Corruption kan dona kawngah dodalna nasa mah se, kan tawlh dawn lo - Chief Minister

North Eastern Council Plenery Session vawi 71-na a tel Chief Minister Lalduhoma chuan Inrinni khan Aizawl rawn thlengin sawrkarin Industry-ah nasa taka hmalak a tum thu a sawi a, “Corruption kan dona kawngah dodalna nasa mah se, kan tawlh dawn lo,” a ti.

Chief Minister Lalduhoma hi Zirtawpni kaltaa 71st Plenery Session of North Eastern Council Meeting Shillong-a neih-a a tel hnuah Inrinni khan Aizawl rawn thlengin Chief Minister Office Conference Hall-ah thuthar thehdarhtute a kawm nghal a, Chief Minister chuan North Eastern Council Plenary vawi 71-na, State Convention Centre, Shillong-a neih ah hian hmarchhak State atangin Governor 8 leh Chief Minister 7-te an tel thu sawiin, Union Home Minister Amit Shah chuan thutkhawm hi a kaihhruai thu a sawi a. NEC Meeting-ah Investment lam uar taka sawi a nih thu sawiin Lalduhoma chuan, “Single Window System-in kan kal dawn. Kan ramah Investment tih a nih dawnin Clearance hrang hrang lak a ngai a, a kum a kum a duh thin. Chu chuan phurna a tih reh duh bakah hun a heh em em a ni,” a ti a. Clearance lak ngaite a buaipuitu bik siam a nih dawn thu sawiin, “Chung mite chuan tlan ngai zawng zawngah an tlansak vek ang. Reilote ah Clerance an ne thei tawh dawn a ni,” a ti a, awlsam taka Industry din theih a nih dawn thu a sawi.

Chief Minister chuan Non-Industriat State atangin Industrial State lian taka invawrh an tum tih sawiin, “Chu chu kan thalaite hmakhua, kan ram hmakhua a ni. Thalaite chak taka an kal a ngai dawn. Sawrkarin chak takin thalaite hnuh a tum a, thalaite'n sawrkar um pha se kan duh a ni,” a ti a. Confederation of Indian Industry-te'n an Meeting-na ah a sawm thu sawiin chung hunah chuan Investment lamah remchanna nasa lehzualin a awm dawn niin a sawi a, India ram chhung leh pawn atangin Mizoram-ah Investment ti duh an tam thu a sawi a. Investment rawn ti duh nazawng an duh dawn bik loh thu sawiin, “Kan tana tha tur, hnawksak lo tur, kan thalaite dip lo tur kan ngaihtuah a ngai. Tunah chuan thawkho a, tualchhung mi in a hnua an thlak thei tur kan dap thiam a pawimawh,” a ti bawk.

Chief Minister chuan, North Eastern Council Plenery Session-ah hian NESIDS (Other than Road Infrastructure) 15th Finance Commission hnuaiah cheng vbc 300 hman nghal theihin tihfel a ni tih sawiin, tunkar chhung hian he sum hmanna tur project ngaih pawimawh zual thlan a ni ang a, tunkar chhung vek hian tihfel tum a nih thu sawiin, he sum hmang hian Project hrang hrangah hmalakna tan a ni dawn tih a sawi bawk.

ZPM Flagship Programme a Hand Holding Policy pawh NEC intawhkhawmah hian an sawi uar thu sawiin, he Hand Holding Policy hi NEC leh Ministry of DoNER hnuaia Scheme hrang hrangte nena Convergence a kalpui anih theihna turin an phochhuah thu a sawi a. Hand Holding Policy leh Mizorama Project lian zawng zawng endik turin Project Monitoring Committee din a nih tur thu sawiin, he Committee ah hian tlawmngai pawl te, Kohhran leh Political party aiawhte an tel tur thu a sawi bawk.

Thuthar thehdarhtute zawhna chhangin Chief Minister chuan corruption-in Mizoram-ah zung a kaih thuk tawh thu sawiin, “Ngai ah an lo nei tawh a, dan a ni lo tih pawh an hre tawh lo. Hei hi tihtawp kan tum,” a ti a. Corruption do turin khua an tlai tep tih sawiin, corruption tihtawp an tumna lamah dodalna a nasat thu leh dodalna nasa mah se, an paltlang dawn thu a sawi a, “Dan anga thil tih pangngai a neih hun a thleng mai ang. Mi hawtu pawh an tam ang, mahni hlawh pawh ring loa khawsa te pawh an awm tawh. Chung mite chuan min haw ngawt ang,” a ti bawk.