Latest News

KEIMAHNI

MJA Serchhip District Member ten Vawiin leh naktuk ah Thingdawl-a Horticulture Department hmalakna leh Rel kawng siam mek te an tlawh dawn avangin naktuk leh naktip-ah te LENKAWL a rawn chhuak thei dawn lo a, mipuite hriatthiamna kan ngen e.

Agriculture Minister in nasa zawka hma lakpui turin IFAD mithiamte sawm

Agriculture Minister C. Lalrinsanga chuan Agriculture leh a kaihhnawih kawng hrang hranga Mizoram mamawh te phuhru tura nasa zawka hma lakpui turin IFAD mithiamte chu a sawm a, Mizoram Sawrkar chu IFAD tana a inhawn thu leh heng kan mamawhte tihhlawhtlin a nih theih nana chak lehzuala thawpui turin a sawm bawk.

Mizoram in FOCUS Project a kalpui mek dan te en thlithlai a, rawtna leh kaihhruaina te pe turin IFAD mithiam Anton Glaser, Mission Leader leh a hote chuan tunlai hian FOCUS project in a huam- Champhai, Kolasib, Serchhip, Mamit, Saitual leh Khawzawl District-ah te Mid-Term Evaluation rawn tiin FOCUS Mizoram chuan mithiamte hi lo dawngsawngin Zirtawpni tlai khan heng mite hi Cultural programme hmanpui an ni a. He hunah hian Agriculture Minister chuan IFAD mithiam te chu Agriculture leh a kaihhnawih kawng hrang hranga Mizoram mamawh te phuhru tura nasa zawka hma lakpui tura sawmin, Mizoram hmalam thlirin kan tlangram duat tak chunga kan economy tih that theihna tur te, sik leh sa inthlak danglam chak tak avanga kan ram enkawl dan mumal zawk neih dan tur leh kan loneitute tan a hlawk zawka farming kalpui a nih theih nan Integrated 3-Tier farming System kan mamawh thu a sawi a. 

Agriculture Minister chuan IFAD mithiamten Mid-Term Evaluation an rawn neih chhunga an rawtna siamte chu a taka kalpui a nih ngei theih nan FOCUS Mizoram hmalakna chu uluk lehzuala a lo enpui zel tur thu IFAD hotute hnenah hian a sawi bawk.

Fostering Climate Resilient Upland Farming System, FOCUS Project ti a sawi hi United Nations hnuaiah IFAD leh Mizoram sawrkar in January 25, 2018 khan agreement ziaka kalpui tan a ni a. FOCUS Project hi USD Maktaduai 79.30 ( $79.30 Million) senna tur project niin he project in a tum chu tlangram lo neituten sik leh sa inthlak zel mila Agriculture leh a kaihhnawiha hmalakna an kalpui theih nana kaihhruaina leh an mamawh pek a ni.

FOCUS project hmang hian loneitute chu Farmer Interest Group (FIG) hrang hranga kuahkhawm niin, tlangram lo neih dan tha zawk zirtir te, thlai kumhlun chin dan mumal zirtir leh chin tur pek te, ranvulh dan awmze neia kalpui te leh kawng hrang hranga kuthnathawktute kaih-hruai leh an mamawh te pe a hmalakna kalpui a ni a. Environment chhe zel tur laka invenna mumal tak siama loneitute leh kuhnathawktute mamawh kawng hrang hranga phuhruk sakna Project pawimawh tak niin a huam District-ah te tunah hian chak takin hmalak mek a ni bawk.

Comments

Popular News (Last 30 Days)