Project 6 thawhna tur sum tihfel nghal tum

Union Minister for Power and New & Renewable Energy RK. Singh chuan Mizoram tan 10% Gross Budgetary Support hnuaia Power project 6 thawhna tur sum cheng vbc. 273.21 chu DONER Ministry lama tihfel ngai la awmte tihfel nghal a nih tur thu leh a rang thei ang bera release tir a tum thu a sawi.

P&E Minister F. Rodingliana hian Nilaini kalta khan Union Minister for Power and New & Renewable Energy RK. Singh hi New Delhi-ah kawmin kawlphetha siamchhuah kawnga Mizoram a intodelh theih nana mamawh leh hmachhawp hrang hrangte a thlen a. Union Minister chuan tlangram in a bawh vel Mizoram te ang mil tur Small Hydel Project siamna tur Scheme thar chu Cabinet pawmpui tura chhawpchhuah mek a nih thu sawiin, pawmpuina hmuh a nih veleh proposal thehlut tura an rawn hriattir nghal tur thu a sawi a. Rooftop Solar subsidy rate chu 40% atanga 60% ah tihsan a nih tur thu sawiin, phalzat bituk awm lova proposal lut ang ang an lo pawmsak tur thu a lo hrilh bawk a. Tunlai thiamna thar ber hmanga Pumped Storage Hydropower Project Mizorama hman a nih ve theih nan he project kalpui mekna State, West Bengal leh Andhra Pradesh-ah te hmalak dan kimchang zirchiang turin Mizoram atanga Study Team tirh P&E Minister-in a dilna chu Power Minister chuan a remtih sak bawk a ni.

Union Minister RK. Singh chuan kawlphetha lak leh sem dan kalphung tihchangtlunna tur Central Scheme Revamped Distribution Sector Scheme (RDSS) hnuaia hnathawh tur Smart Metering leh thil dangte chu tun Financial Year chhung ngeia pawisa release nghal a nih tur thu Minister F. Rodingliana hi hrilhin, Mizoram chhungah Eng la dawng ve lo khua emaw, chhungkua emaw an awmloh nana hma la turin a chah a. Mizoram leilung leh kawng awmdante'n a zirloh avangin Scheme leh Project hnathawhna ah bungraw phurh kualna man (transportation cost) a sang bik dan Minister-in a hrilh chu Union Minister chuan a lo hriat thu sawiin, Project Proposal Amount sang deuh bik a awm pawhin ngaihnathiamna nen an lo ngaihtuah zel tur thu a sawi bawk.

He hunah hian Central Power Ministry peng hrang hrang hnuaia Secretary leh Director-te an tel kim hle a. P&E Minister hi Alexander V. Chongthu, Addl. Resident Commissioner chuan a tawiawm a ni.

Minister F. Rodingliana chuan Nilaini vek khan Union Minister for Fisheries, Animal Husbandry and Diarying Parshottam Rupala chu New Delhi-a a chenna In-ah hmuin Bawng leh Kel vulhna tur project Mizoram in a thehluh tawh chu a bawhzui a. Central Scheme hnuaiah Project tha tak tak a awm thu Union Minister chuan lo hrilhin bawhzui dan tur leh hmalakzui dan turte a lo kawh hmuh a; February ni 15, 2024 hmaa bawhzui leh turin a lo chah a ni.