Sum lakluh leh thil neih inphulo leh sawrkar bungrua diklo taka hmanga puhna thubuaiah CM thiam chantir a ni

MNF President leh Chief Minister Zoramthanga chu a sum lakluhleh a thil neih inphulo leh Sihphir ram Aii Puk-a a huan-a sawrkar bungrua diklo taka hmanga puhna thubuai ah nimin khan Special Court (Prevention of Corruption Act) chuan thutlukna puangin thubuai pakhat ah thiam chantirin pakhat-ah a chhuah zalen thung.

MNF President Zoramthanga hi sawkar sum hmang dik lo leh thuneihna hmang suala dik lo taka Aii Puk ram-a a huan hung nana sawrkar pawisa senga Goat Proof Wiremesh (Kel pal) leh Angle Iron post inpek tir ah puh a ni a, Court chuan Aii Puk ram chungchanga thuhretute thu sawi atangin Goat Proof Wiremesh (Kel pal) leh Angle Iron Post te chu Aii Puk zau tan hian pek a ni ngei tih a sawi a, helai zau-a huan neitu tam takin an chhawr tih a sawi bawk a. Special Judge chuan, ram neitute'n Thing, Mau leh Thlai te rûkru laka a him theih nan an huan hungna atan Kel pal leh Angle Iron Post chu an hman thu sawiin, “A hmanna tur dik takah an hmang. Chu bakah, Agriculture Department hian loneitu/huan neitute tan heng bungrua te hi an pe thei tih a chiang bawk si a, thil dik lo awmin a lang lo,” tiin he thubuaiah hian Zoramthanga chu chhuah (discharge) a ni.

Zoramthanga a sum lakluh leh a thil neih inmil lo (disproportionate assets) chungchangah Special Judge chuan a tehna tur, Check Period chu kum 2003 atanga kum 2008 inkar a ni a. Hetah hian asset zawng zawng kum 2003 hmalam leh kum 2008 tawpa a thil neih hlutna zawng zawngte leh hemi hun chhunga an chhungkaw sum hman dante chhinchhiah tur a ni a. PWD-in a Immovable Asset pasarih enfiahin, heng zinga panga chu Check Period hmalam kum 2002 a siam zawh tawhte an ni a ti a, Ramhlun-a an chenna In leh Chaltlang-a Residential Hostel an neihte hi a hlut zawng an chhut a, mahse Check Period hmalam hian engnge an lo khawih tawh a, sum engzat nge an sen tih te, Check Period hnulamah eng chen nge an khawih tih te chu an sawichiang thei lo tih a sawi a ni.

An chhungkaw account leh LIC a sum an neihte chu a then Check Period hnu lama mi a nih hlawm avangin Check Period chhunga account atang chuan disproportionate asset a tling thei lo a, hei vang hian he case hian pawimawhna a nei lo niin a sawi a. Disproportionate asset-ah chuan finfiahna (evidence) a awm theih loh thu sawiin, “A pui tura ngaih EO (Enquity Officer) pakhat lahin a hriatpui loh thu a sawi,” tiin thiamloh chantirna tur leh thiam chantirna tur a awm loh avangin chhuah zalen a nih thu a puang a ni.