Sports Minister in Union Sports Secretary a kawm

Sports & Youth Services Minister Lalnghinglova Hmar chuan Ministry of Sports-a Secretary Sujata Chaturved-i kawmin sawrkar Laipui puihna Mizoram in a mamawh thu a hrilh.

Sports Minister hian niminpiah khan New Delhi-ah Ministry of Sports-a Secretary Sujata Chaturvedi hi kawmin Mizoram-a Sports lama Sawrkarin hma thar lâk a tum dante sawiin, chu mi tihlawhtling tur chuan Sawrkar Laipui puihna Mizoram in a mamawh thu a hrilh a, Sawrkar Laipui atanga puihna awm angte kan dawng zel a nih chuan a lo thlawna luangral lovin, infiamna lamah Mizoram in hmasawnna a neih belh zel thei ang tih a hrilh a ni.

Sports Secretary chuan Mizoram in mamawh an thlen tawh, ama Office-a châm bâng a awm a nih chuan zawng chhuak tur leh kaltlangpui a nih tur thu Minister a lo hrilh a, Mizoram Sawrkar ngaih pawimawh zawngte ziaka thlen turin a ngen bawk.

Sports Minister-in Mizoram-ah rampum huap Sports lam inrawn-khawmna hun buatsaih a duh thu a sawi chu Sawrkar Laipui puihnaa tihhlawhtlin a nih tur thu Sports Secretary hian a sawi nghal a; Mizoram chhunga Sports Association hrang hrangte vil ngun tura ruahmanna awm chu tha a tih thu leh naupang atanga Sports kalpui tura sikul Sports lam uar tha a tih thu a lo sawi bawk.

LESDE changtu Minister ni bawk Lalnghinglova Hmar hian Ministry of Tribal Affairs-a Secretary Vibhu Nayar pawh New Delhi-ah hian kawmin Ministry of Tribal Affairs chu Tribal-te tana ding a nih angin hemi hnuaia Mizoram in hamthatna a neih dante a sawipui a, a bikin a Department enkawl pathum - LESDE, Sports & Youth Services leh Excise & Narcotics tana thil tangkai thei nia a hriatte a sawipui a ni.

Ministry of Tribal Affairs-a Secretary Vibhu Nayar chuan Mizoram leh Tribal tamna State tana an pek theih hrang hrangte a lo sawi a, heng thilte chang thei tur chuan hnathawh awm tawh lama Utilisation Certificate (UC) neih that a tul thu te, hnathawh tha a pawimawh thu leh hna hmasain a hnunga mite a nghawng theih avangin fimkhur a tul dante a sawi a, Lalnghinglova Hmar chuan sawrkar thar hnuaih dik leh tha taka hnathawh tuma an inbuatsaih dante a hrilh bawk a ni.